أزمة البيض التركي.. ليه التجار زعلانين.. مفاجأة في التفاصيل

هو ليه تجار البيض في مصر زعلانين من استيراد البيض التركي..  وايه السر في ارتفاع الأسعار ومين اللي بيلعب في السوق وليه صفقات الاستيراد كشفت المستور في سوق البيض.. في التقرير ده هتلاقوا تفاصيل كتير خليكم معانا للآخر

 
الحكومة في العادة بتلجأ للاستيراد لما أسعار سلعة بتزيد في الأسواق بشكل غير طبيعي ولا مبرر لكن بيكون وراها جشع التجار والمحتكرين والحقيقة الاستيراد ثبت أنه طريقة فعالة للقضاء على الاحتكار وخلق حالة توازن في الأسواق وتخفيض الأسعار ودا حصل قبل كده كتير زي ما شفنا في أزمة السكر واللي قفز سعره بجنون ولما الدولة استوردت السعر نزل واستقر .. نفس الحكاية دلوقتي في أزمة ارتفاع أسعار بيض المائدة واللي سعره فجأة رفع بدون مبرر  وكل ما تسأل تاجر يقولك سبب مختلف لكن في النهاية الحكاية كلها طمع وجشع وتربح حتى لو حساب الناس الغلابة وعشان كده الحكومة لجأت لاستيراد البيض والمرة دي استوردت من تركيا ودا لأنه سوف قريب وفي نفس الوقت سعره ارخص من السوق المصري رغم تكلفة الشحن والتفريغ والنقل..

المواطن طبعا مبسوط باللي حصل لأن الأسعار بدأت تستقر مع استيراد اول شحنتين من البيض التركي بإجمالي 200 ألف طبق  ومن المقرر وصول شحنة إضافية في 2 نوفمبر اللي جاي بحجم 400 ألف طبق، وبعدها شحنة رابعة في 10 نوفمبر بنفس الكمية، وبكده تكون الشركة استكملت التعاقد على استيراد مليون طبق من البيض التركي، بعدد 30مليون بيضة ويتم بيع كل طبق بسعر 150 جنيهًا في المجمعات الاستهلاكية بعد ما كان خلاص داخل على 200 جنيه للطبقة.

طيب ايه الجديد طالما أسعار البيض بدأت تستقر؟
الأزمة أن تجار البيض زعلانين من الاستيراد ويقولوا إن ده هيأثر على المنتج المصري وهيخلي المربين وأصحاب المزارع يتوجهوا للاستيراد بدل ما يربوا الفراخ وينتجوا البيض وبكده الصناعة هتدمر ودا اللي قاله على لسانهم حازم المنوفى رئيس شعبة السلع الغذائية بغرفة الإسكندرية التجارية واللي طالب بعدم فتح باب استيراد  البيض التركي من الخارج إلى مالا نهاية لأن ده بيضر بالمنتجات المصرية، وبيختلف  مع رؤية الدولة لقليل الاستيراد

طيب ياعم المنوفي ماهو التجار هما اللي بيرفعوا الأسعار من غير اي سبب غير الطمع والحكومة لازم تتدخل عشان تخفف على المواطن لأن دي شغلتها في الأساس وهي لجأت للاستيراد عشان تحل أزمة مش عشان تدمر الصناعة الوطنية للدواجن والبيض وهنا رد حازم المنوفي واعترف أن فيه خلل بسبب انخفاض أسعار البيض المستورد عن المحلي رغم التكلفة العالية لمصاريف الشحن والنقل وطالب بفتح تحقيقات ولجان تقصي حقائق عشان تعرف الحلقة المفقودة فين ومين المسؤل عن الأزمة.. طيب اذا كنت انت اللي رئيس الشعبة مش عارف مين السبب الناس والحكومة هتعرف ازاي.

وعلى فكرة  المنوفي نفسه سبق وصرح وقال ان  أسعار البيض انخفضت 10 جنيه في الطبق من 175 جنيها إلى 165 جنيه للمستهلك للبيض الأحمر والابيض، وانخفاض  البيض البلدي  من 165 جنيها إلي 150 جنيها للطبق أي بمعدل 15 جنيها للطبق ورغم كده كانت التخفيضات وهمية وفضل سعر البيض في الطالع والبيض التركي هدفه خلق التوازن في الأسواق وزيادة المعروض من المنتج لانه سلعة مهمة جدا خاصة في موسم المدارس ومفيش استغناء عنه واكيد الحكومة مش قصدها تحارب الصناعة الوطنية لكن في الوقت نفسه لازم التجار يعرفوا أن الحكومة عندها حلول كتير عشان تواجه بيها جشعهم.