تطورات مهمة في سعر الدولار في البنوك.. مصير العملة الخضرا الأيام الجاية

يا ترى ليه سعر الدولار بيزيد في البنوك وشركات الصرافة كل شوية؟ وإيه السر ورا الحركة البطيئة دي في سعره مقابل الجنيه؟ وإزاي تأثيرات الاقتصاد العالمي وأجواء الضغط اللي بتعيشها مصر بتأثر على العملة المحلية؟ أسئلة كتير بتتتردد في الفترة الأخيرة بس عشان نجاوب عليها لازم نشوف إيه اللي حصل مؤخراً في السوق وإزاي الدولار بيزحف بهدوء كل فترة لحد ما يقرب من مستوى الـ49 جنيه

في الفترة الأخيرة الدولار بيتحرك بشكل بطيء ومش ملحوظ بالنسبة للناس لأنه بيتحرك في حدود قرشين وتلاتة و4 قروش ووصل فى بعض في البنوك زي بنك "ساييب" مثلاً لحوالي 48.95 جنيه للبيع و48.85 جنيه للشراء. كمان في البنوك الكبيرة زي البنك الأهلي المصري وبنك مصر السعر تقريبًا ثابت عند 48.85 جنيه للبيع

طب  إيه اللي بيحرك الدولار بالشكل البطيء ده؟

خلينا نقول إن حركة الدولار مرتبطة بعدة عوامل أولها وأهمها الوضع الاقتصادي العالمي وخاصة في ظل ضغوط الفايدة المرتفعة على الدولار في الولايات المتحدة..والبنك الفيدرالي الأمريكي زود أسعار الفايدة بشكل كبير عشان يواجه التضخم وبالتالي ده بيعمل جذب للاستثمارات نحو الدولار فبيزيد الطلب عليه مقابل العملات التانية والجنيه مش استثناء من ده

وفي مصر الحكومة والبنك المركزي بيواجهوا ضغوط كبيرة عشان يحافظوا على استقرار الجنيه.. لكن الحقيقة أن ارتفاع الفايدة على الدولار وقرارات الفيدرالي الأمريكي بيلعبوا دور مهم في تغيير سعر العملة.

رئيس الوزراء مصطفى مدبولي أكد إن التحركات الأخيرة مش مرتبطة بأي نية لتعويم الجنيه من جديد واكد ان كلام مديرة صندوق النقد الدولي عن ضرورة "التحريك" كان تصريح قديم من يناير اللي فات.. ومن ساعتها مصر نفذت إصلاحات اقتصادية حازمة وصندوق النقد فعلاً أشاد بالسياسة النقدية المصرية اللي بقت أكتر استقرارا.

طب ايه دور البنك المركزي فى القضاء على السوق السودا للدولار وحل أزمة ضح العملة؟

البنك المركزي كان ليه دور محوري في التحكم في سعر الصرف…وفي مارس اللي فات رفع المركزي سعر الفائدة 600 نقطة مرة واحدة وكمان حرر سعر صرف الجنية فى مقابل العملات الأجنبية .. وده أثر بشكل كبير على سوق العملة وخلّى الدولار يستقر أكتر ويتقضى على السوق السوداء تقريبت وخلا حركة النقد الأجنبي بقت منتظمة ومفيش تأخير في استيراد المواد الخام أو مستلزمات الإنتاج..و ده كان خطوة حاسمة للبنك المركزي عشان يثبت استقرار السوق رغم الزيادة المستمرة في الطلب على الدولار.

السؤال اللى معظم الناس بتسأله دلوقتي.. هل الدولار هيفضل يتحرك بالشكل البطيء ده لفترة أطول ولا لأ؟

غالبًا ده اللي هيحصل.. لأن الوضع الاقتصادي العالمي فيه اضطرابات كتير وسعر الفايدة على الدولار متوقع يفضل مرتفع لفترة كمان .. وفيه كمان تراجع فى بعض مصادر النقد الجنبي المهمة زي قناة السويس و كل ده معناه إن مصر لسه في تحدي للحفاظ على استقرار الجنيه قدام الضغوط المستمرة