استثمارات سعودية جديدة في مصر.. ومفاجأة صندوق النقد للحكومة.. والمصريين عملوا إيه بـ 10 طن دهب.. وانفراجة ضخمة في ملف انتاج الغاز
متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار الساعة النهاردة الأربعاء 30 أكتوبر 2024
منصات بانكير قدمت النهاردة عدد من التقارير المهمة لأهم الأحداث الاقتصادية النهاردة والبداية كانت مع تقرير عن مشروع أمريكي في قطاع الغاز المصري
وشرح التقرير إنه في خطوة جديدة لتعزيز إنتاج الغاز الطبيعي شركة "هاليبرتون" الأمريكية بدأت فعلياً في تنفيذ مشروعات حفر وتجهيز أربع آبار جديدة في المياه العميقة بمصر.
ولفت التقرير إن الشركة الأمريكية بدأت بالفعل تجهيز بئر من الآبار الأربعة ونجحت في تشغيله ضمن المرحلة العاشرة من مشروع البرلس لإنتاج الغاز في غرب دلتا النيل..وده واحد من المشروعات الاستراتيجية اللي هدفها الأساسي هو زيادة إنتاج الغاز الطبيعي وتعويض التراجع اللي كان حاصل في إنتاجية بعض الآبار
وكشف بانكير إن الشركة الأمريكية بتسابق الزمن للانتهاء من باقي الأبار ومن المتوقع إن عمليات تجهيزهم تنتهي بنهاية شهر نوفمبر اللي جاي .. ومع إنجاز المشروع بالكامل من المتوقع إن الآبار دي تضيف ما بين 150 إلى 200 مليون قدم مكعب من الغاز يومياً للإنتاج الحالي وده هيفرق بشكل كبير في تلبية احتياجات السوق المصري
وسلط التقرير الضوء على مشروعات"هاليبرتون" التانية وقال إن الشركة بتجهز كمان بئرين إضافيين في حقل "ريفين" اللي بتديره شركة "بي بي" غرب الدلتا.. وبالفعل عمليات تجهيز البئر الأول تقريباً انتهت والبئر التاني هيكون جاهز منتصف نوفمبر.. والمستهدف من حقل ريفين بعد تطويره 200 مليون قدم مكعب إضافية يوميا وده استثمار بحوالي 800 مليون دولار في منطقة البحر المتوسط اللي بقت محور اهتمام الشركات العالمية في قطاع الطاقة
التقرير التالي اللي قدمته منصة بانكير كان بخصوص مشتريات المصريين من الدهب واللي سجلت رقم ضخم جدا
ولفت التقرير إنه برغم إن الأسعار عالية ومعدلات التضخم بتأثر على القدرة الشرائية بس الأرقام بتقول إن مشتريات المصريين من الدهب لسه مستمرة في الصعود ووصلت لـ 10.4 طن في الربع التالت من 2024 حسب آخر تقرير لمجلس الذهب العالمي يعني في خلال 3 شهور بس.
وفسر التقرير سر ارتفاع مشتريات الدهب رغم ارتفاع التضخم ودخول موسم المدارس إن المصريين لجأو للدهب
لأنه ملاذ آمن بالنسبة للمصريين خصوصا في أوقات عدم استقرار الاقتصاد.. والتحليل الفني لمؤسسة جولد بيليون بيقول إن سبب الإقبال على الدهب سببه خوف المصريين من تراجع قيمة الجنيه من جديد خاصة مع توقعات تقلبات في سعر الصرف رغم إن سعر الجنيه مستقر بشكل كبير بعد خطة الإنقاذ من صندوق النقد الدولي اللي بدأت في مارس
وشرح بانكير إن كتير من المصريين بيدوروا على استثمارات تقدر تحافظ على قيمة فلوسهم فاختاروا الدهب رغم ارتفاع أسعاره بس اللي يهمنا هنا هو إنهم ما بيشتروش مشغولات دهب وبس لأ كمان فيه إقبال على السبائك والعملات الدهبية كأداة للتحوط وحفظ القيمة
التقرير الأخير اللي قدمته منصات بانكير النهاردة كان بخصوص زيارة الدكتور مصطفي مدبولي للسعودية للمرة التانية في وقت قصير..
وقال التقرير إن الدكتور مصطفى مدبولي رئيس مجلس الوزراء سافر الي العاصمة السعودية الرياض نيابة عن الرئيس عبدالفتاح السيسي علي رأس وفد اقتصادي مصر للمشاركة في قمة الاستثمار اللي بتنعقد في الرياض في الفترة من 29 إلى 31 اكتوبر الحالي واللي هتيم فيها الاعلان عن صفقات دولية بقيمة 28 مليار دولار ودي المرة التانية اللي مدبولي يزور السعودية في فترة وجيزة.
وسلط تقرير بانكير الضوء على أهمية الزيارة الأخيرة لمدبولي للسعودية واللي هتساهم في تعزيز التعاون الاقتصادي وكمان هيرفع حصة مصر من الاستثمارات السعودية..
وكشف التقرير إن العلاقات السعودية المصرية في الفترة اللي فاتت شهدت محطات مهمة جدا وكان أبرزها توقيع صفقات بقيمة 35 مليار دولار للقطاع الخاص السعودي والصندوق السيادي،
ولفت التقرير إن صندوق السعودي للتنمية قدم 32 قرض لمصر بقيمة تقارب 3 مليارات دولار لتمويل مشاريع في قطاعات مختلفة، والسعودية دعمت الاقتصاد المصري من خلال تقديم ودائع للبنك المركزي المصري بقيمة 10.3 مليار دولار.
وعلي المستوي التجاري، شرح التقرير إن السعودية هي تاني أكبر شريك تجاري لمصر، ووصل حجم التبادل التجاري بين السعودية ومصر ل 12.8 مليار دولار في 2023.
التقرير الأخير اللي قدمته وحدة أبحاث بانكير كان بخصوص مصير المراجعة الرابعة لصندوق النقد الدولي
وقال التقرير إنه خلال أيام، بعثة فنية من صندوق النقد الدولي، هتزور القاهرة، وتحديدا خلال الأسبوع الأول من شهر نوفمبر الجاي، بهدف إجراء المراجعة الرابعة لبرنامج الإصلاح الاقتصادي والاجتماعي المقرر مع مصر.
وشرح بانكير إنه حاليا في مشاورات وتفاهمات مبدئية مشتركة حصلت خلال الاجتماعات السنوية الأخيرة لصندوق النقد والبنك الدوليين بالعاصمة الأمريكية واشنطن، بين الحكومة المصرية والصندوق، وهي بخصوص التوجه نحو مراجعة بعض بنود البرنامج المقرر.
وكشف بانكير إن الصندوق أبدى مرونة في التعاطي مع بعض بنود وبرامج الاتفاق الزمنية، خاصة إمكانية تمديد البرنامج الزمني لرفع الدعم وتحرير أسعار المحروقات بشكل كامل، واللي قطعت مصر شوط كبير جدا في الطريق ده، وده بجانب إصلاحات تانية متفق عليها.
والكلام ده معناه، إن في سيناريوهات وبدائل هتعرضها الحكومة المصرية على بعثة الصندوق لما تيجي القاهرة الأسبوع الجاي
