جنون في سوق الدهب.. وتوقعات بوصول سعر الجرام إلى مستويات تاريخية

يا ترى ايه الل بيحصل فى سوق الدهب عالميا.. وهل الدهب هيبقى الملاذ الآمن فعلاً؟ وهل اللي عاوز يشتري دهب  يستنى ولا يغتنم الفرصة؟ وإزاي الأسعار العالمية اللي بتكسر الأرقام القياسية كل يوم بتأثر على سوق الدهب في مصر؟

في الأيام اللي فاتت، شوفنا سعر أونصة الدهب عالمياً قري  يوصل لحوالي 2800 دولار. الرقم ده يعتبر قفزة كبيرة والسبب الرئيسي فيه هو حالة التوتر اللي عايشين فيها بالأسواق العالمية.. كمان قرارات البنوك المركزية زي البنك الفيدرالي الأمريكي اللي كان بيرفع الفايدة الفترة اللي فاتت أثرت بشكل كبير على حركة رؤوس الأموال وخلت المستثمرين يدوروا على الأمان في أصول زي الدهب اللي بيُعتبر تاريخيًا "ملاذ آمن" وقت الأزمات.

طب  تأثير الارتفاع ده إيه في مصر؟

طبعًا إحنا عارفين إن سعر الدهب في السوق المصري مرتبط بشكل مباشر بسعر الدولار في مصر بالإضافة طبعًا للأسعار العالمية للأونصة..و لما سعر الأونصة يرتفع بالطريقة دي لازم طبعًا يحصل رد فعل في السوق المحلي وسعر الجرام في مصر بيتأثر على طول خاصة  إن المستوردين بيشتروا بالعملة الأجنبية يعني كل حركة في الأسعار العالمية أو في سعر الصرف بتأثر عندنا بشكل مباشر.

ومع توقعات بعض المحللين إن الأونصة ممكن تكسر حاجز الـ 3000 دولار لو استمرت الاضطرابات العالمية فيه كلام كتير عن إنه احتمال أسعار الدهب في مصر تكمل في الارتفاع بس طبعًا الموضوع مش بسيط.. إحنا كمان مرتبطين بحركة الدولار هنا واللي بيساهم بشكل كبير في تشكيل الأسعار في السوق المحلي.. ودلوقتي سعر جرام الدهب عيار 21 بقى قريب من أعلى مستوى ليه

طبعًا السؤال اللي في بال أي حد عاوز يستثمر دلوقتي هو أشتري ولا أستنى؟

فيه اللي بيقولوا إن دلوقتي مش أفضل وقت للشراء، وده بسبب توقعات إن الأسعار ممكن تنزل لو هديت شوية التوترات في الأسواق العالمية أو لو حصل أي تعديل على أسعار الفايدة العالمية.. بس في نفس الوقت فيه ناس تانية  شايفة إن الدهب دايمًا بيحتفظ بقيمته على المدى الطويل وإنه مهما ارتفع بيبقى استثمار آمن.. يعني لو بصيت عليه كاستثمار بعيد المدى ممكن يبقى الشراء دلوقتي مش خسارة خصوصًا لو اشتريت بكميات بسيطة وبشكل تدريجي

طب ايه العوامل المؤثرة على الأسعار الفترة الجاية؟

اللي بيحصل دلوقتي على مستوى العالم بيلعب دور كبير في حركة الأسعار.. عندنا مثلاً التضخم العالمي اللي لسه مستمر وفيه توقعات إن البنوك المركزية ممكن ما توقفش رفع الفايدة وده بيأثر على حركة الاستثمارات اللي بتحاول تدور على أصول آمنة.. كمان الأوضاع السياسية العالمية والمشاكل الاقتصادية في بعض المناطق بتدفع المستثمرين يلجأوا للدهب كملاذ آمن

وفي مصر كل ما الوضع العالمي يبقى مضطرب كل ما يبقى فيه تأثير على السوق المحلي والسعر بيزيد وعشان كده لو عندك قدرة إنك تستثمر جزء من أموالك في الدهب وبتفكر على المدى الطويل ممكن يكون ده قرار مناسب

ولو إنت مستثمر صغير وعايز تحافظ على قيمة فلوسك الأفضل إنك ما تندفعش لشراء كميات كبيرة مرة واحدة دايمًا خلّي استثمارك في الدهب موزع بشكل تدريجي يعني اشتري كميات صغيرة في فترات متباعدة..بالطريقة دي هتقدر تستفيد من تغيرات السوق وما تتأثرش بأي انخفاضات مفاجئة لو حصلت

الدهب دايمًا كان استثمار آمن في أوقات الأزمات ولو شوفنا الوضع العالمي دلوقتي بنفهم ليه الناس بتتجه للدهب لكن لازم تكون واعي إن أسعار الدهب في مصر مرتبطة بعوامل كتيرة زي الدولار والأسعار العالمية، ولو كنت ناوي تشتري فكر على المدى البعيد لأن السعر الحالي ممكن يكون مرتفع بس على المدى الطويل استثمارك غالبًا هيحافظ على قيمته