مشروع مفاجأة في اقتصادية قناة السويس

المنطقة الاقتصادية لقناة السويس بقت منطقة جاذبة لكل المشروعات من مختلف دول العالم، وفي الفترة اللي فاتت المنطقة استقبلت استثمارات كتيرة جدا، بس المرة دي المنطقة وقعت عقود شركة مختلقة تماما واول مرة تكون موجودة في مصر..  يا تري اية هو المشروع ده .. وآية المميزات اللي هترجع علي مصر منه

 
من فترة طويلة ومصر بتستهدف جذب الاستثمارات الأجنبية من كل المجالات، واول واهم المناطق اللي استقبلت استثمارات جديدة من كل المجالات هيا المنطقة الاقتصادية لقناة السويس واللي في الوقت الحالي هدف استراتيجي لكل الشركات الاستثمارية في كبري دول العالم وخصوصا الصناعات الكبيرة والهامة  زي صناعات العربيات والهيدروجين الاخضر والمشروعات المتعلقة بمجال الطاقة

كلمة السر  في كل المشروعات والاستثمارات اللي استقبلتها مصر في الفترة اللي فاتت كان هيا الحكومة واللي عدلت القوانين واللوائح والإجراءات اللي كانت عقبة رئيسية في طريق اي مستثمر عايز يدخل يعمل مشروع أو يبني مصنع دي غير التغيرات الكبيرة اللي كانت موجودة في الصرف واللي كانت بتمنع اي مستثمر يدخل البلد خصوصا أن كان كل يوم يشتري المواد الخام بسعر مختلف كل يوم، وبعد القرار الجريء من الحكومة المصرية بتحرير سعر الصرف بشكل كامل في بحور كتيرة من الاستثمارات الأجنبية بدأت تدخل مصر بشكل يومي .
طيب اية الجديد في المنطقة الاقتصادية لقناة السويس ؟.
المرة دي المنطقة الاقتصادية لقناة السويس استقبلت نوع ومشروع جديد من الاستثمارات وهو مشروع إنتاج البولي يوريثان بمنطقة المصانع الجاهزة، والمصنع ده هيكون الي مساحة 5 آلاف متر مربع، باستثمارات أولية بقيمة 100 مليون جنيه مصري.

مش كده بس لا ده كمان الشركة اللي وقعت العقود مع مسئولي الهيئة العامة المنطقة الاقتصادية لقناة السويس هتعمل مرحلة تانية من المشروع واللي هتشهد ضخ مزيد من الاستثمارات، وتوفير مزيد من فرص العمل، وهتبدا المرحلة الأولي من الإنتاج بالمصنع في الربع الأول من عام 2025، بطاقة إنتاجية مستهدفة هتوصل 20 ألف طن من مادة البولي يوريثان .

وليد جمال الدين رئيس الهيئة الاقتصادية لقناة السويس قال أن تنوع الحوافز داخل المنطقة الاقتصادية والإعفاءات الخاصة بالسلع اللي بيتم تصديرها، وبرنامج دعم الصادرات، والموقع الاستراتيجي والتكامل بين المناطق الصناعية والمواني البحرية، خلي المنطقة هدف استراتيجي لكل الشركات علي مستوي العالم

جمال الدين، قال كمان إن المنطقة الاقتصادية بتسعى لإنشاء مجمعات صناعية متكاملة من خلال قطاعاتها المستهدفة، لدعم سلاسل الإمداد العالمية، خصوصا أن المنطقة بتتوفر فيها العمالة المدربة والطاقة اللازمة بأسعار تنافسية .