الفيدرالي يحبس الأنفاس وترقب كبير في الأسواق.. إيه اللي هيحصل فى اجتماع نوفمبر؟

هو ايه اللى ممكن يحصل فى اجتماع بنك الاحتياط الفيدرالي في نوفمبر؟ وليه فيه ترقب كبير فى الأسواق انتظارا لقرارات الاجتماع الجاي لصناع السياسة النقدية فى الولايات المتحدة؟ وهل صحيح إنه ممكن يفكر يخفض الفايدة؟ طيب، لو حصل فعلاً... إيه تأثير ده علينا وعلى الاقتصاد المصري؟ وليه أي قرار بيطلع من هناك بيهز أسواق العالم ويخلي الكل يترقب؟.. تابع الفيديو للاخر وهتعرف كل التفاصيل.

ناس كتير بتسأل "هو ليه الفيدرالي الأمريكي مهم كده؟ وليه الدنيا كلها بتبقا قاعدة مستنية قراراته ؟

بص يا سيدي الفيدرالى هو اهم مؤسسة مالية فى العالم الناس بتترقب قراراتها من بعد فبراير 2022 واللى بيعملوا الفيدرالى فى اجتماعاته بيرسم خريطة تعامل البنوك المركزية حوالين العالم كله .. وهو المسؤول عن تحديد سعر الفايدة في أمريكا وأي تغيير في السعر ده بيعمل دوشة عالمية مش بس في أمريكا.. ده كمان بيأثر على الدول اللي بتتعامل بالدولار زي مصر وغيرها.

طب  إيه اللي ممكن يحصل في اجتماع نوفمبر؟

بعد ايام قليلة  الفيدرالي الأمريكي هيعقد اجتماع مهم جدًا والأنظار كلها متعلقة بالقرار اللي هيطلع منهم خصوصًا بعد المؤشرات اللي بدأت تظهر بإنهم ممكن يفكروا في خفض الفايدة تاني.. بعد سلسلة من قرارات رفع الفايدة اللي كانت لتهدئة التضخم اللي حصل بسبب أزمة الكورونا وسلاسل التوريد ومن بعدها الحرب الروسية الاوكرانية واللي أثرت كمان على الاقتصاد الأمريكي وعمل تحديات قدام الاقتصاد العالمي كل.. بس دلوقتي، في ناس كتير شايفة إنه ممكن يكون في "تغيير" في السياسة دي وده الليمخلي فيه ترقب كبير للقرار الجاي

وفي الأيام اللى فاتت فيه إشارات كتيرة بإن الاقتصاد الأمريكي ممكن يكون محتاج دعم بسيط عشان يفضل محافظ على نشاطه وده اللي ممكن يخلي الفيدرالي يفكر في خفض الفايدة لإنه بكده بيشجع المستثمرين على إنهم يستثمروا أكتر بدل ما يحوشوا فلوسهم وكمان بيسهل الاقتراض وبيعمل نشاط في السوق.

وايه تأثير القرار المتوقع علينا في مصر ؟

الموضوع ده مهم لينا جدا لأن أي قرار من الفيدرالي بيأثر بشكل مباشر على الدولار وإحنا في مصر مرتبطين بالدولار بشكل كبير..و في حالة خفض الفايدة في أمريكا ممكن يحصل كذا تأثير علينا زي تراجع سعر الدولار عالميا ولو الدولار ضعف ده ممكن يكون فرصة لبعض الأسواق بس ده هيخلينا نفكر أكتر في استيراد السلع بالدولار وفي الحالة دي الأسعار ممكن تنزل شوية وده خبر حلو للمستهلك المصري.

كمان خفض الفايدة في أمريكا هيشجع الدول على الاستثمار فيها بدل من تخزين الدولار وده ممكن يسبب تحسن في الوضع الاقتصادي عندنا خاصة إن الحكومة بتعتمد على الاستثمارات الأجنبية.

الدهب كمان ليه علاقة قوية بقرارات الفيدرالي.. ولو الفايدة نزلت الطلب على الدهب ممكن يزيد كملاذ آمن وده يخلي أسعار الدهب في مصر ممكن تتأثر وتزيد وبالتالي ممكن يكون قرار الفيدرالي بردو مرتبط بجوانب كتير في حياتنا اليومية.

طب البنك المركزي هيعمل إيه فى اجتامعاته الجاية ؟

البنك المركزي كمان بيتابع لقرار الفيدرالي عن قرب وده لإنه بيحط في اعتباره التوازن الاقتصادي وبيقرر بعدها يتصرف إزاي. ولو الفيدرالي خفض الفايدة ممكن ده يشجع المركزي عندنا إنه يحافظ على الفايدة أو حتى يفكر في تخفيضها عشان يدعم السوق ويشجع الاستثمار