لو محتار تشغل فوسك فين.. هنقولك تعمل ثروة إزاي
معاك مدخرات أو تحويشة ومش عارف تشغلها فين وإزاي وعاوز مكسب مضمون من غير مخاطرة.. كل دا هنقولك عليه في الفيديو دا .. بس خليكم معانا للآخر عشان تعرفوا التفاصيل.
في الأول لازم تعرف إن فلوسك اللي تحت البلاطة قيمتها بتقل كل ما الوقت يعدي عليها ودا عشان الظروف والتلقلبات اللي بتحصل في سوق العملة واللي قيمتها بتقل وبالتالي فلوسك بتخسر من قيمتها وعشان كده لازم تشغلها في استثمار تضرب بيه أكتر من عصفور في وقت واحد أولها إنك تضمن فلوسك قيمتها متقلش وتاني حاجة تكسب من وراها وتالت حاجة إنك بتاخد فكرة عن الاستثمار واللي ممكن بعدين تدخل وتتوسع في مشروعات تانية بدل الفلوس مكانت مركونة.
طيب ايه أفضل استثمار دلوقتي ممكن تشغل فيه فلوسك؟
شوف فيه أنواع كتير من الاستثمار وكل نوع بيكون ليه أوقات معينة تحط فلوسك فيها عشان تكسب ودا بيفرض عليك تتابع السوق كويس قبل ما تحط فلوسك في استثمار معين يعني مثلا لو هتحطها في عقار يبقي لازم تتابع حركة البيع والشراء والتوقعات بالنسبة للسوق دا وهكذا.
وزي ماقلنا لحضرتك فيه أكتر من نوع استمثار زي العقار والبورصة والدهب والمعادن والمشروعات الخاصة وشهادات الادخار ولأن كل دي استثمارات ممتازة وفيها مزايا كتير لكن احنا هنا وفي الوقت دا تحديدا بنشرح لحضرتك الدهب.. هتقولي ليه.. هقولك عشان هو اللي طالع دلوقتي وللي تقدر من خلاله تحقق ثروة كبيرة ودا لأن التوقعات بتقول إن أسعار الدهب لسه هتضرب في اتنين يعني هتضاعف ودا لأسباب كتير خبراء الاقتثصاد شرحوها كتير ومنها التوترات اللي في العالم واللي بترفع فورا من أسعار المعدن الأصفر ودا غير تأثير سعر الفايدة في البنوك المركزية العالمية وخاصة الفدرالي الامريكي وزي ما احنا عارفين إن سعر الفايدة ماشي بشكل عكسي مع سعر الدهب يعني لو الفايدة انخفضت سعر الدهب بيزيد مباشرة ودا لأن المستثمرين بتجري على المعدن الاصفر لأن مكاسبه بتكون أعلى من فايدة البنوك والعكس صحيح.
طيب الاسواق والخبراء ليه بيفضلو الدهب عن اي استثمار تاني دلوقتي؟
شوف ياسيدي فيه أكتر من سبب تخلي الدهب هو اختيارك الاول في الاستثمار زي التوقعات اللي بتأكد إن الدهب سعره هيضاعف ومنها إن عيار 21 في مصر هيوصل 5000 جنيه في الكام شهر اللي فاضليين من 2024 ومع بداية السنة الجديدة الاسعار هتستمر في الصعود يعني لو اشتريت النهاردة دهب ب3700 مثلا بعد كام شهر هتبيعه بـ 5 الاف جنيه يعني هتكسب 1300 جنيه في الجرام الواحد ودا غير إن فيه أسباب تانية كتيرة بتشجع على الاستثمار في المعدن الاصفر زي الربح المضمون وإن فلوسك بتكون في أمان ومفيش عنصر مغامرة كبير ومش محتاج اجراءات ولا تنقلات.
