جنون الدهب.. شوف سر ارتفاع أسعار المعدن الأصفر وامتى هتنزل تاني؟

يا ترى إيه سبب جنون أسعار الدهب في الأيام الأخيرة، وليه الجرام سجل أكتر من 3700 خلال أسبوع واحد، وهل الأسعار ممكن ترتفع عن كده ولا في أمل لنزولها الفترة الجاية.. هنقولك كل التفاصيل في الفيديو ده فتابعنا للآخر.

طبعا، أغلبنا تابع أسعار الدهب في الأيام الأخيرة، واللي وصل سعر الجرام 21 لارتفاع قياسي في مصر، وده طبعا حصل لأن أسعار المعدن الأصفر بتتغير بشكل تصاعدي كل يوم، في وقت بدأ فيه كتير يسألوا هو إيه السبب في الزيادة الكبيرة دي؟

بص يا سيدي، أسعار الدهب سواء في مصر أو العالم، بترتفع من بداية سنة 2024 لحد دلوقتي، ووصل سعره العالمي ل 670.73 دولارً للأوقية.

وفي أول يناير سنة 2024، كان سعر الدهب العالمي بيتداول بسعر 2063.73 دولار للأوقية، لحد ما الأسعار وصلت دلوقتي ل 2734.46 دولار للأوقية.

يعني نقدر نقول، إن ارتفاع أسعار الدهب العالمية ارتفعت بما يعادل 33% في أكتر من 10 شهور، وده كان سبب عشان يجذب انتباه المستثمرين للدهب، لأنه الملاذ الآمن للاستثمار وكمان بيعتبر مخزن مستقر لقيمة الفلوس ونقدر نقول إن في عوامل وأسباب بتقف ورا ارتفاع الأسعار، واللي أولها إن نشاط الشراء مرتفع جدا ودا لأن  البنوك المركزية في مختلف أنحاء العالم، بدأت تشتري دهب وتحوط نفسها بيه ضد التضخم أو أي حالة من حالات عدم اليقين الاقتصادي أو الأزمات الاقتصادية العالمية اللي ممكن تحصل في أي وقت.

تاني أسباب ارتفاع أسعار الدهب، هي الضغط الشرائي المستمر من جانب المشاركين الأقوياء في السوق، واللي ساهم بشكل كبير في جنون الأسعار العالمية وانعكست كمان على الأسواق المحلية.

كمان، المستثمرين استغلوا مكاسب الدهب دلوقتي، وبدأو يشتروا كميات محترمة منه، عشان بيعتبر فرصة لتحقيق مكاسب قصيرة وطويلة الأجل.

ومع ارتفاع الأسعار بالسرعة دي، بقى الدهب أصل جذاب للتداول والمضاربة بالإضافة إلى أنه استثمار أكتر أمان وطويل الأجل، عشان كده بيسعى بعض المستثمرين لتحقيق عوائد سريعة من خلال الرهان على زخم صعود الذهب لتحقيق أرباح سريعة.

ضيف على كل ده، إن التوترات الجيوسياسية المستمرة، واللي بينها أحداث الشرق الأوسط الحرب على غزة، بتلعب هي كمان دور مهم في ارتفاع أسعار الذهب.

كمان، ساهم التباطؤ الاقتصادي العالمي والصراعات الدولية، زي النزاعات التجارية في مجال الطاقة، في حدوث تقلبات في السوق العالمية، ودفع المستثمرين للبحث  عن ملاذ آمن في الدهب، ومع كل ارتفاع في حالة عدم اليقين، بتزداد جاذبية الدهب باعتباره أصلاً آمناً، وده بيجذب المستثمرين اللي بيتطلعوا إلى التحوط ضد الانحدارات المحتملة في السوق.

وفي النهاية، كل الأسباب دي دفعت أسعار الدهب للارتفاع أو عدم الاستقرار في الوقت الحالي عالميا ومحليا، بس التوقعات بتقول إن الارتفاع هيفضل مستمر لحد نهاية السنة ومحتمل جدا جرام 21 يوصل في مصر ل 4 آلاف جنيه.

فلو ناوي تشتري دهب، الحق انزل واشتري قبل ما الأسعار تصيبها الجنون من تاني.