بشرة إيني وعودة الشركات العالمية.. ايه اللي بيحصل في قطاع البترول والغاز
الشركات العالمية راجعة تاني ومصر هترجع تنور من تاني في ملف الغاز والبترول في المنطقة.. مين اللي قال كده وازاي مصر هترجع منتج قوي للمواد البترولية.
من ساعات المدير المالي لشركة إيني الإيطالية فرانشيسكو جاتي، طلع وقال إن الشركة هتنفذ أعمال في حقل ظهر في مصر لاستعادة جزء كبير من إنتاج الغاز في بداية 2025 وقالت حاجة مهمة جدا تاني أن وضع الاقتصاد الكلي في مصر بيتحسن ودا معناه إن شركات النفط العالمية هتستأنف نشاطها في المنطقة وفي مناطق تانية في مصر.
كلام الشركة الإيطالية بيرجع الامل تاني في منطقة امتياز حقل ظهر واللي فيها اكتشافات واعدة واللي وقفت فيها اعمال التنقيب بشكل مؤقت بسبب تراكم متأخرات شركات البترول والتنقيب عند الحكومة المصرية وقت ذروة أزمة الدولار والمشكلة دي انحلت خلاص بعد سداد جزء كبير من المستحقات دي وجدولة الباقي يعني الشركات العالمية هترجع تضخ من تاني مليارات الدولارات في عمليات التنقيب.
حقل ظهر وصل فيه إجمالي الاستثمارات 12 مليار دولار لغاية دلوقتى ومن المتوقع يوصل 15 مليار دولار خلال السنين التلاتة الجايين وإن العمل بدأ لحفر البئر رقم 20 بالحقل باستثمارات 70 مليون دولار، ومن المتوقع يوصل إنتاج ظهر بعده إلى 2.3 مليار قدم مكعبة يوميا.
وفي مؤتمر صحفي الشهر اللي فات، قال رئيس الوزراء مصطفى مدبولي إن مصر بتستهدف إعادة إنتاج حقل الغاز الطبيعي إلى مستوياته المعتادة بحلول صيف 2025، بعد التحرك لتسوية متأخرات عليها مع شركات الإنتاج.
الخلاصة والحقيقة المؤكدة إن مصر راجعة بقوة في ملف الغاز والبترول لأكتر من سبب أولها استئناف تنمية حقل ظهر القديم والتنقيب في حقول جديدة في نفس المنطقة وتاني حاجة عمليات التنقيب الضخمة اللي بتم في مناطق تانية على مستوى الجمهورية واللي ظهرت فيها بوادر انتاج ضخمة.
واكيد اي تطور في إنتاج المواد البترولية معناه توفير ملايين الدولارات كل شهر بتستورد بيها الحكومة الغاز والبنزين والسولار من الأسواق الخارجية وفي نفس الوقت غزارة الإنتاج هتيح عودة التصدير من تاني ودا توفير دولار من ناحية ثانية.
