مفاجأة بوتين اللي هتحل مشاكل مصر.. شوف إللي بيحصل في الكواليس
يا ترى إيه اللي بيحصل في العالم دلوقتي؟ وايه حكاية بورصة الحبوب الجديدة؟و مين اللي وراها؟ وازاي هتأثر علينا هنا في مصر؟ خلينا نحلل الموضوع مع بعض ونشوف إيه الفرص اللي قدامنا خصوصا ان البورصة دي مش بس هتبقى للحبوب، بوتين أكد إن مستقبلًا هتضم سلع تانية زي المعادن والمواد الخام. فهل مصر جاهزة تدخل السوق ده وتستفيد منه؟
في قمة بريكس اللي عقدت في مدينة كازان الروسية الرئيس الروسي بوتين فاجئ الجميع بإعلان ضخم عم إنشاء بورصة عالمية للحبوب! طيب ده معناه إيه؟ وهل مصر تقدر تستفيد منها؟
في البداية كده بورصة الحبوب اللي أعلن عنها بوتين في قمة بريكس هدفها مش مجرد تنظيم تجارة الحبوب العالمية لكن كمان إنها تكون منصة جديدة للتحكم في الأسعار والعقود المستقبلية
وده جاي في توقيت حساس جدًا مع الأزمات اللي بتواجهها سلاسل الإمداد العالمية وارتفاع الأسعار اللي بيأثر على كل دول العالم بما فيهم مصر.. ومصر تحديدا لأنها واحدة من أكبر مستوردي الحبوب في العالم وخاصة القمح، وإحنا متعودين نستورد جزء كبير من احتياجاتنا من روسيا وأوكرانيا.. فلو البورصة دي هتقدر تسيطر على أسعار الحبوب، ممكن يكون عندنا فرصة لتأمين إمداداتنا بأسعار مناسبة. وده هيوفر علينا مصاريف كتير، خصوصًا في ظل الأزمات الاقتصادية اللي بنمر بيها.
لكن البورصة دي مش مجرد بورصة عادية. دي كمان هتضم سلع تانية في المستقبل زي المعادن والمواد الخام .. وبوتين قال إن ده هيكون مجرد البداية وإنهم بيخططوا لتوسيع نشاط البورصة عشان تشمل حاجات زي الدهب والغاز الطبيعي والمواد الخام اللي بتعتمد عليها الصناعة.
طب ازاي مصر ممكن تستفيد من التطور ده؟
مصر دلوقتي بتمر بمرحلة مهمة في مجال التصنيع.. وبتحاول تزيد من قدرتها على التصدير وتقليل الاعتماد على الاستيراد. فلو البورصة دي هتكون مكان لتسعير المواد الخام بأسعار مناسبة ممكن ده يساعد الصناعات المصرية إن هي تشتري المواد الخام بتكلفة أقل … وبالتالي هتقدر تنافس في السوق العالمي بشكل أقوى..ده غير إن التصنيع بقا محور تركيز رئيسي في السياسة الاقتصادية المصرية، مع محاولة الدولة تقليل الضغط على العملة الصعبة من خلال التصنيع المحلي
كمان مصر ممكن تستفيد من البورصة دي في حاجة تانية، وهي الصادرات الزراعية.. إحنا دلوقتي بنصدر منتجات زراعية كتير لدول مختلفة، وممكن إن بورصة الحبوب الجديدة تكون بوابة لتوسيع صادراتنا الزراعية لدول بريكس خاصة لو تم التوسع في نوعية السلع اللي بتتداول فيها البورصة زي ما بوتين قال.
والأهم من كده، إن البورصة دي ممكن تقدم فرصة للدخول في عقود مستقبلية بأسعار ثابتة..، وده معناه إن مصر ممكن تضمن أسعار الحبوب لفترات طويلة من الزمن، وده هيساعد في استقرار الأسعار داخل البلد ويقلل من التقلبات اللي بتحصل بسبب الأزمات العالمية زي الحرب الروسية الأوكرانية.
في النهاية لازم نكون عارفين ان إحنا قدام خطوة ممكن تكون نقلة نوعية في مستقبل الاقتصاد العالمي، وبورصة الحبوب اللي أعلن عنها بوتين مش مجرد منصة لتداول الحبوب، لكن كمان هتكون أداة للتحكم في مستقبل السلع الاستراتيجية في العالم
