مفاجأة.. موعد زيادة المرتبات والمعاشات

يا ترى امته الحكومة هتزود المرتبات والمعاشات، وإيه الأسباب اللي دفعتها لاتخاذ هذا القرار، وإيه هي الفئات المستفيدة من الزيادة دي.. هنقولك كل التفاصيل في الفيديو ده فتابعنا للآخر. 
 

واضح كده إن الحكومة بتجهز خبر سعيد للمواطنين وده بعد قرار زيادة أسعار المحروقات، لأن في ناس كتير بتستنى زيادة المرتبات والمعاشات سواء للقطاع العام ولا الخاص.

ومن هنا، قال مجدي البدوي، نائب رئيس الاتحاد العام لنقابات عمال مصر، إن الرئيس عبدالفتاح السيسي مهتم جدا بالأحوال المعيشية للمواطن المصري، ولامس معاناة المواطنين، بسبب موجة الغلاء اللي أثرت على جوانب حياتهم، عشان كده الرئيس أصدر توجيهاته للحكومة بمراجعة برنامج الإصلاح الاقتصادي مع صندوق النقد الدولي، وده بيعكس حرص القيادة السياسية على وضع محدودي الدخل في مقدمة الأولويات.

عشان كده مجدي البدوي رجح بوجود زيادة في الأجور والمعاشات للقطاعين العام والخاص، ومتوقع جدا إن الحكومة تصدر خلال الفترة الجاية حزمة جديدة من القرارات الخاصة بالحماية الاجتماعية، بتتضمن زيادة المعاشات والأجور للقطاعين العام والخاص، بالإضافة إلى تمديد جدول زيادة أسعار المحروقات للفترة المقررة خلال الستة أشهر الجاية.

ولتأكيد المعلومة، اتكلم عبد المنعم إمام، أمين سر لجنة الخطة والموازنة بمجلس النواب، هو كمان عن ميعاد زيادة الأجور والمعاشات والفئات المستفيدة، وقال إن الزيادة الجاية للأجور والمعاشات، ربما يصدر لها قانون استثنائي لتطبيقها بأسرع ما يمكن، وفي الحالة دي فمش شرط الزيادة تكون في بداية السنة المالية، أو العام الجديد.

ورجع مجدي البدوي، وأكد هو كمان، أن الحكومة هتصدر قريبًا حزمة من القرارات الخاصة بالحماية الاجتماعية، في ظل ارتفاع أسعار كتير من السلع نتيجة زيادة أسعار المحروقات، واللي خلا ملايين المواطنين يستنوا ميعاد زيادة الأجور والمعاشات.

ونقدر نقول، إن حزمة الحماية دي هتتضمن علاوة استثنائية في الأجور والمعاشات للقطاعين العام والخاص، بالإضافة لتمديد فترة زيادة أسعار المحروقات لمدة ستة أشهر إضافية.

أما عن ميعاد صرف مرتبات الموظفين عن شهر أكتوبر، فوزارة المالية أعلنت إن وفق الكتاب الدوري رقم 77 لسنة 2024، للعاملين بالوزارات والهيئات والجهات التابعة لها، فهيكون ميعاد صرف مرتبات شهر أكتوبر يوم الخميس الجاي الموافق 24 أكتوبر، وهيستمر صرف المرتبات لمدة 5 أيام، بحيث تنتهي يوم الأربعاء 30 أكتوبر، في حين إن المتأخرات هتُصرف في أيام 7 و8 و9 و10 من شهر أكتوبر برضو.

وأخيرا، نقدر نقول لكل العاملين في القطاع العام أو الخاص، استنوا الزيادة قريب جدا.