تحرك مهم لوقف جنون أسعار الفراخ والبيض.. شوف الحكومة بتعمل إيه ؟

هو ليه اسعار الفراخ والبيض ارتفعت بالشكل الكبيرده ؟؟ وهل فيه حل للأزمة دي ولا خلاص بقت واقع لازم نعيشه؟ وايه التحركات اللي بتعملها الحكومة دلوقتي عشان توقف جنون أسعار الدواجن والبيض؟ وايه سبب الأزمة أصلا ؟

أزمة ارتفاع اسعار الفراخ والبيض مش جديدة.. من فترة طويلة وأسعار الدواجن والبيض بترتفع بشكل ملحوظ.. وده بيأثر على ملايين الأسر المصرية اللي بتعتمد على الحاجات دي في أكلها اليومي

آخر تقرير لبورصة الدواجن بيقول إن سعر كيلو الفراخ تسليم أرض المزرعة وصل لـ 85 جنيه، وده بعد ما كان في الأسبوع اللي فات وصل لـ72  جنيه! يعني الأسعار بتتحرك بسرعة وأغلب الناس مش قادرة تلاحق

طب الحكومة  بتعمل إيه عشان تحل الأزمة دي؟

وزير الزراعة واستصلاح الأراضي علاء فاروق أعلن عن خطة جديدة عشان يسيطروا على الأزمة دي… وكان اول خطوة فيها الاجتماع مع منتجي الدواجن والاتفاق على آليات لضبط الأسعار.. بس اللي حصل إن الاستجابة من المنتجين كانت متفاوتة، يعني مش كلهم التزموا وفيه ناسبدل ما تثبت السعار وفق الاتفاق مع الحكومة زودتها أكتر

وعشان كده الحكومة لجأت لاستيراد البيض المخصب وبيض المائدة كإجراء سريع لزيادة المعروض في السوق.. طبعًا الفكرة هنا إن لما المعروض يزيد، الطلب يقل وبالتالي الأسعار تستقر شوية.. وده فعلاً بدأ يجيب نتيجة..كمان وزير الزراعة أعلن ان سعر الكتكوت انخفض لـ35 جنيه بعد ما كان معدي الـ39 جنيه ودي خطوة مهمة جدًا في رحلة ضبط الأسعار

لكن الحكومة مش ناوية تكتفي بالخطوة دي بس فيه مراقبة مستمرة للأسواق بالتعاون مع وزارة التموين والتجارة الداخلية عشان يضمنوا استقرار الأسعار وتوفير المنتجات بأسعار تناسب المواطن البسيط.. ده غير إن الاجتماعات بين الوزارة ومنتجي الدواجن لسه شغالة بشكل دوري عشان يتابعوا الأسعار وياخدوا إجراءات جديدة لو احتاجوا.

لكن رغم كل ده.. لسه الأسعار مش ثابتة يعني ممكن تروح تشتري الفراخ تلاقي السعر بيوصل لـ90 و95 جنيه في بعض المحافظات

طب هل ده معناه إن الإجراءات دي مش كافية؟

الحقيقة إن المشكلة أعمق من كده،لأن السوق دايمًا بيتأثر بعوامل كتير زي تكلفة الأعلاف وأزمة الاستيراد اللي بتأثر على الإنتاج المحلي والحكومة من ناحيتها بتحاول تزود الإنتاج المحلي وتقلل الاعتماد على الاستيراد لكن ده محتاج وقت وخطة طويلة الأمد وفي نفس الوقت لازم نكون مستعدين لأي تقلبات في الأسعار في الفترات الجاية.

بس الكيد  المواطن البسيط هو اللي بيتحمل العبء الأكبر في الأزمة دي.. ورغم تحركات الحكومة، لسه السؤال الأكبر: هل الإجراءات دي هتكون كافية لوقف ارتفاع الأسعار بشكل مستدام؟ ولا الأزمة هترجع تاني مع أول مشكلة تحصل في السوق؟

هنتابع ونشوف ايه اللى هيحصل الأيام الجاية فى ملف مهم وبيمس حياة كل الناس فى مصر.