بعد ماقرب على 4 آلاف جنيه.. ياترى لسه الدهب استثمار مربح.. شوف المفاجأة
زي ما قلنا هنا كتير في بانكير اكتر من مرة أن الدهب هيركب الصاروخ وفعلا حصل والنهاردة عيار 21 دخل على 3800 جنيه بالمصنعية والضريبة يعني قرب على مستوى حذرنا منه في أوقات كتير وهو 4 آلاف جنيه.. ايه اللي بيحصل في الصاغة والاسعار رايحة على فين وهل ياترى لسه الدهب استثمار مربح.. وانتي نبيع وامتى نشتري.. خليكم معانا للآخر وهتعرفوا التفاصيل في الفيديو ده
طبعا الدنيا مقلوبه في سوق الدهب المصري بعد الارتفاعات القياسية في أسعار كل العيارات بسبب الارتفاع التاريخي في أسعار المعدن الأصفر عالمياً واللي عدت ال2725 دولار في الذروة الارتفاعات ولو استمرت التوترات العالمية هيدخل بقوة على حاجز ال3 آلاف دولار ودا اللي قلناه بردو في بانكير..
طيب وبعدين الأسعار رايحة على فين ؟
شوف حضرتك عشان نبقي عارفين الأسعار في الصاغة المصرية بتمشي مع الأسعار العالمية لأن الصاغة في مصر بيستوردو دهب بالدولار وبالسعر العالمي دا غير الجمارك والرسوم يعني التاجر هيحمل الزبون اللي هو حضرتك الفرق في الزيادة يعني باختصار الأيام الجاية هتكون صعبة في سوق الدهب وهنشوف زيادات كتيرة وقياسية ودا مش توقع لكن حقيقة بتقولها المؤشرات اللي بتأثر في أسعار الدهب عالميا زي استمرار الصراعات الدولية واتجاه البنوك المركزية العالمية لخفض سعر الفائدة وهروب المستثمرين للاستثمار في الملاذ الآمن اللي هو الدهب.
وبالارقام واصلت أسعار الدهب في مصر تحقيق مستويات قياسية مدعومة بمكاسب المعدن الأصفر عالميا مع تراجع الدولار وعوائد السندات الأمريكية، وخفض الفايدة والصراعات في الشرق الأوسط وروسيا واوكرانيا والخبراء شايفين إن التوقعات باستمرار التيسير النقدي والتوجه لخفض أسعار الفايدة في ظل توترات جيوسياسية، دعمت مكاسب الدهب بصورة قياسية من بداية 2024.
طيب لسه الدهب استثمار مضمون ؟
كل الخبراء شايفين ان الوقت الحالي مناسب لشراء الدهب كملاذ آمن على الرغم من الارتفاعات الكبيرة اللي حصلت خلال الأيام اللس فاتت لسعر الجرام في السوق المحلي وإن الوقت لسه مش مناسب للبيع لأن زي ماقلنا لسه الأسعار هترفع لمستويات جديدة.. وكفاية تعرف إن أسعار الدهب في مصر قفزت خلال الكلم يوم اللي فاتوا بحوالي 110 جنيهات، نتيجة ارتفاعات قياسية لسعر المعدن الأصفر بالبورصات العالمية يعني كل جرام في الدهب اللي عندك زاد 110 جنيه في كام يوم.
الحاجة الغريبة في سوق الدهب كانت استمرار الإقبال الكبير من المصريين على شراء الدهب وخاصة السبايك والجنيهات الدهب رغم ارتفاع الأسعار ودا بيدي زخم كبير للسوق وفي نفس الوقت هيشجع الأسعار ترفع اكتر حسب قانون العرض والطلب ودا معناه إن الناس لسه عندها وعي اقتصادي وعرفت أن الأيام الجاية صعبة والنصيحة اللي بيوجهها خبراء الصاغة دلوقتي للمواطنين هي انك تشتري دهب على قد ما تقدر لأن المكسب ممكن يضاعف مع استمرار حركة الأسعار العالمية.
