لو مش عارف خد بالك.. رفع رسوم بعض الخدمات في بنوك مصر

يا ترى إيه اللي بيحصل في البنوك المصرية الأيام دي؟ وليه بعض البنوك بدأت ترفع رسوم الخدمات المصرفية بتاعتها؟ وهل ده هيأثر على تعاملاتك البنكية اليومية؟ ويا ترى البنوك الكبيرة زي البنك الأهلي المصري وبنك مصر والتجاري الدولي هيكون ليهم نفس الموقف؟ والأسعار الجديدة دي هتفضل لفترة طويلة ولا ممكن نشوف زيادات تانية قريب؟ خلينا نعرف أكتر عن الموضوع ونعرف السبب الحقيقي ورا الزيادات دي وتأثيرها عليك كمستخدم للخدمات البنكية في التقرير التالي.

خلال الأيام اللي فاتت، عدد من البنوك المصرية الخاصة قرر يطبق زيادات جديدة على رسوم الخدمات المصرفية.. وبنوك زي البنك العربي الإفريقي الدولي وبنك الأهلي قطر الوطني كانوا من أوائل البنوك اللي رفعت الرسوم على معظم خدماتها.. وده شمل فتح الحسابات وكمان الرسوم الشهرية.. يعني لو انت فاتح حساب في بنك من البنوك دي احتمال تلاحظ إن المصاريف الشهرية أو رسوم فتح الحساب زادت بشكل ملحوظ

على سبيل المثال البنك الأهلي قطر الوطني رفع رسوم فتح الحساب الجاري أو التوفير لأول مرة من 75 جنيه لـ 105 جنيه.. وكمان المصاريف الإدارية اللي بتتدفع كل 3 شهور زادت من 50 لـ 65 جنيه.. غير كده كشف الحساب الورقي الربع سنوي بقى بـ 100 جنيه بدل 75.. ده غير الرسوم اللي بتتفرض لو رصيد الحساب قل عن 3 آلاف جنيه شهريًا

البنك العربي الإفريقي الدولي قرر هو كمان يزود رسوم فتح الحسابات لـ 150 بدل 100 جنيه وكمان زاد كشف الحساب الورقي لكل 3 شهور لـ 150 جنيه بدل 120… وده كله بييجي في إطار زيادة التكاليف التشغيلية اللي البنوك بتتحملها نتيجة التضخم اللي بنشوفه في الفترة الخيرة .

طب ليه البنوك بتزود الرسوم دي؟

الموضوع ليه علاقة بارتفاع تكلفة التشغيل، نتيجة للتضخم الكبير اللي بنمر بيه في مصر..و المسؤولين في البنوك قالوا إنهم مضطرين يعملوا دراسات دورية علشان يشوفوا إذا كانت تكلفة تقديم الخدمات دي بتتناسب مع الرسوم اللي بيتم تحصيلها ولا لأ.. وده معناه إن البنوك بتحاول تعوض الخسائر اللي ممكن تكون بتحصل بسبب زيادة الأسعار على كل المستويات سواء في الكهرباء أو الخدمات التكنولوجية اللي بيقدموها للعملاء.

طب هل العميل العادي هو اللي هيشيل الشيلة كلها؟

البنوك بتحاول تعمل نوع من التوازن في الرسوم اللي بتفرضها.. يعني مثلا الرسوم ممكن تختلف حسب نوع العميل وحجم التعاملات بتاعته مع البنك.. وفي نفس الوقت البنوك بتقدم عروض ومبادرات بتخلي بعض العملاء يستفيدوا من فتح حسابات جديدة بدون مصاريف لفترة معينة

كمان البنوك بتتجه بقوة ناحية التحول الرقمي.. يعني الاعتماد على الخدمات المصرفية الإلكترونية زي الإنترنت البنكي والموبايل بقى أساسي دلوقتي.. وده بيخلي تكلفة التشغيل تقل شوية مع الوقت.. بس برضه التحديثات التكنولوجية اللي البنوك بتعملها مستمر ودي بتاخد جزء كبير من ميزانية البنوك.

وفيه خبر كويس لبعض العملاء، البنك المركزي المصري مد العمل بإعفاء العملاء من المصاريف الخاصة بالتحويلات البنكية اللي بتتم من خلال القنوات الإلكترونية.. وده جزء من رؤية مصر 2030 لدعم التحول الرقمي والشمول المالي.. يعني لو بتستخدم الخدمات الرقمية ممكن تكون مستفيد من الإعفاءات دي وتوفر على نفسك بعض التكاليف.

وخدبالكرفع الرسوم  البنكية جزء من حركة أكبر في السوق المصرفي المصري لأن التضخم وارتفاع التكاليف بيأثروا على كل القطاعات والبنوك مش استثناء.. بس في نفس الوقت العملاء عندهم خيارات وممكن يلاقوا عروض تانية أو يستفيدوا من المبادرات اللي بتطلقها البنوك لتخفيف العبء عليهم.