إزاي تعمل إيداع لفلوسك في البنك من غير فيزا.. شوف الطريقة

ملايين المصريين عندهم حسابات بنكية، وفي كتير مننا بيتردد على البنوك بشكل مستمر عشان يسحب فلوس أو يحطها في الحساب أو يحول لشخص تاني، لكن في فريق تاني بيستخدم التكنولوجيا الرقمية عشان ينجز نفسه وهو في البيت أو الشغل.

وطبعا، البنوك دلوقتي بتوفر مميزات كتيرة عشان تريح عملائها، من ضمنها خمة السحب والإيداع من خلال ماكينات الصراف الآلي ATM بدون فيزا، لأن أي حد معرض جدا ينسى الفيزا بتاعته وهو خارج، عشان كده البنوك سهلتها عليك.

ومن هنا، هنقولك إزاي تعمل إيداع لفلوسك من غير البطاقة الائتمانية أو الفيزا عبر ماكينات ال ATM.

أول حاجة تكون حافظ رقم الحساب البنكي الخاص بك أو كاتبه، بعدين تروح على أي ماكنة ال ATM تكون تابعة للبنك المسجل فيه الحساب.

بعدين، هتقوم باختيار خانة الخدمات بدون بطاقة، وتضغط على زر الموافقة على كافة الشروط والأحكام، وفي الخطوة اللي بعدها هتدخل رقم الحساب البنكي بتاعك، بعد كده هيطلع لك رقم سري مؤقت، هيتبعت لك على رقم تليفونك اللي متسجل عند البنك.

وبعد كل ده، حضرتك هتدخل  الرقم السري المؤقت، والفلوس اللي عايز تعمل لها إيداع في حسابك بكل سهولة، وماتنساش آخر حاجة، وهي إنك تتأكد كويس من رقم حسابك البنكي ومن المبلغ اللي قمت بإيداعه.