لو ناوي تحجز شقة في مشروعات الإسكان الإجتماعي.. لازم تشوف الفيديو ده
ية ترى ليه وزارة الإسكان عدلت حدود الدخل المطلوبة لحجز شقق الإسكان في مشروع سكن لكل المصريين؟ وايه الحدود الجديدة لدخل اي مواطن عاوز يحجز شقة؟وهل الشروط بقت أصعب ولا أسهل؟ طب لو إنت مواطن من أصحاب الدخل المحدود أو المتوسط.. هتقدر تقدم على وحدة سكنية مدعومة؟
مع الإعلان الجديد لصندوق الإسكان الاجتماعي ودعم التمويل العقاري ضمن المبادرة الرئاسية "سكن لكل المصريين"، حصل تعديل مهم جداً في حدود الدخل المطلوبة للمواطنين اللي عايزين يقدموا لحجز وحدات سكنية.. التعديل ده هيفتح الباب لفئات أكبر من الناس إنهم يحققوا حلمهم بامتلاك شقة مدعومة
طب التعديلات الجديدة دي اعتمدت على إيه؟
شريف الشربيني وزير الإسكان والمرافق والمجتمعات العمرانية أعلن إن تغيير حدود الدخل ما حصلش بشكل عشوائي.. لكن بعد دراسة متأنية للأوضاع الاقتصادية وحدود الدخل.. يعني الحكومة بتراعي التغيرات الاقتصادية عشان توسع دائرة الاستفادة للمواطنين المستهدفين وتأكد إنهم يقدروا يتحملوا الشروط الجديدة
وايه التعديلات اللى حصلت على حدود الدخل بقا؟
بص يا سيدي .. طب لو انت من أصحاب الدخل المحدود.. دلوقتي الحد الأدنى لصافي الدخل الشهري بقى 3500 جنيه للتعامل بنظام التمويل العقاري. يعني لو دخلك الشهري أقل من الرقم ده مش هتقدر تقدم على الوحدات.. أما الحد الأقصى لصافي الدخل الشهري فوصل لـ15 ألف جنيه للأسرة و12 ألف جنيه للفرد
أما بالنسبة للي دخلهم متوسط .. التعديلات سمحت ليهم إنهم يقدموا كمان بشروط جديدة و الحد الأدنى لصافي الدخل الشهري بقى 12 ألف جنيه والحد الأقصى وصل لـ25 ألف جنيه للأسرة، و20 ألف جنيه للفرد
التعديلات دي جايه عشان تضمن إن الفئات المستحقة سواء من أصحاب الدخل المحدود أو المتوسط يقدروا يستفيدوا من المبادرة دي ويمتلكوا شقة ضمن الطرح الجديد.. وده كمان مش مجرد تعديل في الورق لكن خطوة مهمة لتحقيق الهدف الفعلي للمبادرة الرئاسية اللي هي توفير سكن ملائم لكل المصريين
اللى حصلده معناه ان الحكومة مش بس بتوفر الوحدات.. لكن كمان بتدرس الأوضاع الاقتصادية بشكل دقيق جداً.. وبتعدل الشروط بحيث إنها تناسب الفئات اللي فعلاً محتاجة الدعم ده… الميزة دلوقتي بقا فيه مساحة أكبر للناس إنهم يقدموا بعد ما كانت بعض الفئات مش قادرة توصل للدعم بسبب الشروط القديمة.
انت بقا ايه رأيك فى التعديلات الجديدة دي؟ و هل شايف إنها هتسهل عليك أو على ناس تعرفهم إنهم يحصلوا على شقة مدعومة؟
قولنا رأيكفى التعليقات وهنتابع معاكم اى جديد فى الملف ده
