ليه المستثمرين بيهجروا أذون الخزانة وبيجروا على السندات؟.. إيه اللى بيحصل في “سوق الدين”؟
يا ترى إيه اللي بيحصل في سوق الدين المصري؟ وليه المستثمرين بدأوا يحوّلوا استثماراتهم من أذون الخزانة لسندات الخزانة؟ وهل السندات بقت هي الملاذ الآمن الجديد؟ وإيه أصلا الفرق بين الأذون وسندات الخزانة؟ وهل استمرار الإقبال على السندات هيغير شكل سوق الدين في الفترة الجاية؟ وهل هنشوف تغيرات تانية في الفوائد؟.. فى الفيديو ده هنتكلم عن السر ورا الإقبال المتزايد على سندات الخزانة المصرية على حساب الأذون، ونوضح الفرق بينهم وتأثير الحركة دي على السوق.
في الفترة الأخيرة بقا فيه اقبال كبير على سندات الخزانة المصرية خصوصا اللي مدتها سنتين أو تلاتة…و الطلبات على السندات دي في المزادات الأخيرة وصلت لأربع أو خمس أضعاف القيم المطلوبة من وزارة المالية.. يعني ببساطة، فيه ضغط كبير من المستثمرين على السندات دي.
ومن بداية الشهر ده وفى 3 مزادات متفرقة تراجع العائد على سندات الخزانة أجل 3 سنين تراجع بحوالي 0.5% .. على العكس أذون الخزانة أجل 91 يوم الفايدة عليها زادت بحدود 11 نقطة أساس في نفس الفترة ووصلت لـ 29.66% في أحدث مزاد
طب ليه المستثمرين بيحوّلوا من الأذون للسندات؟
الموضوع ببساطة إن فيه توقعات كبيرة إن البنك المركزي المصري هيخفض أسعار الفايدة على الجنيه قريب.. فالمستثمرين بيفكروا بشكل استراتيجي وبدل ما يستثمروا في أذون قصيرة الأجل بفائدة عالية دلوقتي بيدوروا على سندات طويلة الأجل بفائدة ثابتة لفترة أطول.. يعني بيحاولوا يستغلوا الفايدة العالية قبل ما تتراجع.. ده كمان دفع بعض المستثمرين لتسييل استثماراتهم في الأذون خصوصا الأذون اللي استحقت في سبتمبر وضخها في سندات الخزانة. والهدف هو تأمين فايدة مرتفعة لمدد أطول.
وايه الفرق بين السندات وأذون الخزانة؟
أذون الخزانة هي أدوات دين قصيرة الأجل مدتها بتتراوح من 3 شهور لـ سنة.. لكن سندات الخزانة مدتها بتكون أطول ممكن توصل لـ 5 أو 10 سنين..و ده معناه إن الأذون بتديك فايدة سريعة لكن السندات بتضمن لك دخل ثابت لفترة أطول.. وفي المزادات الأخيرة البنك المركزي طلب اكتتابات في سندات الخزانة أجل 3 سنين بقيمة 30 مليار جنيه.. لكن اللي اتقدم عليه طلبات وصلت لـ 213.3 مليار جنيه.من الطلبات دي، المركزي وافق على اكتتابات بقيمة 77 مليار جنيه بس .. وده بيوضح حجم الإقبال الكبير
والمستثمرين سواء كانوا محليين أو أجانب شافوا إن السندات بقت أكتر استقرار وأمان على المدى الطويل.. وده اللي خفض العائد عليها بنحو 1% في الفترة الأخيرة لتصل لـ 24.3% بدل 25.33%.
طب ايه توقعات سوق الدين الفترة الجاية؟
مصر لو رجعت على مؤشر “جي بي مورغان" للسندات الغالب إن السندات أجل 3 سنين هتكون في المقدمة لإنها دلوقتي بتستوفي شروط الإدراج من حيث حجم الطلب والتوسع في إصدارها.. وحاليا المشهد في سوق الدين المصري واضح.. المستثمرين بدأوا يتجهوا لسندات الخزانة لضمان فايدة طويلة الأجل في وقت متوقع فيه تراجع الفائدة على الجنيه.
