لو اتشالت من التموين بسبب سرقة الكهرباء.. هنقولك ترجع إزاي

 
في ناس كتير اتشالت من منظومة الدعم سواء سلع تموينية أو دعم أسمدة بسبب محاضر سرقة الكهرباء او انهم كانوا منورين بيوتهم بنظام الممارسة... يا تري هل الناس دي هترجع لمنظومة الدعم تاني ولا خلاص كده..  اية هيا خطوات عودتهم لمنظومة الدعم

طبعا كلنا عارفين أن الدولة أخدت قرارات فعلية لمواجهة ظاهرة ارتفاع نسبة الفقد الكهربائي علي الشبكة الموحدة للكهرباء، وانتهاء ظاهرة سرقة التيار خصوصا أن ظاهرة سرقة التيار وصلت لربع الطاقة اللي بتنتجها محطات توليد الكهرباء، ودي نسبة كبيرة جدا لما دولة يكون ربع إنتاجها من الطاقة بيروح في السرقة .
طيب ازاي الدولة واجهت ظاهرة سرقة الكهرباء في الأحياء والمحافظات ؟.
الدولة بدأت تنفذ خطة انتهاء سرقة التيار الكهربائي واستعانت بأجهزة شركات كتيرة علشان تنتهي أزمة سرقة التيار الكهربائي، وبدأت كمان تركب عدادات كودية للناس اللي مخالفين لقرارات مجلس الوزراء بتركيب عدادات كودية للبيوت اللي لسه ما صدرش لها قرارات تصالح أو أنها يتم إزالتها. كان بتستخدم الطيار بنظام الممارسة أو انهم كانوا بيسرقوا كهرباء من الخطوط اللي ماشية في الشوارع، ده غير كمان أن بيوت كتيرة وضعها قانوني لكن للاسف كانوا سارقين كهرباء واستخدموا وصلات من ورا العدادات ودول كلهم الدولة وقعت عليهم عقوبات وصلت قيمتها لأكثر من مليار جنية حاليا .

مش كده بس لا ده كمان الدولة واجهت ظاهرة سرقة الكهرباء ووقعت الدعم الحكومي سواء كان دعم تمويني أو دعم للأسمدة للناس اللي كانت سارقة كهرباء من الفلاحين والمزارعين، دي غير توقيع عقوبات مالية كبيرة عليهم وإجبارهم علي تركيب عدادات كودية، ووصل اجمالي العدادات اللي ارتكبت لحد دلوقتي ل 340 الف عداد كودي، دي غير كمان أن الدولة رفعت عليهم أسعار شرائح الكهرباء ولقي لهم طريقة حساب مختلفة عن باقي الناس ، وبقي في نظامين لطريقة التعامل اولا الناس الملتزمين اللي مش بيسرقوا كهرباء ودول بيتم التعامل معاهم بنظام الشرائح واللي بيوصل سعرها في الشريحة الأولى واللي هيا من صفر كيلو وات إلى 50 كيلو وات بسعر 68 قرشا .

أما بقي الناس اللي كانت بتسرق كهرباء فدول لهم طريقة حساب واحدة وهيا سعر موحد لكل كيلو وات سعرهم وسعر الكيلو بيوصل ل 2 جنية و 14 قرش وده سعر التكلفة اللي الدولة بتنتج ليها التيار الكهربائي.
طيب هل الدولة هترجع الناس اللي اتحذفت من من منظومة  الدعم سواء دعم تمويني أو دعم أسمدة للمزارعين والفلاحين ؟.
ايوة طبعا الدولة أعلنت عن طريقة واحدة لكل الناس اللي كانوا بيسرقوا كهرباء، وهيا أنهم يقدموا علي المنصة الموحدة لخدمات الكهرباء او من خلال شركات توزيع الكهرباء لتركيب عدادات كودية أو انهم يقننوا وضعهم  وبعد التقنين وتركيب العدادات وزارة الكهرباء والطاقة المتجددة هتبعت قائمة بأسماء الناس اللي ركبت عدادات لوزارة التموين والتجارة الداخلية علشان ترجع تشغل لها بطاقات التموين وبرجعوا يستفيدوا من منظومة الدعم زي زمان وبشكل طبيعي، وكمان هتبعت نفسهم القائمة لوزارة الزراعة واستصلاح الأراضي علشان ترجع الناس الفلاحين منهم لمنظومة صرف الأسمدة للفلاحين والمزارعين منهم ويقدروا يصرفوا أسمدة بشكل طبيعي ومنتظم زي زمان برضوا .