دولارات بالكوم من الصين.. شوف وزير السياحة بيعمل إيه هناك

 
مصر هتعمل عظمة من الصين، والدنيا هتتغير خالص وفي باب دولاري مهم هيدخل لمصر من بلاد التنين.. يا تري اية الحكاية.. 
 

شريف فتحي وزير السياحة والآثار حاليا في زيارة مهمة جدا للصيف لبحث فرصة زيادة الحركة السياحية الوافدة لمصر من هناك، خصوصا أن الصين واحدة من الأسواق المهمة جدا لمصر، ومصر بتستقبل منها أعداد كبيرة جدا من السائحين اللي بينزلوا  علشان يقضوا الإجازات.

معروف من زمان ان السائح الصيني عاشق للسياحة المصرية. خصوصا السياحة الثقافية، والسياحة الثقافية دي هيا اللي بتقوم علي زيارة الآثار والمناطق الأثرية، وطبعا مصر معروفة إنها بلد اثرية من الطراز الأول، وفيها اول متحف مفتوح في العالم في محافظة الأقصر،  وحجم آثار هو الأكبر في العالم ده غير أماكن سياحية وترفيهية وشاطئية كتيرة ده غير جوها المعتدل طول السنة .

مصر حاليا بتشارك في المعرض السياحي الدولي اللي تم افتتاحه في العاصمة الصينية بكين، والمعرض ده هيحضره عدد كبير من الدول والشركات ومنظمي والرحلات والناس اللي مهتمة بالسياحة والسفر حوالين العالم، ودي بتكون فرصة كويسة علشان مصر تعرض المنتجات السياحية الموجودة عندها خصوصا المنتجات اللي السائح الصيني بيدور عليها وهيا طبعا السياحة الثقافية .

في السنة دي مصر بتشارك بجناح ضخم في المعرض السياحي الدولي في الصين ومصمم على هيئة معبد بشكل معاصر ومزود بشاشات عرض كبيرة لعرض الأفلام الترويجية واللي بتبرز ثراء وتنوع المنتجات السياحية في مصر، وبتشارك فيه 14 فندق وشركة سياحية مصرية ده غير شركة مصر للطيران.
مصر حالياً بتحاول بكل الطرق أنها تستغل التشغيل التجريبي اللي تم للمتحف المصري الكبير واللي كان بتشغيل 12 قاعة مختلفة في المتحف من قاعات العرض الرئيسية واللي فيها 14 الف قطعة أثرية مختلفة من كل العصور ودي قطع اثرية الدولة جمعتها من كل المتاحف ومن مخازن الآثار، والتركيبة دي من الآثار وجودها مع بعض عامل عظمة في سيناريو العرض المتحفي .

كل اللي بيحصل دلوقتي واللي لسه هيحصل بعدين من الترويج السياحي لمصر في كل دول العالم هدفه حاجة واحدة بس وهيا جذب أفواج سياحية من كل دول العالم خصوصا أن الدولة بتحاول تزود عدد السائحين اللي بيزوا مصر كل سنة بعد التانية وطبعا زيادة عدد السائحين ييزيد معاه عدد الليالي السياحية وبتزيد معاه قيمة الإيرادات الدولارية.