صدمة في سوق الدهب.. أسعار تاريخية والجاي أصعب

فاكرين لما قلنا هنا في بانكير إن أسعار الدهب هتولع في أواخر 2024 ولغاية بدايات 2025.. اهو اللي خفنا منه حصل.. لو عاوز تعرف ايه اللي جرى في سوق الدهب في الساعات الأخيرة ومصير الأسعار في مصر وافضل وقت للاستثمار يبقي شوف الفيديو ده للآخر 
 

زي ما قلنا قبل كده إن الدهب سلعة حساسة من ناحية أي توتر أو قلق يحصل في الأسواق العالمية سواء ناتجة عن كوارث طبيعية أو أوبئة أو توترات سياسية وعسكرية والحروب الاقتصادية ودا لسبب بسيط جدا وهو أن البنوك المركزية العالمية والشركات الكبرى وحتى الأفراد بيعتبروا الدهب حصن منيع ضد أي خسارة محتملة في الأسواق أو العملات وخاصة الدولار لأن أغلب احتياطيات النقد الدولية بالعملة الأمريكية  وهنا اللي بيحصل هجوم جماعي وفي وقت واحد على شراء الملاذ الأصفر الآمن والنتيجة طبعاً ارتفاعات قياسية في الأسعار ودا حضرتك اللي حصل.

طيب هو ايه اللي حصل في كام ساعة الأخيرة ؟
اللي حصل إن أسعار الدهب قفزت في تعاملات الجمعة لمستوى تاريخي بمعني إنه أول مرة في تاريخ سوق الدهب العالمي السعر يوصل مستويات 2714 دولار ودا حصل رغم  قوة الدولار الحالية وتحسن البيانات الأمريكية واللي المفروض دي مؤشرات تهبط أسعار الدهب لأن الدولار ماشي عكس الدهب على طول الخط لكن لأول مرة بردوا المعدن الأصفر يزيد في وقت الدولار بعافيته والخبراء فسروا دا  بسبب حالة عدم اليقين في الأسواق العالمية  والتخوفات الحالية في الأسواق المالية بسبب الصراعات العالمية اللي بتزيد وبتتسع كل يوم عن التاني.

فيه سبب تاني تزامن مع كل العوامل اللي قلناها وهو تخفيض البنك المركزي الأوروبي لسعر الفيئدة على الودائع بمقدار 25 نقطة أساس للمرة التالتة السنة دي .. طيب ايه علاقة سعر الفائدة الدهب ؟.. طبعاً فيه علاقة عكسية قوية بينهم لأن سعر الفايدة لما ينزل يبقي سعر الدهب هيزيد لأن الاستثمار وقتها في البنوك مش بيكون افضل حاجة وعشان كده جزء من المدخرات البنكية بتروح للاستثمار في الدهب ودا بيزود الطلب على المعدن النفيس واللي هو بطبعه معدن نادر ودا غير إن فيه مشاكل عالمية في عملية استخراجه دلوقتي.

طيب إيه تأثير ده على الصاغة المصرية ؟
اكيد طبعا السوق المصري مرتبط بالسوق العالمي ودا لأنه بيتم استيراد جزء من الدهب من الخارج وبالدولار طبعا ومع ارتفاع سعر المعدن الأصفر عالميا سعره في مصر هيزيد ودا اللي أكده هاني ميلاد رئيس شعبة الدهب والمجوهرات بالاتحاد العام للغرف التجارية، واللي قال إن الارتفاع الحالي كان متوقع من خلال التداولات في الفترة اللي فاتت وكان الجميع مترقب وصول الدهب لقمة جديدة يستقر عندها لفترة ثم يعود للصعود مرة تانية إذا استمرت الظروف التي أدت لهذا الارتفاع قائمة.

 رئيس الشعبة قال كمان إنه بالفعل انعكس ارتفاع السعر العالمي على السعر المحلي وسجل سعر 3675، للجرام عيار 21 صباح اليوم الجمعة، لأن الدهب لغاية دلوقتى هو الملاذ الأكثر أمانا وتحقيقا للنمو.
طيب ايه وبعدين الأسعار هتروح لغاية فين؟
ببساطة لو استمرت حالة التوتر في العالم واستمر اتجاه بنك الاحتياطي الفيدرالي الأمريكي والبنوك المركزية العالمية في تخفيض سعر الفايدة فدا معناه الدهب هيفضل يزيد وممكن يوصل 3 آلاف دولار ودا معناه قفزة في الأسعار عندنا وقلنا قبل كده عيار21 ممكن يعدي ال4 آلاف جنيه ويقرب من 5 آلاف كمان.
وأخيرا لو مش عارف تعمل ايه.. فلو هتسمع كلامنا لسه الفرصة موجودة وتقدر تشتري دلوقتي دهب وتشيله لغاية ما يوصل ذروة الارتفاع وبعدها تبيع.