هو “ورق الفويل” ممكن يعمل أزمة في الدولار فعلا؟.. هنقولك الحقيقة بالكامل ف الفيديو ده

إيه رأيك لو قلت لك إن سبب أزمة الدولار في مصر مش المشاريع القومية الكبيرة زي العاصمة الإدارية، ولا الكباري، ولا حتى البرج الأيقوني؟ طيب إيه رأيك كمان لو عرفت إن الأزمة دي سببها حاجات بسيطة زي ورق الفويل والشيكولاتة وأكل الكلاب وأدوات التجميل ؟ طب إيه اللي يخلي دول تانية تاخد قروض زي مصر لكن من غير ما يحصل عندها أزمة في العملة الصعبة؟ وإزاي بقى المشاريع اللي بتتعمل دي هتجيب عائد كبير جدًا في المستقبل وهتكون سبب في إن الاقتصاد المصري يتعافى؟ .. في الفيديو ده هنعرف كل تفاصيل الموضوع

ناس كتير بترجع سبب ارتفاع سعر الدولار في مصر للمشاريع القومية الكبيرة اللي اتعملت خلال السنين اللي فاتت، زي العاصمة الإدارية الجديدة، والكباري، والبرج الأيقوني وغيرهم من المشروعات المهمة .. لكن الحقيقة مختلفة تمامًا! الأزمة مش بسبب المشاريع دي، لأن ببساطة المشاريع دي على المدى الطويل هتكون مصدر دخل كبير للبلد.. وكمان الدولة تقريبا مصرفتش عليها ولا مليم من الموازنة العامة لحد دلوقتي

طب لو الموضوع  كده فعلا زي ما بنقول .. إيه اللي بيحصل بالظبط؟ وإيه سبب ازمة الدولار عندنا؟ 
اللي حصل إن الأزمة دي جاية من استيراد سلع غير ضرورية زي ورق الفويل، والشيكولاتة، والعطور، ومزيلات العرق وأدوات التجميل وأكل الكلاب ..  أيوة حاجات بسيطة زي دي .. لكن بتستهلك كميات ضخمة من الدولار، وده واحد من  الأسباب الأساسية لارتفاع سعر العملة.. لأننا بنصرف فلوسنا على استيراد منتجات مش أساسية في حياة الناس وده بيزود الضغط على الاحتياطي النقدي الأجنبي بتاعنا.. وبد ما الدولار يتم توفيره لاستيراد أكل وأدوية بيتم نزيفه فى حاجات ممكن بسهولة الاستغناء عنها

طيب لو المشاريع القومية الكبيرة مش السبب، ليه في دول كتير بتاخد قروض من المؤسسات الدولية ومع ذلك محصلش عندهم أزمة دولار؟

السر هنا في إدارة الموارد.. الدول دي بتستثمر القروض في مشروعات إنتاجية سريعة العائد.. زي الصناعات التصديرية أو البنية التحتية اللي بتخدم الاقتصاد بشكل مباشر وسريع

وفي مصر.. المشاريع القومية اللي اتعملت مشروعات ضخمة وطويلة الأجل.. بمعنى إنك مش هتشوف عائدها في نفس اللحظة.. العاصمة الإدارية الجديدة، مثلًا.. دي مدينة جديدة بتتعمل من الصفر وده مشروع ضخم جدًا وهياخد وقت علشان يجني ثماره.. لكن في النهاية هيكون ليه عائد ضخم على الاقتصاد لأنه هيجذب استثمارات ضخمة ويوفر فرص عمل كتير ومن خلاله الدولة حولت التراب حرفيا لدهب والصحرا اللى محدش كان ممكن يفكر فيها شوف سعر المتر هناك كام دلوقتى .. ونفس الكلام ينطبق علىكتير من  المشاريع التانية زي الطرق والكباري اللي هتحسن حركة التجارة والنقل جوه البلد.

المشاريع دي مش مجرد مباني وشوارع.. دي استثمارات للمستقبل.. والدول الكبيرة زي الصين والإمارات اتبنت بنفس الطريقة..  استثمروا في البنية التحتية..  وفي الأول كان فيه انتقادات كتير لكن دلوقتي بنشوف النتايج اقتصادهم بيتوسع وبيتطور بسرعة وبينمو بمعدلات غير مسبوقة .. وده اللى متوقع يحصل للاقتصاد المصري فى الفترة الجاية 
معنى كده ان موضوع السلع غير الضرورية ده هو سبب أزمة نقص الدولار فعلا؟ 
تعالى اقولك شوية أرقام عن حجم صادرات بعض السلع دي وانت احكم بنفسك.. بص يا سيدي 
مصر استوردت عطور ومزيلات عرق بـ440 مليون دولار ومستحضرات تجميل بحوالي 500 مليون دولار وحقائب يد بـ200 مليون دولار وشوكولاته بنحو 400 مليون دولار..كمان استوردت سيراميك بـ235 مليون دولار وورق فويل بـ500 مليون دولار وجبن بمليار و200 مليون دولار وسيارات بنحو 25 مليار دولار
طبعا دي عينة بسيطة من السلع اللى ممكن يتم الاستغناء عنها او استبدالها بسلع ومنتجات محلية ونوفر مليارات الدولارات اللى بنستنزفها في استيرادها
في النهاية لازم تكون عارف ان الأزمة مش جاية من المشاريع الكبيرة اللي اتعملت واللى لسه بتتعمل .. الأزمة جاية من إننا بنستهلك الدولار في حاجات غير ضرورية زي ورق الفويل والشوكولاتة وغيرها..  لكن المشاريع اللي اتعملت دي حتى لو العائد بتاعها مش باين دلوقتي هتكون سبب في نهوض الاقتصاد المصري على المدى الطويل.. وده اللي لازم نفكر فيه واحنا بنتكلم عن أزمة الدولار إن الحل مش في إيقاف المشاريع الكبيرة لكن في إدارة أفضل لمواردنا واستثماراتنا.

السؤال المهم دلوقتي..  هل إحنا مستعدين نغير نمط استهلاكنا ونتجه للأهم بدل ما نفضل نصرف فلوسنا على الكماليات؟ .. ده هو التحدي اللي لازم كلنا نخوضوا ونقف جنيا بلدنا لغاية ما نعدي الأزمة