لو عايز قرض شخصي.. شوف الفايدة بتوصل لكام في أكبر 4 بنوك في مصر
القروض واحدة من الخدمات اللي بتقدمها البنوك للعملاء واللي بتختلف أنواعها وفقا لرغبة العملاء.. وطبعا كل قرض له فايدة مختلفة عن القرض الثاني.. لو عايز تعرف الفايدة علي اهم القروض اللي بتقدمها القروض شوف الفيديو ده للاخر.
البنوك الموجودة في مصر بتقدم أنواع كتيرة جدا من القروض واحدة من القروض دي هو القرض الشخصي، واللي بتختلف نسبة والفايدة الموجودة عليه من بنك للتاني، وطبعا الشروط كمان بتختلف من شخص للتاني سواء كان موظف حكومة أو قطاع خاص أو اعمال حرة، وكل واحد من دول له شروط غير التاني يعني الشروط اللي مطلوبة منك هتكون مختلفة عن الشروط اللي مطلوبة من غيرك.
لو انت حد من العملاء اللي عايز تاخذ قرض شخصي من اي بنك، فاول سؤال هيجي في بالك اية هيا شروط البنك لتقديم القرض، والفايدة علي القرض كام، وكمان مده سداده بتوصل لكام سنة.
من غير ما تلف ولا تحتار انا دلوقتي هجاوبك علي اهم سؤال في دماغك وهو الفايدة علي القرض الشخصي بتوصل لكام، خصوصا اننا داخلين علي اجتماع لجنة السياسات النقدية للبنك المركزي واللي علي اساسها هتحدد اسعار الفايدة هتبقي كام من أكبر 4 بنوك في مصر والبداية هتكون من البنك التجاري الدولي cib واللي حدد الفايدة على القرض الشخصي من 27% إلى 36%، وبفترة سداد بتوصل لـ8 سنين وبتبدأ قيمة التمويل من 3000 جنيه ولحد 3 مليون جنيه، وبحد أدنى لصافي الراتب للعميل لـ 2600 جنيه بضمان الراتب الشهري، و10 آلاف جنيه بضمان الأعمال الحرة للناس اللي مش موظفين في الحكومة .
من البنك التجاري الدولي cib بنروح معاكم للبنك الزراعي المصري واللي حدد نسبة الفائدة على القرض الشخصي بنسبة 24% متناقصة، وبفترة سداد بتوصل لحد 10 سنين، وبقيمة تمويل بتوصل لـ 1.5 مليون جنيه.
ولسه مكملين معاكم جولتنا ومن البنك الزراعي المصر بنروح لبنك القاهرة واللي حدد نسبة الفائدة على القرض لبشخصي المخصص لموظفي البنوك بنسبة بتوصل لـ 21.5% سنويا، وبيوصل الحد الأدنى للقرض لـ 5000 جنيه، وفترة السداد بتوصل لـ 12 سنة.
ومن بنك القاهرة بنروح للبنك الأهلي المصري واللي حدد نسبة الفائدة على القرض الشخصي لـ29.75% متناقصة، وبفترة سداد بتوصل لـ 12 سنة، وبقيمة تمويل بتوصل 2.5 مليون جنيه بضمان تحويل الراتب، و3 مليون جنية بضمان تحويل مكافاة نهاية الخدمة.
طيب اية هيا شروك الحصول علي قرض شخصي من البنوك؟.
تقريبا الشروط اللي البنوك حدتها لتقديم القرض الشخصي متقاربة كلها، واغلبها البنوك بيتشرط أن يكون الحد الأدنى لدخل العميل بيبدأ من 1000 جنيه، ويكون سنه ميقلش عن 21 سنة، ولازم العميل يقدم صورة بطاقة الرقم القومي وتكون سارية، وكمان يقدم خطاب من جهة العمل لتوضيح تاريخ التعيين والدخل الشهري، وتعهد من الجهة اللي شغال فيها بسداد القسط البنكي لحد انتهاء عملية السداد.
