إيه حكاية الممر الاقتصادي بين أوروبا والخليج.. مصر هتستفاد ايه

ايه حكاية الممر الاقتصادي والمالي بين الخليج العربي وأوروبا وياترى مصر هتستفيد ازاي منه .. وإزاي ممكن يكون ممر لمليارات الدولارات للاقتصاد المصري.. هنعرف كل التفاصيل في الفيديو ده خليكم معانا للآخر.

 
لو متابعين على مدار الساعات الأخيرة كان فيه قمة مهمة بين قادة دول الخليج وقادة أوروبا ودا لبحث التعاون الاقتصادي والمالي والسياسي بين الطرف وزي ما احنا عارفين إن الخليج العربي من أغنى مناطق العلم بسبب إنتاج الطاقة وخاصة المواد البترولية واللي بتعتمد عليها الثورة الصناعية الأوربية بشكل أساسي وعشان كده أوروبا مصرة تعمل تعاون اقتصادي كبير واستراتيجي مع دول الخليج العربي.

واخر حاجه أعلنت عنها رئيسة المفوضية الأوروبية العليا على هامش القمة إنه هيكون فيه ممر اقتصادي بين دول الخليج العربي وقارة أوروبا كلها ورئيسة المفوضية قالت نصا ان الاتحاد الأوروبي  واللي بيصم 27 دولة بيسعى لتعزيز التعاون مع دول مجلس التعاون الخليجي وبناء ممر اقتصادي لزيادة التجارة في الطاقة المتجددة والبيانات، إضافة لرفع التبادلات التجارية بين شعوب التكتلين.

طيب إحنا مالنا بالموضوع دا ومصر هتستفاد ايه؟
لو بصيت على خريطة مصر هتعرف إن مصر هتستفاد كويس جدا من موضوع الممر الاقتصادي الأوروبي الخليجي وده لان كل المنتجات والبضائع اللي رايحة جاية بين الطرفين هتعدي من قناة السويس وهتستخدم كمان المواني المصرية على البحر الاحمر والمتوسط وفيها موانئ محورية ووسيطة يعني بتقدم خدمات التفريغ والتخزين وإعادة الشحن للدول سواء في أوروبا أو الخليج ودا كله فلوس وبالدولار ولو هتقولي إن قناه السويس فيها أزمة دلوقتي هقول لحضرتك أن الأزمة مؤقتة ومصيرها تخلص ومفيش غنى عن قناة السويس اطلاقا لأنها بتختصر المسافة بين أوروبا والخليج وملهاش بديل.

وعشان تعرف قد ايه الممر الاقتصادي الجديد دا مهم جدا لمصر شوف الأرقام بتقول ايه.. تخيل أن حجم التبادل التجاري بس بين دول الخليج العربي وأوروبا بيوصل ل460 مليار دولار عبارة عن بترول وغاز ومنتجات طالعة ونازلة من قناه السويس وناقلات النفط تحديدا بتعتبر هي عصب الملاحة في قناة السويس ولما الرقم دا يزيد يبقي أكيد إيرادات قناة السويس هتزيد ومعاها إيرادات المواني المصرية دا غير حاجة تانية مهمة وهي إن مصر بحكم موقعها الجغرافي الفريد ممكن تدخل في المستقبل ضمن الممر الاقتصادي الجديد وهنا الاستفادة هتكون مضاعفة خاصه إن فيه اتفاقية تعاون وشراكة استراتيجية تم توقيعها قريب بين مصر والاتحاد الأوروبي ودا بيدي مصر ميزة إضافية.

البنية الأساسية اللي أتعملت في مصر في السنين الأخيرة بترشح مصر للدخول في أي تكتل وتكامل اقتصادي مهما كان حجمه زي ما حصل كده في تجمع بريكس واللي مصر هتكون فيه همزة الوصل بين المنطقة الشرقية في العالم وبين افريقيا وزي اللي هيحصل كده لو مصر قررت تدخل الممر الاقتصادي الأوروبي الخليجي الجديد وتحقق أكبر استفادة منه.