الليلة كبيرة.. تفاصيل جديدة في صفقة تشغيل المطارات

من كام يوم رئيس مجلس الوزراء الدكتور مصطفي مدبولي اتكلم وقال إن الدولة هتبدأ تطرح ادراة وتشغيل المطارات قدام القطاع الخاص.. ياتري اية حقيقة الكلام ده وازاي القطاع الخاص هيشتغل في المطارات.. خليكم معانا للأخر وهتلاقو تفاصيل كتير.

الدكتور مصطفي مدبولي رئيس مجلس الوزراء طلع من كام يوم وقال أن الدولة مكملة خطة الاصلاح الاقتصادي والتخارج من بعض القطاعات الخاصة علشان تدخل فرصة للقطاع الخاص للدخول للاستثمار في القطاعات دي وتحويلها لأماكن بتكسب وبتدخل فلوس في الخزينة العامة للدولة المصرية، خصوصا أن في نسبة كبيرة من القطاعات العامة في الدولة للاسف بتحقق خسائر.
الدكتور مصطفي مدبولي كمل كلامه وقال ان ضمن الحاجات المطروحة لدخول القطاع الخاص في ادارتها وتشغيلها هيا المطارات، وفعلا عمل اجتماع مع مؤسسة التمويل الدولية للحلول الشاملة ودي اللي الحكومة تعاقدت معاها كمستشار استراتيجي لبرنامج الطروحات الحكومية، علشان يناقشوا خطة تطورات دخول القطاع الخاص في إدارة وتشغيل المطارات .

رئيس الوزراء قال كمان أن الدولة عازمة علي مشاركة القطاع الخاص كشريك للحكومة في إدارة وتشغيل المطارات لتنفيذ الخطة اللي حطتها الدولة لزيادة الطاقة الاستيعابية للمطارات واستهداف جذب المزيد من السائحين لمصر خلال المرحلة اللي جاية .

طيب اية هيا المطارات اللي القطاع الخاص هيدخل في تشغليها وإدارتها؟.

في البداية كده لازم نعرف أن مصر عندها 24 مطار متنوزعين علي معظم محافظات ومدن الجمهورية بما فيها المطارات اللي تم افتتاحها مؤخرا زي مطار سفنكس والعاصمة الإدارية الجديدة وغيرها من المطارات التانية واللي فعليا موجودة في الخدمة بما فيهم المطار الأكبر والأهم وهو مطار القاهرة الدولي وده المطار الرئيسي للدولة المصرية.
رئيس مجلس الورزاء في الأجتماع اللي عمله مع مؤسسة التمويل الدولية، استلم من المؤسسة  دراسة فنية وجدول زمني لطرح إدارة وتشغيل 20 مطارا في مصر، وهتكون متاحة قدام القطاع الخاص منهم 4 مطارات جداد من الدولة اللي بنتهم مؤخرا.

الخطة الجديدة اللي مؤسسة التمويل الدولية اللي الحكومة تعاقدت معاها كمستشار استراتيجي لبرنامج الطروحات الحكومة بتستهدف من دخول القطاع الخاص في إدارة وتشغيل المطارات الوصول بعدد الركاب لـ 72.2 مليون راكب في نهاية السنة اللي جاية مع بدء تنفيذ الخطة، ده مقارنة بـ 66.2 مليون راكب حققتهم مصر في السنة اللي فاتت، والخطة بتستهدف الوصول لـ110 مليون راكب مع في نهاية عام  2030، والمؤسسة انتهت من الدراسة الفنية لطرح دخول القطاع الخاص في إدارة وتشغيل المطارات، وسلمت الحكومة الجدول الزمني لخطة الطرح، وحاليا الخطة موجودة مع الحكومة لدراستها.

طيب اية طبيعة النشاط اللي هيقوم بيه القطاع الخاص في المطارات؟.
الدولة حاليا مستهدفة التوسع في الانشطة التجارية في المطارات خصوصا أن كل مطارات العالم فيها اماكن كبيرة للبيع والشراء بتضم افخم البرندات والماركات العالمية ده غير المطاعم والكافيهات واللي بتقدم خدمات كبيرة للمسافرين وقت انتظارهم في المطارات لاقلاع الطائرات، والانشطة دي بيتوقف عليها اكثر من 70% من العائدات المالية المتوقعة من انشاء وتشغيل المطارات