خطوة هتغير مسار السياحة المصرية.. إيه اللي هيحصل

الدولة حاليا بتأهل قطاع السياحة علشان تكون العصب الرئيسي للدخل الدولاري لمصر من الخارج خصوصا بعد تراجع ايرادات حاجات كتيرة من الدولار.. ومصر اخذت خطوة هتخلي فيه زيادة كبيرة في أعداد السائحين اللي جايين مصر.. ياتري ايه هيا الخطوة دي.. وازاي هتزود أعداد السائحين في مصر .. خليكم معانا للآخر وهتعرفوا التفاصيل

الدولة حاليا بكل قطاعاتها بتحاول تخدم وتحسن الاقبال السياحي علي مصر، خصوصا الحكومة شايفة إن قطاع السياحة ممكن يكون الرافد الأول للدخل الدولاري لمصر من الخارج خصوصا أن الايرادات الدولارية اللي كانت بتدخل لمصر من قناة السويس واللي تراجعت بمعدل 60% بسبب الضربات اللي بتحصل في البحر الأحمر.

طيب اية اللي عملته مصر علشان تزود حركة السياحة اللي جاية ؟

امبارح وزارة الخارجية والهجرة وشئون المصريين في الخارج أعلنت عن إلغاء التأشيرات المسبقة المطبّقة حالياً على المواطنين الكنديين للنزول إلى مصر، وهيكون الحصول علي التاشيرة بعد الوصول إلى منافذ الدخول المصرية، وهيتم العمل بالتعديلات الجديدة للسائحين القادمين اعتبارا من الأول من ديسمبر اللي جاي وده واحد من خطوات تشجيع الاقبال السياحي علي مصر في الموسم السياحي الشتوي الحالي خصوصا أن الاقبال السياحي علي مصر بيكون اعلي في فصل الشتاء عن باقي فصول السنة .

مش كده وبس، لا ده كمان الحكومة المصرية قررت العمل بتأشيرة دخول للأجانب متعددة الدخول صالحة لمدة 5 سنين وبتوصل تكلفتها لـ 700 دولار، ودي بتسمح لحاملها بالإقامة لمدة 90 يوم في مرة الدخول الواحدة .

الحكومة المصرية كمان بتيح لمواطني 78 دولة بينهم دول عربية الحصول على تأشيرة إلكترونية لدخول لمصر لمرة واحدة وبتوصل تكلفتها 25 دولار، وومكن كمان السائحين يدخلوا بيها اكثر من مرة ودي هتكون بسعر 60 دولار، وكل التسهيلات دي الهدف الرئيسي منها هو تسهيل دخول السائحين ومواطني الدول لمصر لدعم قطاع السياحة وتحقيق ارقام قياسية في عدد السائحين المستهدفين.
طيب هل في حاجة جديدة الدولة هتعملها علشان تشجع الاقبال علي مصر في الموسم السياحي الشتوي؟.
الدولة حاليا بكل الطرق بتحاول تنوع اساليب الترويج السياحي لمصر في الخارج، والخطوة الجديدة اللي الدولة هتقوم بيها، هيا الافتتاح التجريبي للمتحف المصري الكبير واللي الناس كلها حوالين العالم منتظرين صدور القرار ده خصوصا أن هيضم قاعات جديدة وقطع اثرية هتعرض لأول مرة، ومنها قاعة الملك توت عنخ آمون واللي هتضم أكثر من 5300 قطعة آثرية من آثار الملك الذهبي وهتعرض لأول مرة كاملة في قاعة من وقت خروج من المقبرة اللي اكتشفت في الاقصر عام 1922، والمقبرة دي هتكون مفاجاة العرض.
وزارة السياحة والآثار هتفتتح بكرة 12 قاعة من قاعات العرض الرئيسية في المتحف المصري الكبير، ودول بيضموا عدد كبير من القطع الاثرية الفريدة، ودول هيكونوا اضافة لمسار الزيارة المفتوح حاليا بالمتحف واللي بيضم البهو العظيم والدرج العظيم والمسلة المعلقة والمنطقة التجارية .