كريستالينا جورجييفا جاية تعمل إيه في مصر .. مصير الدعم
هي الست كريستالينا جورجييفا مديرة صندوق النقد الدولي جاية ليه مصر وهل زيارتها ليها علاقة ببرنامج القرض وايه علاقة زيارتها بمصير الدعم.. تابعونا في الفيديو ده للآخر وهتعرفوا التفاصيل كلها.
الدكتور مصطفى مدبولي، رئيس مجلس الوزراء، استقبل في الكام ساعة اللي فاتت الدكتور محمود محيي الدين، المدير التنفيذي لصندوق النقد الدولي، وممثل مصر ومجموعة الدول العربية والمالديف بالصندوق، ودا بمناسبة انتهاء مهام عمله بالصندوق، وتقديرا لجهوده المستمرة في استكمال عمله مبعوثاً للأمين العام للأمم المتحدة لتمويل التنمية.
وزي ما احنا عارفين إن الدكتور محي الدين شخصية مالية واقتصادية مرموقة على مستوى افريقيا والعالم وخدم مصر كتير في مناصبه الدولية رفيعة المستوى وخاصة في فترة عمله في الصندوق وكمان جهوده كبيرة جدا في إنجاح مؤتمر المناخ اللي استضافته مصر ودلوقتي هو ماسك منصب مبعوث للأمين العام للأمم المتحدة لتمويل التنمية المستدامة وعشان كده الشكر كان واجب والدكتور محي الدين وجه الشكر للرئيس السيسي على دعمه وجهوده في تحديث مصر وتطورها.
المهم على هامش اللقاء الدكتور محمود محيي الدين، أكد على جهود صندوق النقد الدولي في دعم خطوات التنمية في مصر وانه ملتزم ببرامج دعم الحكومة المصرية وكشف في كلامه إن فيه ترتيبات خاصة دلوقتي في مصر لاستقبال كريستالينا جورجييفا مديرة صندوق النقد الدولي واللي هتزور مصر خلال الأيام الجاية وكشف محي الدين أن زيارة جورجييفا لمصر ضمن متابعة جهود التعاون بين مصر وصندوق النقد الدولي.
طبعا زيارة كريستالينا جورجييفا لمصر في التوقيت دا بالذات بيطرح تساؤلات كتير خاصة بعد قرار صندوق النقد بتأجيل المراجعة الرابعة للقرض المصري واللي بعدها كان المفروض الحكومة تصرف مليار و300 مليون دولار وفتح التأجيل باب الشيطان حولين أسبابه وخاصة إن اتقال إن الصندوق مش راضي عن بعض خطوات الحكومة خاصة في مسألة الدعم ودا طلع نفاه الدكتور مصطفى مدبولي رئيس الحكومة وقال إن الصندوق هو اللي طلب من مصر تأجيل المراجعة لأسباب فنية وإدارية تتعلق بجدول اجتماعات الصندوق وإن الموضوع مفهوش علاقة برنامج الإصلاح الاقتصادي المتفق عليه بين الطرفين أو غصب الصندوق من الحكومة المصرية
.
طيب ياترى فيه اسباب تانية لزيارة كريستالينا جورجييفا لمصر ؟
أكيد الزيارة هتكون فرصة لحوار شامل مع الحكومة المصرية والصندوق ومراجعة كافة البنود المتفق عليها وكمان مراجعة كل برنامج الإصلاح الاقتصادي اللي الحكومة التزمت بيع قدام الصندوق عشان يوافق على اتفاقية القرض الأخير بقيمة 8 مليار دولار ومن بينها طبعا هيكون تحديد مصير الدعم اللي باقي على السلع والمواد البترولية والمبادرات المالية وفتح الطريق للقطاع الخاص والإصلاح المالي اللي الصندوق طلبه وتفاصيل كتير جدا ودا اللي هنعرفها في وقتها بعد زيارة مديرة الصندوق.
الحكومة المصرية من ناحيتها هتلاقيها فرصة عشان تشرح للصندوق الظروف الصعبة اللي بتمر بيها المنطقة وتأثيرها على الاقتصاد المصري وخاصة تراجع إيرادات قناة السويس بشكل كبير جدا وغير الارتفاع الكبير في الأسعار عالميا نتيجة الصراع اللي في المنطقة وخلي بالك زيادة كريستالينا جورجييفا جاية بعد مشاركة حسن عبد الله محافظ البنك المركزي المصري في اجتماعات رؤساء البنوك المركزية في تجمع بريكس واللي بيقدم فرص سهلة للاقراض للدول الأعضاء من خلال بنك التنمية الجديد التابع ليها ودي نقطة قوة للحكومة المصرية في التفاوض مع الصندوق.
