مفاجأة.. شركات البترول المصرية هتوصل الغاز لأوروبا.. شوف إزاي
هي إيه قصة شركات البترول المصرية اللي هتوصل الغاز الطبيعي لأوروبا، وإزاي مصر هتقتحم سوق الطاقة الأوروبي، وإيه هي المكاسب الاقتصادية ليها، هنقولك كل التفاصيل في الفيديو ده.
في الساعات الأخيرة، وقع قطاع البترول المصري ممثلاً في الشركة المصرية لتوزيع الغاز الطبيعي للمدن "تاون جاس"، عقود تنفيذ مشروعات التصنيع المحلي لمحطات تخفيض ضغط الغاز الطبيعي داخل مصر، وتوصيل الغاز الطبيعي للمنازل والمنشآت الاخرى داخل دولة رومانيا.
وده حصل بعد ما تم اعتماد شركة تاون جاس فى هيئة الطاقة الرومانية (ANRE) كمقاول لتنفيذ مشروعات توصيل الغاز الطبيعي كأول شركة مصرية تعمل في المجال ده داخل أوروبا، وده بيكون في إطار أعمال اللجنة المصرية الرومانية المشتركة ومنتدي الأعمال بمدينة بوخارست.
وشارك فى أعمال اللجنة المصرية الرومانية المشتركة للتعاون الاقتصادي، المهندس يس محمد رئيس الشركة القابضة للغازات الطبيعية (إيجاس)، نيابة عن المهندس كريم بدوي وزير البترول والثروة المعدنية.
طب إيه هي وجه الاستفادة من القرار ده؟
بص يا سيدي، الخطوة دي بتعكس تقدم مصر في مجال الطاقة وإنتاج الغاز الطبيعي، وكمان بتؤكد على التطور الكبير في التعاون مع الجانب الروماني في مجال الغاز، واللي أصبح في شراكة استراتيجية معاهم وكمان علاقة متميزة وخبرات واسعة لشركات توصيل الغاز الطبيعي المصرية وكوادرها الماهرة، وده بيؤهلها للمشاركة في تنفيذ مشروعات توصيل الغاز الطبيعي خارج مصر.
كل دي بتعتبر نقاط مضيئة لمجال الطاقة المصري، وكمان بتفتح له آفاق جديدة للعمل في كل دول أوروبا، وفي إمكانية كبيرة للتوسع في جميع دول العالم، يعني ملايين الدولارات هنقدر نجذبها للخزينة المصرية، واللي بالتأكيد هتعمل انتعاشة قوية للاقتصاد المصري مستقبلا وبشكل دوري.
