مصر تجهز نفسها لـ “السيناريو الأسود”.. تصريحات مدبولي تكشف المستور
يا ترى ليه مصر بتشتري كميات كبيرة من القمح دلوقتي؟ هل في حاجة ملحة ورا القرار ده؟ وليه الحكومة بتجهز احتياطيات ضخمة بتكفي أكتر من 5 شهور جايين؟ وهل ده ليه علاقة باللى بيحصل من صراعات فى منطقة الشرق الاوسط؟
في الأيام الأخيرة الحكومة بتتحرك بخطة واضحة عشان تؤمن احتياجاتنا من القمح خصوصًا في وقت التوترات الإقليمية فيه بتزيد سواء فى فلسطين او فى لبنان او حتى فى تصاعد الصراع بين اسرائيل وايران ومخاوف من توسع الحرب
رئيس الوزراء مصطفى مدبولي قال يوم امبارح إن مصر عندها احتياطيات من القمح تكفي أكتر من 5شهور ونص.. وده مش مجرد رقم دي خطوة احترازية عشان نكون مستعدين لأي طارئ، خصوصًا مع الأوضاع الإقليمية المتوترة في الشرق الأوسط.
مدبولي قال إن فيه تساؤلات كتير بتتسأل حوالين ليه مصر بتحاول تشتري أكتر من 3 مليون طن من القمح.. وجاوب على السؤال ده وقال:"الحقيقة إن دي خطة مدروسة عشان نكون جاهزين لأسوأ السيناريوهات.. كل ده عشان نغطي احتياجات دولة زي مصر اللي بتعتبر واحدة من أكبر مستوردي القمح في العالم".
طب إيه اللي بيحصل بالظبط؟ وليه بنستورد الكميات الكبيرة دي من القمح؟
اللي حصل إن الهيئة العامة للسلع التموينية أبرمت واحدة من أكبر صفقاتها المباشرة للقمح على الإطلاق..الصفقات دي مش بس عادية، ده إحنا بنتكلم عن إمدادات قمح هتوصل لمصر من شهر نوفمبر الجاي لحد أبريل اللي جاي هيوصل اجماليها لـ 3.12 مليون طن.. والأرقام دي بتبين قد إيه مصر بتحاول تأمن احتياجاتها لوقت طويل، وتكون جاهزة لأي تغييرات في السوق العالمي.
مدبولي شرح إن السبب الأساسي هو الوضع الإقليمي اللي بيسوء مع احتدام القتال بين إسرائيل وحزب الله في لبنان.. ده غير المخاوف المتزايدة من هجوم إسرائيلي محتمل على إيران.. زالسيناريوهات دي مش مجرد احتمالات دي حاجات لازم نكون مستعدين لها.. والحكومة بتحاول تخزين القمح لأي احتمال عشان لما الأمور تسوء، نكون جاهزين ومؤمنين احتياجاتنا.
طب هل ده معناه إن الحكومة عارفة حاجة مش واضحة لينا؟
الحكومة المصرية بتبص على كل السيناريوهات المحتملة وبتحاول تتعامل وفقا لأسوأ السيناريوهات .. ورئيس الحكومة قال بوضوح إنهم بيحاولوا يتحسبوا لأقصى السيناريوهات السيئة وإن البلد هتدبر احتياجاتها بأي شكل.. وبالتأكيد مع كل اللي بيحصل في المنطقة من الطبيعي إن البلد تتجهز وتخزن احتياطيات تكفي لأي طارئ سواء كان اقتصادي أو سياسي.
اللى بيحصل ده معناه ان الدولة مشسايبة حاجة للحظولا للظروف وبتجهز نفسها لأي ظروف.. وزي ما كلنا عارفين لقمح هو عنصر أساسي في غذاء المصريين والحكومة بتتحرك بذكاء عشان تحافظ على استقرار السوق الداخلي وتأمن احتياجات الناس مهما كانت الظروف الخارجية
