بمليارات الدولارات.. شوف إزاي مصر هتنفذ مشروع الهيدروجين الأخضر

هو إيه طبيعة مشروع الهيدروجين الأخضر اللي الحكومة المصرية بتحاول تنفذه دلوقتي، وهل هو مشروع هيوفر لنا طاقة نقدر بيها نحل مشاكل زي مشكلة انقطاع الكهربا، ولا ليه استخدامات تانية، وإيه هي الجدوى الاقتصادية من تنفيذ في مصر دلوقتي.. هنقولك كل التفاصيل في الفيديو ده فتابعنا للآخر. 
 

الحكومة المصرية ممثلة في وزارة  التخطيط، شهدت في الساعات الأخيرة، التوقيع على اتفاق منحة بقيمة 30 مليون يورو لمشروع الهيدروجين الأخضر، وده كان بحضور المهندس كريم بدوي، وزير البترول والثروة المعدنية، وسيفينا شولز الوزيرة الاتحادية للتعاون الاقتصادي والتنمية والاتفاقية دي لتنضم لاتفاقيات سابقة بمليارات الدولارات لإنتاج الهيدروجين الأخضر.

ووفقا للتوقيع، من المقرر إن يتم تمويل المشروع من المنحة المقدمة من آلية الهيدروجين الأخضر PTX، واللي سبق وتم إطلاقها من جانب الوزارة الاتحادية الألمانية للتعاون الاقتصادي والتنمية بقيمة 270 مليون يورو لمصر، و6 دول تانية شريكة في المشروع.

ومشروع الهيدروجين الأخضر بيعتبر من المشروعات الصناعية، اللي بيهدف لتحفيز التحول الأخضر بالمنطقة الاقتصادية لقناة السويس، فهيوفر لنا الطاقة من خلال استغلال طاقة الرياح والطاقة الشمسية، وبالتالي هيوفر 1330 فرصة عمل في مراحل البناء والتشغيل والصيانة للمشروع، ومن المتوقع أن المشروع ده ينتج 70 ألف طن من الأمونيا الخضراء، يعني حوالي 140 ألف طن من مكافئ ثاني أكسيد الكربون سنويًا، أي ما يعادل 3 مليون طن على مدار عمره الإنتاجي، وبالتالي هيساهم في التحول المستدام للصناعة بأكملها.

ونقدر نقول، إن توقيع اتفاقية المنحة دي بين شركة سكاتك وآلية الهيدروجين PTX لمشروع الهيدروجين الأخضر في مصر، بيعتبر نتاج للتعاون المستمر والمثمر بين وزارة التخطيط والتنمية الاقتصادية والتعاون الدولي المصرية ووزارة التعاون الاقتصادي والتنمية الألمانية الاتحادية.

كمان، الهيدروجين الأخضر، اكتسب اهتمام عالمي كبير خلال الفترة الأخيرة، لأنه بيعتبر وقود خالي من الكربون، ومستقبلا هيلعب دور كبير جدا في التحول العالمي للطاقة، خاصة مع انخفاض احتياطيات الطاقة التقليدية، زي الفحم والبترول والغاز الطبيعي، كمان لا ينتج عنه أي تلوث للبيئة.

وبالنسبة لدور الهيدروجين الأخضر في قطاع الطاقة المصري، فهيمكن مصر من إنتاج كميات كبيرة من الكهرباء من الطاقة المتجددة بأسعار تنافسية، وده لأن القطاع ده بيخضع لإرادة سياسية حقيقية لتطوير إنتاج الكهرباء الخضراء، وبالتالي تم تطوير أول منشأة لإنتاج الهيدروجين الأخضر داخل المنطقة الاقتصادية لقناة السويس لإنتاج الأمونيا الخضراء وغيرها من المشروعات، وبكده هنقدر نوفر فرص كبيرة لمصر لإنتاج الهيدروجين وتصديره.

ومصر سبق ووقعت في فبراير اللي فات 7 اتفاقيات تعاون في مجالي الهيدروجين الأخضر والطاقة المتجددة، بمبلغ 12 مليار دولار قيمة استثمارات المرحلة التجريبية و29 مليار دولار للمرحلة الأولى، فيما يبلغ  إجمالي الاستثمارات 40 مليار دولار خلال 10 سنين

وبسبب دوره في تعزيز محور الطاقة، فالهيدروجين الأخضر هيساهم في تقليل الاعتماد على الغاز الطبيعي في قطاع الكهرباء في مصر، وتسريع تطوير ونشر الطاقة المتجددة، وزيادة الطاقة المتجددة إلى 42%  بحلول سنة 2030.

وبكده، مصر هيبقي عندها الفرصة عشان تكون واحدة من الدول الرائدة عالميًا في اقتصاد الهيدروجين منخفض الكربون، وده بالتأكيد هيبقي فرصة كبيرة جدا مش بس لتلبية احتياجاتنا من الطاقة، لأ دخ كمان عشان نساهم في التحول العالمي إلى الطاقة النظيفة.