“مش كل اللي بتشوفوا حقيقة”.. العالم السري لـ “أثرياء التيك توك”
هو إيه اللي بيحصل حوالينا بالظبط ؟ إزاي كل شوية نلاقي على السوشيال ميديا حد جديد بيفتخر بعربية بتعدي نص مليار جنيه؟ مين الناس دي؟ وبيجيبوا الفلوس منين؟ وهل فعلاً اللي بنشوفه ده حقيقي ولا مجرد خدعة؟ والأخطر من كده، إزاي بقوا قدوة لجيل كامل؟"
في الفيديو ده هنتكلم عن ظاهرة جديدة بقت بتنتشر بشكل مرعب على السوشيال ميديا وهي رجال الأعمال بتوع العالم الافتراضي. ناس بنشوفهم فجأة، طلعوا من اللا شيء، وبيتكلموا عن فلوس بالملايين وكأنها ورق.. بيركبوا عربيات غالية وبيعيشوا في قصور.. وكله على الإنترنت.. واللي يحزن إن الناس دي بقت "قدوة" للشباب الصغير اللي بيتابعهم وبيحاول يبقى زيهم.
خلونا نبدأ من الأول.. العالم الافتراضي بقى مكان مفتوح لأي حد عايز يظهر ويقول اللي هو عايزه، مفيش رقابة على حد ومفيش حدود..والناس اللي ظهرت دي بقت بتعتمد على السوشيال ميديا في نشر صورة مثالية عن حياتهم.. شوية صور مع عربيات فخمة وشوية فيديوهات من جوه فيلات.. وكلمتين عن النجاح وتحقيق الأحلام وده بيخلي اللي بيتابعهم يفتكر إن دي الحياة الحقيقية.
السؤال المهم .. الفلوس دي جايه منين؟ وإزاي شخص لسه في العشرينات أو التلاتينات معاه عربية بملايين الجنيهات؟
الحقيقة إن جزء كبير من الناس دي بيشتغل في مجالات جديدة زي العملات الرقمية التسويق الإلكتروني أو حتى التجارة الإلكترونية.. وفيه منهم اللي فعلاً نجح في المجالات دي.. لكن في المقابل فيه جزء مش قليل منهم اللي بيستخدم الطرق دي عشان يظهر إنه غني ومحقق كل حاجة لكن على أرض الواقع الموضوع ممكن يكون مجرد تمثيلية.. ومحاولة لتحقيق ملايين المشاهدات وتحقيق الشهرة على منصات التواصل الاجتماعي
الناس دي بتستغل فكرة إن العالم الافتراضي مفيهوش حدود.. وبيظهروا بمظهر الأغنياء حتى لو الحقيقة عكس كده.. كل اللي محتاجينه كاميرا ومكان شكله فخم وعربية ممكن تكون متأجرة ليوم واحد والباقي يبقى سهل.. لكن المشكلة الأسوأ إن الناس بتصدق.
طب إيه تأثير ده على الجيل الجديد؟
الشباب الصغير اللي بيتابعهم شايف إن النجاح هو إنك تبقى غني بسرعة..مش مهم إزاي.. وفكرة "الثراء السريع" بقت منتشرة بشكل خطير.. والشباب بقت بتدور على أسهل الطرق لتحقيق الحلم ده.. حتى لو كانت الطرق دي مش قانونية أو مش أخلاقية.. والناس دي بتدي صورة غير واقعية عن الحياة وده بيخلي فيه إحباط كبير لما الشباب يكتشفوا إن الطريق مش سهل زي ما كانوا متوقعين.
الأسوأ كمان، إن بعضهم بيستخدم شهرته عشان يبيع منتجات أو دورات تدريبية.. وبيوهموا الناس إنهم هيبقوا زيهم لو دفعوا فلوس في الحاجات دي.. لكن الحقيقة إن ده مش بيحصل في الغالب.. لأن النجاح الحقيقي بييجي من ورا تعب وشغل مستمر مش من فيديو على السوشيال ميديا.
طب إيه الحل؟ إزاي نواجه الظاهرة دي؟
الحل يبدأ من عندنا احنا ..اننا نفهم إن العالم الافتراضي مش دايما بيعكس الحقيقة.. وإن مش كل اللي بنشوفه على السوشيال ميديا حقيقي.. لازم نوعي الأجيال الجديدة ونفهمهم إن النجاح مش بييجي من ورا العربية الغالية أو البيت الفخم.. لكن بييجي من ورا الشغل الجاد والمستمر.. لازم نرجع نعلمهم القيم اللي بجد زي الإبداع والصبر والجهد.
الرسالة اللي لازم نوصلها هي إن مش كل اللي بيظهر على السوشيال ميديا هو اللي بيعيش حياة مثالية.. النجاح الحقيقي بيبقى وراه تعب وجهد ومش مجرد "بوست" على فيس بوك ولا شوية صور على إنستجرام."
ومصر مليانة رجال أعمال شرفاء وشقيانين وبيحققوا انجازات عظيمة على الأرض بسلاعمرك هتشوفليهم صورة على البحر ولا هتلاقيهمسهرانين مع الفنان الفلاني
