خميرة البنوك من الدولار.. لغز الودايع ومفاجأة في الأرصدة

 
هو ليه الدولار سعره رجع يزيد اليومين اللي فاتو وايه علاقة ودائع الدولار اللي في البنوك بسوق الصرف والمصريين جابوا 56 مليار دولار منين.. تابعونا لاخر الفيديو وهتعرفو التفاصيل 
 

كلنا ملاحظين أن الدولار رجع يزيد تاني في اخر 48 ساعة وتحديدا بعد انتهاء إجازات البنوك وذكرى انتصار 6 أكتوبر وعشان محدش يفتكر أن فيه أزمة الارتفاع دا طبيعي جدا ودليل إن البنك المركزي المصري ملتزم تماما بسياسة تحرير سعر الصرف ودليل كمان إن السوق ماشي طبيعي جدا .. والارتفاع الأخير للدولار سببه طول فترة الإجازة من الخميس لغاية صباح الاتنين ودا خلي فيه طلب طبعاً على الدولار وإن الأمور هترجه لمجاريها في الأيام الجاية.

يعني الوضع في سوق الصرف مايقلقش؟... لا حضرتك مايقلقش خالص..  طيب ليه مايقلقش.. تعالي نقولك.. لأسباب كتير أزمة الدولار مش هترجع زي الاول خالص وممكن تشوف الدولار سعره يرفع بشكل كبير لكن مش هيحصل مضاربة عليه وهتلاقي سعره رجع تاني ينزل لأن دي سياسة العرض والطلب وكل العملات ف بالعالم بترفع وتنزل قدام الدولار في التعاملات اليومية.. تاني سبب عشان متقلقش هو إن التدفقات الدولارية في مصر بدأت تتعافي بشكل ملحوظ سواء من الاستثمارات الضخمة أو السياحة أو تحويلات المصريين بالخارج أو التصدير وعة الأموال الساخنة وغيرها من موارد الدولة من العملة الصعبة وطول مافي تدفقات دولارية مفيش خوف على سوق الصرف.

طيب ايه حكاية الودائع الدولارية في البنوك والمصريين جابو المبلغ الكبير دا منين؟

شوف حضرتك الأرقام بتقول إن الودائع بالعملات الأجنبية غير الحكومية في بنوك مصر  قفزت بأكتر من 4 مليارات دولار خلال أول 8 شهور من 2024، ووصلت إلى 54.6 مليار دولار بنهاية أغسطس اللي فات، مقابل 50.5 مليار دولار بنهاية ديسمبر 2023، وفقا لأحدث بيانات عن البنك المركزي المصري.

ونفس البيانات كشفت إن  البنوك المصرية تلقت مدخرات أجنبية بقيمة 800 مليون دولار خلال أغسطس لوحده لترتفع أرصدة الودائع بالعملة الأجنبية من 53.8 مليار دولار في يوليو الماضي إلى 54.6 مليار دولار في نفس الشهر.. طبعا الرقم ضخم جدا لدرجة أنه قيمته اكبر من قيمة الاحتياطي النقدي في البنك المركزي واللي قرب على حاجز 47 مليار دولار..

طبعا رقم الودائع كبير جدا ودا لأسباب كتير أولها أن المصريين فهموا السوق وبقوا متابعين اقتصاد وعشان كده راهنوا على الدولار بعد قرارات تعويم الجنيه المصري وانخفاض قيمته و نمو تحويلات المصريين في الخارج خلال الشهور اللي فاتت كان السبب الرئيسي لزيادة معدلات الادخار الأجنبية في البنوك وكمان فيه  طلب ملحوظ على الادخار في شهادات الدولار واليورو ذات الفائدة المرتفعة واللي بتتراوح بين 7 و9%، في ظل توقعات باحتمالية خفض الفائدة عليهم خلال الشهور الجاية

وفيه سبب تاني وراء ارتفاع ودائع الدولار وهي توقعات خفض الفايدة على الجنيه بداية 2055 وودا خلي كتير من العملاء يحافظوا على مدخراتهم في صورة شهادات وودائع دولارية الفترة اللي فاتت خاصة أن أسعار الفائدة على منتجات الادخار الأجنبية لسه عند معدلات مغرية للعديد من العملاء.

وبالارقام قفزت تحويلات المصريين العاملين بالخارج خلال الربع الرابع من العام الحالي، في الفترة من أبريل إلى يونيو 2024، بمعدل 61.4% لتصل إلى نحو 7.5 مليار دولار مقابل نحو 4.6 مليار دولار خلال ذات الفترة من العام السابق، وفقا لأحدث بيانات من البنك المركزي المصري.
طبعا فايدة وداىع الدولار زي فايدة الاحتياطي النقدي كده وهي أنها عامل امان مالي كبير جدا في البنوك ولسوق الصرف وحائط صد ضد التقلبات المفاجئة وبتدي حرية مناورة للبنك المركزي.