عودة تجار الأزمات.. إيه اللي بيحصل في سوق الزيوت

شبح عودة ارتفاع اسعار الزيت بدأ يرجع تاني وشكله هيكون أزمة جديدة هتهدد جهود الحكومة اللي عملتها في الفترة اللي فاتت واللي بتهدف لاستقرار الاسعار.. طيب ايه اللي حصل في أسعار الزيت..وتاثيرها علي الاسعار هيوصل لكام.. خليكم معانا للآخر وهتعرفوا التفاصيل

مصر من شهور طويلة وهيا بتشهد استقرار كبير في سوق صرف العملات الأجنبية مقابل الجنية المصري، والاستقرار ده انعكس علي الاسعار، وفعلا أسعار السلع في الاسواق مستقرة من فترات طويلة، بس حاليا في حاجات بدأت تحصل من التجار هتغير الاسعار بشكل كامل، وترجع تحصل أزمة جديدة في الأسواق، أول الحاجات دي هتكون زيادة جديدة في اسعار الزيوت.

طيب اية اللي حصل في اسعار الزيوت، وليه اسعارها هترتفع؟.
الشعبة العامة للمواد الغذائية قالت إن أسعار زيت الصويا ارتفعت بالسوق المحلية في الاسبوع ده بس بنسبة 10%، ووصل سعر الطن جملة إلى 57 ألف جنيه، مقابل 52 ألف جنيه في تعاملات الأسبوع اللي فات بارتفاع اكثر من  5 آلاف جنيه في الطن الواحد.
الشعبة العامة للمواد الغذائية كملت كلامها وقالت أن أسعار الزيت ارتفعت في أسواق التجزئة في الاسبوع الحالي لـ 13.5%، وارتفع سعر عبوة الزيت وزن 850 مل  من 60 إلى 68 جنيه، والغرفة استغربت من الارتفاع ده خصوصا أنه مفيش اي مبررات للزيادة الجديدة الأسعار، خصوصا مع الثبات اللي موجود في سعر صرف الدولار، وده اللي بياثر علي الاسعار بشكل كامل مش اسعار الزيوت بس.
الشعبة قالت كمان، ان التجار بدأوا يروجوا لاسباب الزيادة الجديدة بانه فيه زيادة في أسعار زيوت الطعام بشكل عالمي، وده ملهوش اي أساس من الصحة، وطالبت الحكومة بتشديد الرقابة على آليات التسعير من المنبع علشان ميحصلش تاثير على الأسواق المحلية خصوصا في السلع الاستراتيجية .

الشعبة اختتم كلامها وقالت أن أي زيادة في الأسعار عالميا مش المفروض انها تاثر في زيادة الاسعار محليا خصوصا أن الدولة استوردت كميات كبيرة من الزيوت خلال الفترة اللي فاتت قبل الزيادة الحالية، ودللت علي كلامها وقالت أن السلع لما أسعارها بتنخفض عالميا اسعارها مش بتنزل عندنا وبتكون حجتهم أن استوردها بالسعر القديم قبل الانخفاض، وان المخزون الاستراتيجي الموجود حاليا في مصر من زيت الطعام في المصانع ومخازن المستوردين، هيكفي احتياجات المواطنين  لأكثر من 6 أشهر .

طيب الزيادة الجديدة في اسعار الزيوت هتبدأ تظهر امتي؟. 
الزيادة في اسعار الزيوت بدأت تظهر من الاسبوع الحالي عند تجار التجزئة، وكمان بدأت تظهر في المجمعات الاستهلاكية، ووصلت الزيادة لـ2 جنيه لزيت عباد الشمس في اللتر مقارنة ووصل متوسط سعر لتر زيت عباد الشمس لـ78.5 جنيه، وارتفع سعر زيت عباد الشمس سلايت بنسبة 3 جنيه في اللتر، ووصل متوسط سعر لتر زيت عباد الشمس سلايت لـ 82 جنيه.

الأزمة دلوقتي عند الحكومة واللي المفروض توضع حد لجشع التجار دول وتعاقب اي تاجر بيشتغل ويفتعل اي سبب عشان يزود أرباحه من غير مبرر.