1000 مصنع تركي جديد في مصر.. ايه الحكاية ؟
مصر حاليا بتستهدف زيادة الاستثمارات الأجنبية في كل المجالات، والمرة دي التقيل جاي من تركيا.. وفي 1000 مصنع جداد تركيا هتبنيهم في مصر.. يا تري اية حكايتهم.
من فترة طويلة مصر وتركيا وصلوا لصيغة لاعاد ترسيم العلاقات السياسية، وكانت البداية بزيارة الرئيس التركي رجب طيب أردوغان للقاهرة، وكان وراها زيارة الرئيس عبدالفتاح السيسي لانقرة، واللي كان فيها توقيع علي عدد كبير من الاتفاقيات المشتركة بين البلدين.
طيب اية اللي هتعمله تركيا في مصر؟.
سفير تركيا في مصر، صالح موطلوشن،أعلن عن سعي بلاده لإنشاء منطقتين صناعيتين منفصلتين في مدينة 6 أكتوبر والعاصمة الإدارية الجديدة، على مساحة إجمالية قدرها 5 ملايين متر مربع لتشييد 1000 مصنع في الـ10 سنين اللي جايين، والاستثمارات التركية الجديدة في مصر جاية بناء علي الاتفاقية اللي تم توقعها بين شركة تركية ووزارة الصناعة المصرية.
سفير تركيا بالقاهرة كمل كلامه وقال، أنه هيتم إنشاء 1000 مصنع في غضون 5 إلى 10 سنوات، وهيتم توظيف ما لا يقل عن 50 ألف عامل مصري في الاستثمارات التركية الجديدة.
موطلوشن اتكلم كمان وقال أن الفترة اللي جاية هتشهد تعاون مكثف بين القاهرة وانقرة في كل المجالات خصوصا في المجالات الاقتصادية والتجارية والفنية، وده ضمن الاطار اللي رسمته الاتفاقيات اللي تم توقيعها خلال زيارة الرئيس عبدالفتاح السيسي إلى أنقرة الشهر اللي فات.
طيب حجم التبادل التجاري بين مصر وتركيا بيوصل لكام حاليا؟.
في الفنرة الحالية حجم التبادل التجاري بين مصر وتركيا بيوصل إلى 8 مليار دولار ومستهدف الوصول لرقم قياسي جديد في حجم التجارة بين البلدين هيوصل لـ 15 مليار دولار في الـ 5 سنين اللي جايين .
سفير تركيا بالقاهرة، قال أن مجال الملابس الجاهزة بيحتل مكانة مهمة في التبادل التجاري مع مصر، خصوصا أن أن مصر عندها تكامل اقتصادي كويس جدا مع اغلب دول العالم، ده غير اتفاقيات التجارة الحرة مع دول أوروبا وأمريكا وأمريكا اللاتينية وإفريقيا والشرق الأوسط، ده غير اتفاقية المناطق الصناعية مع أمريكا؛ وده بيجعل مصر دولة جذابة للمستثمرين ورجال الأعمال الأتراك.
