العجلة دارت.. شوف الفوايد الاقتصادية لعودة تشغيل القطارات بسيناء

إيه قصة عودة قطارات السكة الحديد لسيناء من جديد بعد أكتر من 50 سنة من التوقف، وإزاي الحكومة ممثلة في وزارة النقل قدرت تحقق المعادلة الصعبة دي في أقل من سنتين، وامته هنشوف أول قطر ركاب بيتجول داخل أرض الفيروز، وايه هي الفوايد الاقتصادية للخط ده.. هنقولك كل التفاصيل في الفيديو ده فتابعنا للآخر. 
 

انهاردة وزارة النقل، أطلقت التشغيل التجريبي لقطارات  السكك الحديدية، بخط سكة حديد الفردان – بئر العبد بطول 100كم، وده كان بحضور الفريق مهندس كامل الوزير نائب رئيس مجلس الوزراء للتنمية الصناعية وزير الصناعة والنقل، ورئيس وقيادات السكك الحديدية.

ونقدر نقول، وزارة النقل ممثلة في هيئة السكة الحديد، قدرت تحقق المعادلة الصعبة في إعادة تشغيل خط سكك حديد سيناء من جديد، عشان ترجع خدمة القطارات إلى أهالي سينا من جديد زيهم زي أي محافظة تانية.

وقامت السكة الحديد في الفترة الأخيرة، بإعادة تأهيل وتطوير وإنشاء خط «الفردان / شرق بورسعيد / بئر العبد / العريش / طابا» البالغ أطواله حوالي 500 كم، وكان العمل على الخط ده بيجرى على قدم وساق لحد ما انتهوا منه بشكل كامل في فترة وجيزة.

عشان كده، واصلت هيئة السكة الحديد العمل على مدار الساعة، عشان تشغل الخدمة تاني، ومش بس كده لأ ده كمان قامت برفع كفاءة كوبري سكة حديد الفردان فس المسافة من محطة القنطرة شرق بالإسماعيلية إلى محطة بئر العبد بسينا.

ودلوقتي هتعبر القطارات من غرب القناة إلى شرقها فوق الجسر المعدنى المتحرك اللي هو كوبرى الفردان، واللي تم إعادة تأهيله عشان يكون مزدوج، كمان تم إقامة كوبرى آخر فوق قناة السويس الجديدة عشان يسمح بمرور القطارات بشكل مزدوج بدلا من الخط الفردي عشان تدخل القطارات لسيناء بعد سنين طويلة من الانقطاع.

أما  عن مسار خط سكك حديد سيناء، فبيمتد لحد مدينة العريش، وتك إنشاء خط سكة حديد جديد يربط العريش بطابا وبيمر بوسط سيناء لخدمة حركة البضائع والركاب.

وده لأن المشروع ده، شمل إعادة تأهيل وتطوير وإنشاء خط الفردان / شرق بورسعيد / بئر العبد / العريش / طابا البالغ إجمالي أطواله حوالي 500 كم، كمان تضمن إعادة تأهيل وتطوير خط الفردان / بئر العبد بطول 100 كم بالإضافة إلى تطوير الوصلة من بالوظة لحد ميناء شرق بورسعيد بطول 44 كم.

كمان تم إنشاء خط بئر العبد العريش بطول 80 وكذلك إنشاء خط العريش / النخل / التمد / طابا بطول 275 كم، بالإضافة لخط (العريش / طابا) بطول  275 كم، واللي تم تنفيذه بالكامل بأيادي مصرية.

والخط ده له فوايد اقتصادية كبيرة، لانه هيخدم مناطق  التصنيع بسيناء زي مصانع الأسمنت بالعريش ومصانع الرخام بالحسنة بكل من ميناء طابا وميناء العريش وميناء بورسعيد، كمان هيحقق الخط نقل البضائع من وإلي هذه الموانئ.

كمان هيحقق ربط موانئ البحر الأحمر "طابا - نوبيع" بموانئ البحر المتوسط "العريش – شرق بورسعيد"، عشان يحقق التنمية الشاملة والمستدامة لمنطقة سيناء وربطها مع شبكة سكك حديد مصر.