صفقة الجيل الخامس والـ 500 مليون دولار.. خلاص شبكة المحمول مش هتوقع تاني

إيه حكاية شبكات الاتصال بتاعة الجيل الخامس دي.. وليه شركات المحمول دفعت فيها ملايين الدولارات عشان تشغلها وايه اللي هيعود على المواطن اللي شايل المحمول وايه هي أصلا تقنية الجيل الخامس وهل هتكون ليها تعريفة جديدة.. خليكم معانا وكل التفاصيل هنعرفها في الفيديو ده 
 

في الكام ساعة اللي فاتو مواقع التواصل الاجتماعي ملهاش سيرة غير شبكات الجيل الخامس للمحمول ووزارة الاتصالات أعلنت أن النهاردة هتكشف عن نجاح المفاوضات الطويلة اللي تمت بين الجهاز القومي لتنظيم الاتصالات ووزارة الاتصالات من ناحية وبين شركات المحمول التلاتة  اورنج ، إي آند مصر وفودافون للحصول على تراخيص الجيل الخامس في السوق المصرية.

خلونا نكمل مع حضراتكم التفاصيل المنشورة وبعدها نرجع نشوف إيه الحكاية .. حسب المصادر متوسط القيمة المالية اللي هتدفعها شركات المحمول للدولة هتوصل 500 مليون دولار تقريبا زي ما حصل مع الشركة المصرية للاتصالات واللي سبق ودفعت 150 مليون دولار عشان تحصل على الترخيص.

التفاصيل بتقول إن المفاوضات نجحت بين الدولة ممثلة في وزارة الاتصالات وجهاز تنظيم الاتصالات بعد شد وجذب اخد فترة كبيرة بسبب اعتراض شركات المحمول على إتمام الصفقة والحصول على تراخيص الجيل الخامس بدون ترددات ودا لأن الشركات هتضطر تدفع مبلغ ضخم تاني مقابل الحصول على ترددات الخدمة الجديدة قبل ما يحصل تقريب في وجهات النظر بين كل الأطراف.

طيب ايه اهي خدمات الجيل الخامس للاتصالات ؟
شوف ياسيدي بتقنية الجيل الخامس في الاتصالات مصر بتدخل عصر جديد تماما في تكنولوجيا وتطبيقات الاتصال والناس مش هتسمع تاني أن الشبكة واقعة أو خارج الخدمة أو انترنت المحمول ضعيف ودا لأن التكنولوجيا الجديدة بتقدملك خدمات اتصال فاىقة الجودة والسرعة ودا غير إمكانيات شبكات الجيل الخامس في تطبيقات الذكاء الاصطناعي والعمل عن بعد بجانب خدمات الاتصالات اللاسلكية .
تكنولوجيا 5G  بتعمل  بكفاءة في الإرسال مع طاقة منخفضة مقارنةً بالشبكات الحالية وكمان شبكة 5G بتساعد في تسريع وتيرة تطوير المركبات الكهربائية، والإنشاء الذكي، ومشاريع الشبكة الذكية، وستفيد هذه كلها الدولة من خلال استخدام الموارد بكفاءة وتقليل التلوث.

وحسب المعلومات اللي لقيناها عن شبكات 5G فهي بتوفر سرعات تصل إلى 10 جيجابايت في الثانية الواحدة، ودا بيخليها أسرع بـ10 مرات من شبكات 4G، وعلي سبيل المثال لو هتنزل  فيلم أو نسخ قاعدة بيانات احتياطيًا، مش هياخد 5% من الوقت اللي بياخده في الشبكات الحالية وطبعا دا بيدي ميزة كبيرة خاصة لاصحاب الشركات واللي شغلهم بيعتمد على شبكات الانترنت.

كمان فيه حاجة تانية هتكشف لنا قد ايه شبكة الجيل الخامس هتكون قوية جدا وهي إن الشبكة الجديدة هتيح الاتصال مع عدد كبير من الأجهزة،  وهتكون قادرة على دعم اتصال حوالي مليون جهاز في كل كيلومتر مربع، مقارنًة بشبكة الجيل الرابع واللي بتدعم اتصال حوالي 200-400 جهاز لكل خلية اتصال بس.
وبالنسبة لمقابل أو تعريفة استخدام تقنيات الجيل الخامس فالموضوع سابق لأوانه ولما الشركات هتدخل التقنية الجديدة هيكون فيه كلام تاني خالص.