العالم يقف في رأس الحكمة.. قصة العبور للاقتصاديات العظمى.. كواليس مفاوضات النفس الأخير مع صندوق النقد.. ومفاجأة في سوق السيارات

متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار اليوم النهاردة السبت 5 أكتوبر 2024

البداية بتقرير مهم جدا عرضته منصات بانكير بخصوص الحدث الاقتصادي الرئيسي في مصر والمنطقة كلها وهو قيام الرئيس عبد الفتاح السيسي والشيخ محمد بن زايد رئيس الامارات بتدشين ضربة البداية في مشروع رأس الحكمة بالساحل الشمالي...

وشرح التقرير إنه خلال الساعات اللي فاتت، القاهرة كانت بتشهد واحدة من أهم الزيارات الرسمية، لما الشيخ محمد بن زايد، رئيس دولة الإمارات العربية المتحدة، زار مصر والتقى بالرئيس عبد الفتاح السيسي. الزيارة دي مش مجرد زيارة عادية، دي زيارة بيتم فيها توقيع واحدة من أكبر الاتفاقيات الاقتصادية بين البلدين، وهي اتفاقية تطوير "رأس الحكمة" التنموية.

وقال التقرير إن اتفاقية رأس الحكمة تعتبر من أكبر المشاريع اللي تم توقيعها في الفترة الأخيرة باجمالي استثمارات متوقعة 150 مليار دولار مع انتهاء المشروع.. وإنه مشروع تنموي شامل بيهدف لتحويل منطقة رأس الحكمة في الساحل الشمالي لمركز اقتصادي عالمي.

وشرح الاتفاقية إن المشروع العالمي هيشمل تطوير بنية تحتية حديثة، مشروعات سياحية، مناطق صناعية، وتجارية، وكمان فرص استثمارية جديدة هتفتح المجال للقطاع الخاص..

التقرير التالي اللي قدمته منصات بانكير كان بردو بخصوص مشروع رأس الحكمة لكن من زاوية مختلفة خالص وإزاي المشروع هيتحول لمصيدة للدولارات ومنتجعات عالمية

واستهل التقرير بالتأكيد على إن مشروع رأس الحكمة مع مشروعات العلمين الجديدة هيخلق كماشة لمليارات الدولارات اللي هتدخل منطقة الساحل الشمالي كلها بعد كده وملايين السياح اللي هيجرو على الساحل المصري في كل سنة  بسبب الامكانيات السياحية الضخمة اللي هتكون في مصر.

وشرح تقرير بانكير تفاصيل المشروع وإن 35 في المية من مساحته مثلا هتكون مساحات خضرا يعني بنتكلم في جنة جديدة على أرض مصر وكمان مجموعة مُدن القابضة الإماراتية، واللي تم تعينها  مطور رئيسي لمشروع رأس الحكمة على الساحل الشمالي، تعاقدت مع مجموعة فالديرما الإسبانية ودي شركة صاحبة أشهر نوادي الجولف في العالم وهي اللي بتدير أحد أشهر نوادي الجولف حول العالم وتحديدا بجنوب أسبانيا واللي تم التعاقد معاها لإنشاء وإدارة ملاعب الجولف بمدينة رأس الحكمة طبعا دا معناه إن ملاعب الجولف واللي هتديرها الشركة الاسبانية هتعمد في اللعبة دولية وهستضيف كبرى بطولات الجولف العالمية ودي سياحة ولاد الذوات والمليارديرات.

ولفت التقرير إن شركة مطارات أبو ظبي هي اللي هتتولى تصميم وتشغيل مطار رأس الحكمة الدولي وحسب الرسومات والمخططات  المطار الجديد هيكون  من أكبر وأهم المطارات بمنطقة البحر المتوسط وأفريقيا على مساحة 1785 فدان.. ودا بخلاف الشركات العالمية التانية للي في المشروع.

وحدة أبحاث بانكير قدمت تقرير مختلف النهاردة بخصوص كواليس التفاوض بين مصر وصندوق النقد

ولفت التقرير إنه في الأيام الأخيرة زاد الحديث عن صندوق النقد الدولي والمراجعات الاقتصادية اللي بيعملها مع مصر.

وأشار التقرير إن المراجعة الرابعة اللي كان المفروض تحصل في سبتمبر 2024 وبعد كده أتأجلت لاكتوبر وبعدها اترحلت كمان لنوفمبر والمراجعة دي ليها أهمية كبيرة جدًا لأنها مرتبطة بالإفراج عن شريحة مالية ضخمة بقيمة 1.3 مليار دولار من القرض المتفق عليه بين مصر وصندوق النقد، واللي إجمالي قيمته 8 مليار دولار.

وسلط التقرير أكتر على أهمية المراجعة الرابعة لصندوق النقد وشرح إن صندوق النقد بيعمل المراجعات دي عشان يتأكد إن مصر ماشية في الطريق الصح في تنفيذ الإصلاحات الاقتصادية المطلوبة.

وشرح التقرير إنه خلال الفترة اللي فاتت، صندوق النقد أكد إن مصر محتاجة تركز أكتر على خلق مناخ اقتصادي يعزز المنافسة بين القطاع الخاص والحكومي. وده معناه تسهيل الإجراءات التجارية والجمركية، وتحسين بيئة العمل للشركات الصغيرة والمتوسطة اللي ممكن تكون جزء من الحل لإنعاش الاقتصاد المصري.

ولفت تقرير بانكير إنه في حالة تمت المراجعة بنجاح، مصر هتقدر تسحب الشريحة الجديدة من القرض وده هيساهم في توفير سيولة مالية تدعم الاحتياجات الأساسية للبلد.. لكن ده مش معناه إن التحديات خلصت، لأن لسه قدام الحكومة المصرية ملفات كبيرة زي التحكم في التضخم، وزيادة معدلات النمو، وتحقيق العدالة الاجتماعية عن طريق تحويل الإعانات لمستحقيها الحقيقيين.

وأختتم التقرير إن الشهور الجاية هتكون حاسمة في مسار الاقتصاد المصري، واللي هيحدد مصيره هو مدى التزام الحكومة بتنفيذ الإصلاحات المتفق عليها مع صندوق النقد الدولي.

التقرير الأخير معانا النهاردة في لايف السبت بيتكلم عن الجديد في أزمة سوق السيارات..

وشرح التقرير إن الموقف القانوني لسيارات المعاقين المستوردة من الخارج والمحجوزة في الجمارك دلوقتي، في إيد لجان فنية بتدرس إزاي تطبق عملية الإفراج عنها، وده حصل بعد قرار الوقف المؤقت لعمليات استيرادها لحين الانتهاء من فحص الأوراق اللي بتثبت صحة موقف مالك السيارة وهو المعاق، وإن مافيش حيل للتجارة في جوابات العربيات الصادرة عن المجالس الطبية.

وقال التقرير  إن استيراد سيارات المعاقين هيتم توضيحه من خلال تشريعات جديدة هتحدد  ضوابط عشان مايتمش الاتجار في عملية جوابات السيارات، كمان موقف السيارة المحجوز هتحدده لجان الفحص الحالية اللي بتقوم بدورها في فحص سيارات المعاقين خلال آخر 3 سنين.

ولفت التقرير إن رابطي تجار السيارات وشعبة السيارات طالبوا الحكومة بسرعة فتح الاستيراد لتلبية الطلب على السيارات وإن شح المعروض كان سبب في عودة الاوفربرايس وارتفاع الاسعار بشكل كبير جدا.