بالفيديو..وعد مدبولي وحلم الاكتفاء الذاتي من القمح.. شوف قال إيه

 
مصر عندها تحدي كبير جدا اسمه الزراعة وتخفيض حدة الاستيراد السلع الزراعية وخصوصا القمح اللي بياخذ نسبة كبيرة جدا من المخصصات الدولارية.. يا تري مصر بتواجه الازمة دي أزاي.. واية خطوات الدولة لتوفير الحاصلات الزراعية والقمح.. خليكم معانا للآخر وهتعرفوا التفاصيل.

الزراعة واحدة من اهم الصناعات اللي علي اساسها الدول بتقوم، واي دولة معندهاش زراعة مش هيكون عندها نهضة ولا حضارة، ومصر من زمن الزمن معروفة أنها بلد زراعية في المقام الأول، وده اللي اكده اجدادنا في رسوماتهم علي جدران المعابد والمناطق الآثرية، وشرحوا لنا خطوات الزراعة اللي كانت موجودة في وقتهم وكمان اية الخطوات اللي عملوها علشان يحافظوا علي الحصة المالية لمصر في الوقت ده.

طيب اية اللي بتعمله مصر في قطاع الزراعة في الوقت الحالي؟.
مصر عندها تحديات كبيرة جدا في قطاعات كبيرة، واحد من اهم القطاعات دي هو الزراعة خصوصا أن المورد الأول لتوفير السلع الأساسية للمواطنين وخصوصا القمح واللي من خلاله الدولة بتوفر رغيف الخبز للمواطنين، وعلشان كده الدكتور مصطفي مدبولي طلع في مؤتمر صحفي ورد علي كل الاسئلة اللي في دماغ المواطنين، وواحد من اهم الاسئلة اللي اتكلم عليها مدبولي هيا قطاع الزراعة، واية هيا خطوات التوسع في الرقعة الزراعية .

الدكتور مصطفي مدبولي اتكلم وقال أن الحكومة بتحاول الوصول لعدم استيراد القمح نهائيا بس في الواقع مفيش دولة في العالم تقدر تعلن تحقيق الاكتفاء الذاتي من كل المنتجات، ومصر ليها ظروف خاصة خصوصا أنها عندها مساحة زراعية محدودة، وأهم شئ حليا هو التركيبة المحصولية وخطوات تحقيق أعلي عائد من الأراضي بكمية المياه المتاحة وتحقيق عائد أكبر.
مدبولي اتكلم كمان عن الصادرات الزراعية، وقال أن مصر حاليا من أعلى الدول في الصادرات الزراعية، وبنحقق النهاردة أرقاما وطفرات كبيرة جداً في مجال الصادرات الزراعية، لو زرعنا كل مساحة الأرض الموجودة عندنا بالقمح، فده هياثر علي محاصيل تانية لها أفضلية وفرص تصدير عالية وبالتالي هياثر من موارد مصر من النقد الأجنبي في قطاع التصدير، والتحرك اللي بتعمله مصر بيكون وفقا لكميات المياه المتاحة، بالاضافة لجهود الدولة في التوسع الرأسي وزيادة إنتاجية الفدان من المحاصيل. 
مدبولي زف بشري سعيدة للشعب المصري وقال أنه في 3 أو 4 سنين اللي جايين هيشعر المواطن المصري بطفرة كبيرة جداً في مجال الزراعة مع دخول المشروعات الكبيرة اللي الدولة شغالة عليها حاليا، خصوصا أن الدولة حاليا شغالة علي مشروع لاستصلاح 3.5 مليون فدان، والنسبة الجديدة من الاراضي الزراعية اللي الدولة شغالة عليها في مجال الاستصلاح بتكلف الدولة بنية تحتية كبيرة جدا في بناء محطات معالجة المياه ومحطات رفع وقنوات وترع ومسارات مدفونة تحت الأرض واستصلاح وبنية أساسية من كهرباء، وتكلفة الفدان بتوصل ما بين 250 إلى 300 ألف جنيه .

مدبولي اتكلم كمان عن خطوات مصر لاستغلال مياة الامطار في الزراعة، وقال ان الموضوع ده معقد في مصر خصوصا أن مصر عندها مشكلة في البنية الأساسية الزراعية واللي هيا الترع والمصارف، ومفيش دولة على مستوى العالم عندها الشبكة المعقدة من شبكات الري زي اللي موجودة في مصر واللي مبنية من القرن الـ19 ، وحاليا الدولة بتحاول بكل الطرق تطويرها.