خبر الموسم من البنك المركزي.. أزمة الدولار “هتبقا ماضي خلاص”
من ساعات البنك المركزي المصري زف بشرى سارة ومهمة لما أعلن ارتفاع تاريخي في صافي تدفقات الاستثمار الأجنبي المباشر واللى سجل 46.1 مليار دولار خلال 2023-2024.. فيا ترى الكلام ده معناه إيه ؟وايه علاقته بأزمة الدولارفى مصر؟ وهل كده أزمة شح العملات الأجنبية انتهت فى مصر؟
كلنا بنسمع عن ارتفاع سعر الدولار وانخفاض الجنيه ودي حاجة بتأثر على حياتنا كلنا.. بس هل تعرفوا إن في خبر كويس وسط كل ده؟
إيه بقا الخبر الكويس ده؟
الخبر الكويس إن مصر حققت رقم قياسي جديد في الاستثمارات الأجنبية المباشرة، ووصلت لـ 46.1 مليار دولار!
طب يعني ايه الكلام ده؟
الكلام ده معناه ان فيه شركات كتير من بره مصر قررت تستثمر فلوسها عندنا وتفتح مصانع وشركات جديدة وده بيخلق فرص عمل وبيحسن الاقتصاد المصري وكمان بيوفرعملة صعبة لأن المستثمر اللى بيجي مصر بيضخ دولار ويشترى جنيه من البنك المركزي وده بيقوى موقف الجنيه وبيزود المعروض النقدي من العملات الأجنبية
حدممكن يسأل ويقول .. وإيه علاقة الاستثمارات الأجنبية بسعر الدولار؟
وخليني أقولك العلاقة بينهم قوية جداً ولما بتزيد الاستثمارات الأجنبية بيزيد الطلب على الجنيه المصري عشان المستثمرين الأجانب محتاجين يحولوا فلوسهم لدولار عشان يستثمروها في مصر… وزي ما العرض والطلب بيحكموا أي سوق لما بيزيد الطلب على الجنيه بيقل ضغط الدولار عليه وبالتالي بيستقر سعر الصرف.
يعني إيه الكلام ده ببساطة؟
يعني كل ما زادت الاستثمارات الأجنبية، كل ما قلت قيمة الدولار مقابل الجنيه المصري… وده خبر كويس لإننا هنقدر نشتري بعملتنا حاجات أكتر وهينخفض التضخم وهتستقر الأسعار.
طب ليه الاستثمارات الأجنبية زادت في مصر الفترة الأخيرة؟
فيه أسباب كتير هلت الاستثمارات الأجنبية تقفزبشكل كبير فى الشهور اللى فاتت أهمها طبعا الإصلاحات الاقتصادية اللي بتعملها الحكومة زي تخفيض الدعم، وزيادة أسعار الطاقة، وده بيخلي الاقتصاد المصري أكثر جاذبية للمستثمرين.. بالاضافة لفرص الاستثمار الكبيرة في مصر .. يعنى مصر فيها موارد طبيعية غنية، وسوق كبير، وبنية تحتية بتتحسن باستمرار، وده بيجذب المستثمرين.
كمان الاستقرار السياسي عامل مهم جدا فى عودة الاستثمارات الأجنبية لمصر ورغم التحديات اللي بتواجهها مصر، إلا إن فيه استقرار سياسي ، وده بيطمن المستثمرين.
طب إيه اللي ممكن يحصل في الفترة الجاية؟
المستقبل واعد، بس لازم نكون واقعيين. فيه تحديات كتير لسه قدامنا، زي التضخم، وزيادة أسعار الفايدة، والأزمة الاقتصادية العالمية.. بس مع استمرار الحكومة في تطبيق الإصلاحات وجذب الاستثمارات الأجنبية هنقدر نتخطى التحديات دي ونحقق نمو اقتصادي مستدام.
وخدوا منى نصيحة أخيرة.. متتأثروش بالأخبار السلبية اللي بتنتشر على السوشيال ميديا، وحاولوا تستمدوا معلوماتكم من مصادر موثوقة زي الصحف والمواقع الاقتصادية المحتارفة.. لأن الاقتصاد مش لعبة، وبيحتاج وقت عشان نشوف نتايج الإصلاحات.
في النهاية.. زي ما بنقول دايما المستقبل بين ايدينا، وكل واحد مننا ليه دور في بناء مصر الجمهورية الجديدة
