ليه السكة الحديد بترفض حمل حقائب الدهب مع التجار؟.. شوف الحكاية
إيه قصة شنط الدهب اللي هيئة السكة الحديد بترفض تنقلها بالقطارات مع التجار، وهل فعلا بيتم نقل الدهب بالقطارات،.... وليه الموضوع ده بقى حديث الساحة دلوقتي.. هنقولك كل التفاصيل في الفيديو ده فتابعنا للآخر.
في الساعات الأخيرة، الشعبة العامة للدهب والمجوهرات بالقاهرة، قالت إنها استقبلت شكاوي كتير من منتسبي شعبة الذهب في المحافظات، وتحديدا محافظات الصعيد، وده حصل بعد منعهم من استخدام القطارات في حالة حملهم لحقائب تحتوي على كميات من المصوغات الدهبية المدموغة.
وقالوا كمان انهم بعد حصلوا على الشنط دي من المصانع الموجودة في القاهرة، ودلوقتي بيواجهوا صعوبة في نقلها بأمان لمحافظات الصعيد، عشان يرجعوا يبيعوها من تاني للمستهلكين من أبناء هذه محافظات الصعيد.
والشعبة قالت إن المشكلة ابتدت لما عناصر الأمن المسئولة عن محطات السكك الحديدية، رفضوا دخول حقائب المشغولات الذهبية بصحبة التجار أو ركوب القطارات بها خوفا من تعرضهم للسرقة أو الفقد، وهنا طبعا السكة الحديد هتبقى هي المسئولة، فحاولت تخرج نفسها من القصة.
لكن التجار كان لهم رأي تاني، وقالوا إن السكة الحديد بترفض تنقل شنط الدهب وده خلالهم ينقلوا بضاعتهم إما بعربيات خاصة أو بالطيران، وده بالتأكيد هيرفع من تكلفة المشغولات على المستهلك، عشان كده حذروا من حدوث خطورة شديدة بسبب طول المسافة على الطرق الصحراوية وصعوبة تأمين الشحنات.
كل اللي حصل ده، تم رفع مذكرة للاتحاد العام للغرف التجارية لمخاطبة وزير النقل بمضمون المشكلة الخاصة بتجار الصعيد عشان يحلها بشكل عاجل وفوري والتجار يقدروا يسافروا بشنط الدهب في أمان ومايخسروش تجارتهم، ويقدروا يوصلوا لحل مرضي لجميع الأطراف.
وطبعا كلنا عارفين إن قطارات السكة الحديد مش متخصصة لنقل المصوغات، لكن لنقل الركاب والبضايع، عشان كده العاملين في الهيئة حذروا تجار الذهب، ورفضوا بشكل تام ان التجارب يصطحبوا حقائبهم المحملة بكميات من المصوغات الذهبية بعد استلامها من المصانع في القاهرة، عشان ينقلوها للصعيد.
لكن من ناحية تانية، نقدر نقول إن تجار الدهب، زيهم زي التجار التانيين، بيسعوا دايما يحققوا الربح من تجارتهم من غير خساير في تكلفة النقل، وكمان مايقدروش يتلاعبوا في سعر جرام الدهب، لأنه سعر معلن ومعروف للجميع، حتى المصنعية، اللي بتعتبر جزء من الربح، هي كمان لها حدود معينة ماينفعش حد يتجاوزها، عشان كده لازم يكون في شفافية التعاملات والتاجر يحافظ على مصلحته من غير ما يضر بالزباين.
ولكن، بعد مشكلة تجار الدهب في صعوبة نقل هذه المصوغات بقطارات السكة الحديد.. يا ترى وزير النقل هيحل المشكلة إزاي؟.
