إيه هي مميزات الدعم النقدي الجديد اللي الحكومة هتطبقه قريب؟

ليه الحكومة بتفكر دلوقتي تستبدل الدعم العيني بتاع التموين لدعم نقدي، وإيه هي مميزات الدعم النقدي ده، هل هيكون الأفضل، وامته هيتطبق.. هنقولك كل التفاصيل في الفيديو ده فتابعنا للآخر.
 

الكلام اليومين دول كتر في وسائل الإعلام عن الدعم النقدي اللي هتقدمه الحكومة للمواطنين قريب، بدل من العيني المتوفر على بطاقات التموين، وده عشان تضمن حصول المواطن على حقه ووسيلة تانية للقضاء على الفساد.

بس الحقيقة إن فكرة تحويل الدعم العيني إلى نقدي مش فكرة جديدة بتطبق لأول مرة، لأ ده غب دول كتير في العالم بتطبق النظام ده، عشان كده بتسعى الحكومة المصرية لعرض الفكرة دي على مجلس النواب دلوقتي وكمان في مجلس الحوار الوطني عشان تخرج بأفضل قرار يكون في صالح المواطنين، وفي الغالب هيساهم الدعم النقدي في دعم محدودي الدخل وتحقيق العدالة الاجتماعية للمواطن المصري

وبلغة الأرقام، موازنة السنة المالية الحالية بتتضمن دعم الخبز  أو العيش بحوالي 98 مليار جنيه، وفي حالة تطبيق الدعم النقدي، يعني حضرتك تاخد حقك من الحكومة فلوس بدل عيش تموين، فالأسرة المكونة من 4 أفراد هتحصل على 800 جنيه شهريا في حالة التحول للدعم النقدي، يعني كل فرد هياخد 200 جنيه صافي.

طب إيه هي مميزات الدعم النقدي ده؟

بص يا سيدي، النظام ده يقدم للفئات المستحقة للتموين دعم نقدي شهري يستطيع من خلاله المواطن أنه يلبي احتياجاته الأساسية، كمان ممكن حضرتك تشتري السلع والأغراض التانية اللي بتحتاجها مش السلع المفروضة عليذ في التموين، غير إنه هيحقق العدالة الاجتماعية والكفاءة الاقتصادية بين المواطنين.

ضيف على كده، إن التحول للنقدي هيحد من التجاوزات المرتبطة بتوزيع السلع، وهيقلل الضغط على الموازنة العامة للدولة وكمان هيخفض العجز، وكمان نسبة كبيرة من الدعم هتروح لفئات مستحقة لها، لأن فاتورة الدعم السلعي اللي بتتحملها الدولة في موازنة العام المالي الجديد، سجلت حوالي 636 مليار جنيه، مقارنة بمبلغ 264 مليار جنيه فقط في سنة 2021، وده معناه إن حوالي 50% من الدعم ده بيروح لغير المستحقين، فالنظام الجديد للدعم هيقفل  باب الفساد وهيحسن كفاءة منظومة الدعم، وده هيحقق فايدة أكبر للمواطنين وهيضمن توجيه الدعم بشكل عادل إلى الفئات الأكثر احتياجًا.

عشان كده الدكتور مصطفي مدبولي، رئيس مجلس الوزراء، قال إنه أحال الموضوع ده لمجلس أمناء الحوار الوطني، وهما بالفعل عقدوا أكتر من جلسة لمناقشته، ولكن الأهم تفاصيل التنفيذ، عشان ماتحصلش أي مشكلة تضر الفكرة من الأساس.

كمان رئيس الوزراء، توقع إن في حالة موافقة مجلس الحوار الوطني عليه ومجلس النواب، إنه يتم البدء في تطبيق الدعم النقدي خلال السنة المالية الجديدة يعني من شهر 7 لسنة 2025.

وماتنساش، إن الدعم العيني اللي حضرتك بتاخده من التموين دلوقتي بقى طريقة قديمة غير مستخدمة دلوقتي في دول العالم، عشان كده الدولة شغالة على إعادة هيكلة الدعم من أجل إيصال الدعم لمستحقيه.

ونقدر نقول كمان إن الدعم النقدي هيساهم في إعطاء الأسر الأكثر فقرًا واحتياجًا فلوس تقدر تشتري بيها احتياجاتها من السلع والمنتجات من السوق الحر، وبالتالي المواطن هيحس بالرضا عشان هيتشري الحاجة اللي هو عايزها.