400 مليون جنيه في شهر واحد.. مفاجأة وراء قرار وقف تخفيف الأحمال
الدولة كلها شغالة علي تخفيض ميزانية دعم الكهرباء وترشيد النفقات اللي بتدفعها علشان تستورد الوقود من برا، ومن هنا الحكومة بدأت تعمل حاجة جديدة مش عشان توفر الدولارت اللي بتدفعها في استيراد الوقود.. ياتري ايه اللي هيحصل في قطاع الكهرباء واية هي خطة ترشيد النفقات.. تابعونا وهتعرفوا التفاصيل في الفيديو ده
الكهرباء في السنين اللي فاتت كانت مستباحة من الكل وفي كمية تيار كهربائي كتير بتتسرق ومفيش حد بيدفع حسابه، والنسبة دي وصلت لما يقرب من ربع الطاقة اللي الدولة بتنتجها، للاسف مع الزيادة السكانية والتوسعات الجديدة اللي قامت بيها الدولة في انشاء المدن والمصانع الجديدة واللي طبعا مع الوقت بقت حمل اضافي علي الشبكة.
الدكتور محمود عصمت وزير الكهرباء والطاقة المتجددة قال إن الدولة في خلال شهر واحد بس عملت محاضر بسرقة التيار الكهربائي لـ 630 الف مواطن وركبت 186 ألف عداد كودي للمخالفين سواء كانوا واخدين وصلات غير قانونية لاستهلاك التيار أو موصلين التيار بنظام الممارسة في استهلاك التيار واللي أصلا الدولة بتعتبرها سرقة كهرباء وكمان بتحاسب اللي شغال بيها بتعريفة سرقة الكهرباء، والوزارة عملت محاضر بقيمة 400 مليون جنيه بس في شهر. الرقم ده كويس جدا خصوصا أن الوزارة إليها رقم كبير جدا مديونية لوزارة البترول، والمديونية دي خاصة بشحنات الغاز اللي وفرتها الدولة لتشغيل محطات توليد الكهرباء .
طيب الدولة بتعمل اية في حسبة سرقة الكهرباء وازاي بتقدر تكلفة المحضر اللي بتوقعه علي المواطن اللي بيسرق كهرباء ؟. وزارة الكهرباء والطاقة المتجددة أعلنت عن بيع الكهرباء بسعر التكلفة للمواطنين اللي بيسرقوا كهرباء والكيلو بيكون بسعر 214.5 قرش، والسعر ده كمان بتحاسب بيه الناس اللي موصله كهرباء بسعر التكلفة، خصوصا أن مجلس الوزراء اعلن عن سرقة أكثر من 20% من الطاقة اللي بتنتجها محطات التوليد بتروح في عمليات السرقة .
الكهرباء كمان تعاقدت مع 3 شركات صينية لمراقبة استهلاك الكهرباء علي الشبكة الموحدة للكهرباء والشركات دي الهدف منها هي مراقبة كمية الطاقة اللي بتنتجها محطات توليد الكهرباء وكمية الطاقة اللي بتستهلها الاحياء ومنها الوزارة هتعرف اية هيا الاحياء اللي الاستهلاك فيها بيكون عالي في استخدام الكهرباء، والاحياء دي هتكون عليها حملات تفتيش كبيرة جدا لضبط المخالفين.
مش كده بس لا ده كمان الدولة أعلنت كمان عن تخصيص حملا تفتيشية موسعة علي البيوت اللي مركبة عدادات مسبقة الدفع أو هو العداد ابو كارت واللي استهلاكها أقل من 100 و 200 جنية، وقالت مينفعش يكون في بيت حاليا في مصر مركب جهاز تكييف أو اثنين في بيته بسبب الحر الشديد ويكون استهلاكه 100 أو 200 جنية وبالتالي هتكون برضوا في حملات كبيرة علي الناس اللي مركبين العدادات ابو كارت خصوصا أن اللي مركب النوع ده من العدادات فاكر نفسه محدش هيجي يراقب ولا يفتش عليه.
كمان وزارة الكهرباء بدأت تركب عدادات حصر في أكشاك الكهرباء والمحولات اللي موجودة في المحافظات والاحياء السكنية ومهمة الأكشاك دي هي حساب كمية الطاقة اللي بتدخل المحول أو كشك الكهرباء وكمية الطاقة اللي بتستهلك بشكل رسمي وشكل غير رسمي ومن هنا برضوا هتكون في حملات تفتيش كبيرة جدا علي المناطق اللي هيا اعلي استهلاك الكهرباء وأقل دفع في الفواتير ومن الآخر كده لو انت بتسرق كهرباء فأحب أقولك أن اللي جاي مش خير ابدا خصوصا أن الغرامات بتاع سرقة التيار الكهربائي ثقيلة قوي وبتوصل كمان للسجن
