بالفيديو..متشتروش دلوقتي.. نصيحة خبراء الدهب للمصريين.. شوف السبب
سوق الدهب خلاص طالع السحاب والاسعار هتقفز في العالم.. دا اللي بتقوله كل التوقعات العالمية والمؤسسات المالية الدولية.. طيب الأسعار في مصر رايحة على فين وليه خبراء الدهب بينصحوا أن محدش يشتري دلوقتي.. خليكم معانا للآخر وهتعرفوا التفاصيل في الفيديو ده
زي ما قلنا هنا في بانكير من عدة أسابيع أن الدهب ياجماعة سعره هيزيد وهيقفز لمستويات تاريخية وشرحنا وقتها الأسباب وقلنا طول ما فيه حروب وصراعات دولية زي اللي شغالة في المنطقة عندنا أو في روسيا والصراع التجاري والمالي بين الصين والولايات المتحدة أسعار الدهب هتولع وقلنا كمان إن مجلس الاحتياطي الفدرالي الأمريكي هيخفض الفايدة ودا هيزود سعر الدهب اكتر وقلنا كمان إن الطلب على المعدن الأصفر هيققز ويوصل لارقام قياسية من البنوك المركزية العالمية للتحوط ضد الأزمات وضد خفض الفائدة الأمريكية وإن جزء كبير من الأموال الساخنة اللي هتهرب من السوق الأمريكي هتتحول الدهب وهترفع الطلب عليه اكتر.
كمان قلنا هنا في بانكير إنه نتيجة لكل الأسباب اللي قلناها في الأول سعر أوقية الدهب هيوصل 3 آلاف دولار بنهاية 2024 وكل اللي قلناه اتحقق الفدرالي الأمريكي خفض الفايدة 50 نقطة أساس بوم الاربعاء اللي فات ولسه هيخفضها بنفس النسبة في اجتماعه الجاي حسب التوقعات يعني كله رايح على الدهب واللي رفع لمستويات قياسية يوم الجمعة وسجل 2622 دولار للأوقية يعني داخلة على 2700 دولار وبعدها هتكمل في منحنى الصعود ودا معناه ارتفاع الأسعار في الصاغة المصرية بسبب ارتفاع أسعار المعدن الأصفر عالميا ولأن السوق المصري بيعتمد في جزء من المعروض على الاستيراد من الخارج وقلنا إن جرام 21 ممكن يعدي ال5 آلاف جنيه وعيار 24 احتمال يعدي ال7 آلاف جنيه وأمكن اكتر.
طيب لو عاوز تشتري دهب تعمل ايه وتشتري امتى؟
الطبيعي طالما لسه السعر هيزيد يبقي تشتري دلوقتي لكن الغريب ان خبراء الصاغة والاقتصاد ومنهم هاني توفيق الخبير الاقتصادي نصح المستثمرين والافراد اللي بيفكروا يشترو دهب بالتوقف عن الشراء، لغاية استقرار سعر الأوقية فوق 2600 دولار ودا بعد ما كسر سعر الدهب عالميا زي ماقلنا حاجز 2600 دولار ووصل لسعر 2622 دولار للأوقية في تعاملات الجمعة لأول مرة في تاريخ المعدن الأصفر، ودا بعد قرار الفيدرالي الأمريكي بخفض سعر الفائدة 50 نقطة ومع عودة التداول في بورصات الدهب بكرة الاتنين فيه توقعات بتاكد إن الدهب هيواصل الارتفاع ويتخطي حاجز 2630 دولار للأوقية وخبراء الاقتصاد شايفين أنه ممكن يرتد ويستقر عند حاجز ال2600 دولار وعشان كده بينصحوا بالتريث شوية في عملية الشراء.
ودا بالنسبة للناس اللي بتفكر تشتري أما بالنسبة للناس اللي عندها دهب وشايلاه للعوزة أو للاستثمار فطبيعي ينتظروا شوية لغاية وصول المعدن الأصفر لمنطقة الذروة وبعدها يقدروا يبيعوا عشان يحصلوا على اكبر مكسب ممكن لكن خلينا عارفين إن سوق الدهب في مصر قلاب وساعات بيعاكس المؤشرات العالمية والاسعار بتاخد اتجاه مخالف للتوقعات ودا بيعتمد على القوة الشرائية للمصريين واللي كتير فيهم ممن يلغي فكرة الدهب لغاية ما سعره يستقر ودا هيعمل زي ركود في الصاغة.
