ليه أسعار السيارات بتزيد رغم قرار المركزي.. السوق رايح على فين

 
 
ليه أسعار السيارات بتزيد رغم قرار البنك المركزي للبنوك بتدبير التمويل لاستئناف استيراد السيارات من تاني وليه أسعار المستعمل رجع يزيد بشكل كبير وامتى الاسعار هترجع تنزل تاني.. خليكم معانا للآخر وهتعرفوا التفاصيل.
 

لو شايل قرشين على جمب تشتري بيهم عربية ترحمك من الزحمة فأكيد انت محتار دلوقتي ومش فاهم ليه الأسعار زادت بشكل كبير ودي حقيقة فعلاً لأن السوق ماشي عكس التوقعات.. تعالوا نعرف ليه .

زي ما قلنا قبل كده إن السيارات كانت سلعة من ضمن 13 سلعة البنك المركزي حظر استيرادهم الشهور اللي فاتت ضمن خطة ترشيد الدولار ووقف نزيف العملة الأمريكية بعد أزمة نقص الدولار اللي ظهرت بشدة في 2023 وبداية 2024 وقبل قرار التعويم واعتبرها المركزي أنها سلع ترفيهية في سلم الأولويات وطبعا القرار كان مقبول لأن البلد كانت في شدة كبيرة مع خروج مليارات الدولارات من الأموال الساخنة وظهور السوق السودا للعملة وارتفاع أسعار السلع بشكل غير مسبوق لكن الوضع اتغير بعد قرار تحرير سعر الصرف أو تعويم الجنيه وبدأت اغلب الأسواق تستقر والاسعار تنزل نسبيا لكن دا محصلش بشكل كبير في سوق السيارات بسبب عطش السوق وتراكم الطلب على السيارات بعد فترة توقف الاستيراد اللي طولت وفي نفس الوقت ارتفاع أسعار السيارات لارقام فلكية نتيجة نقص المعروض.

سوق السيارات شهد انفراجة محدودة بعد قرار التعويم والاسعار نزلت شوية لكن رجعت الأزمة تاني بعد مشكلة سيارات ذوي الاحتياجات الخاصة واكتشاف تلاعب كبير بيحصل في إجراءات استيرادها وأنها بتروح لأشخاص لا تنطبق عليهم ومش من حقهم استيرادها ودا لأنها سيارات مدعومة بشكل كبير من الدولة للمعاقين يعني باختصار الدولة هي اللي بتدفع تمن عربية المعاقين ومع اكتشاف دخول آلاف السيارات المخصصة للفئة دي والمتاجرة فيها عن طريق بيع الجواب لأشخاص تانية قررت الحكومة تراجع الإجراءات وتحجز السيارات دي في المواني بجانب تعطل دخول شحنات تانية في المواني بسبب مشكلة في سيستم الدخول.

كل دا كان اسباب في ارتفاع أسعار السيارات في الفترة الأخيرة لكن البنك المركزي قرر يستأنف استيراد السيارات بشكل طبيعي ووجه البنوك بتدبير التمويل وعودة الاستيراد لكن الغريبة أن الأسعار فضلت في الطالع.. طيب ايه السر.

الحكاية مفهاش سر ولا حاجة لكن فيه فرق بين صدور القرار وبداية تنفيذه على أرض الواقع وإجراءات الاستيراد وشحن السيارات و ودخولها السوق المصري وتوزيعها ودي كلها إجراءات بتاخد وقت مش اقل من 3 شهور ودي اسمها دورة الاستيراد.. يعني السوق مش هيستقر غير بعد اكتمال دورة الاستيراد ولغاية ما نوصل للمعاد دا الأسعار هتفضل في الطالع بسبب نقص المعروض وارتفاع الطلب ودي حكم السوق.
طيب خبراء السوق بيقولوا إيه ؟
في الساعات الأخيرة طلع  خالد سعد،  أمين عام رابطة مصنعي السيارات، وقال ان سوق السيارات المستعمل يتأثر بشكل مباشر باللي بيحصل في أسعار الموديلات الجديدة،  وإن اي زيادة  في أسعار الموديلات الجديدة بيتبعها مباشرة زيادة في أسعار المستعمل ودا بسبب إتجاه المشترين لسوق المستعمل لشراء سيارة تتناسب مع إمكانياتهم المادية وبالتالي هيكون فيه زيادة في الطلب ودا بيرفع الاسعار.

وبخصوص  الارتفاع الجنوني في أسعار السيارات قال الخبير إن زيادة السيارات مبالغ فيها وبتجاوز  تكلفتها بكتير بجانب الي عودة ظاهرة الأوفر برايس اللي بيفرضها التجار على السيارات، ودا خلق حالة ركود كبيرة في حركة بيع السيارات الجديدة، وانتعاش المستعمل ودا سبب ارتفاع أسعار المستعمل في الفترة الأخيرة.
النصيحة بقي انك تستني شوية قبل ما تشتري سيارة وتستني دخول شحنات السيارات اللي جاية من بره وحصول زيادة في المعروض ووقتها الاسعار هتنزل حسب قانون السوق.