هتشتريها بكام بكرة؟.. تحرك جديد في أسعار الفراخ

هي أسعار الفراخ وصلت لفين، وهل في تخفيض ولا ارتفاع جديد، وامته السعر هيستقر في الأسواق.. هنقولك كل التفاصيل فتابعنا للآخر. 
 

في الساعات الأخيرة، ارتفعت أسعار الدواجن من تاني، والزيادة بدأت بشكل تدريجي مع بداية شهر سبتمبر الحالي، بحوالي 10 جنيه في الكيلو.

وارتفاع أسعار الفراخ كان مفاجأة بالنسبة لناس كتير، لأن الأسعار كانت مستقرة بشكل كبير لمدة أسبوعين وخاصة خلال شهر أغسطس الماضي، وماحصلتش أي تحركات.

لكن انهاردة، سعر الدواجن البيضا في الأسواق، ارتفع فوق مستوى الـ 70 جنيهًا للكيلو، وسجل 74 جنيهًا للكيلو كحد أقصى في المزارع عشان توصل إللمستهلك ما بين 84 و86 جنيهًا للكيلو.

والخبراء في الملف ده بيقولوا إن أسعار الدواجن بتشهد حالة من التذبذب ما بين هبوط وصعود، لكن واضح ان الزيادة مكملة معانا شوية.

وفي ظل ارتفاع الأسعار، طلعت الحكومة وقالت أنه عندنا اكتفاء ذاتي من الدواجن والبيض، وإن الدولة المصرية اتخذت عدد من الإجراءات عشان توصل لمرحلة الاكتفاء الذاتي من منتجات الدواجن، ومش بس كده، دي كمان بتصدر ما يزيد عن حاجتها للدول التانية، ومعروف، إن مصر بتحتل مكانة متقدمة في صناعة الدواجن، وكمان وزير الزراعة الجديد علاء فاروق، من بداية توليه الوزارة، وهو بيدي اهتمام كبير بملف صناعة الدواجن ذ، عشان تكفي السوق المحلي وكمان نقدر نصدير الفائض عن احتياجاتنا.

وعشان كده، بيتم تصدير الفائض من منتجات الدواجن إلى دول أوروبية وعربية أو آسيوية، بعد ما كانت مصر اتحرمت من تصدير منتجات الدواجن على مدار سنين طويلة.

طب الأسعار انهاردة على كام؟

بص يا سيدي، سعر الفراخ البيضا في المزرعة متوسط سجل 74 جنيه للكيلو، بس بيختلف السعر في الأسواق على حسب بُعد المزرعة عن الأسواق.

أما سعر الأوراك فبيترواح من 90 إلى 92 جنيه، والبانيه من 190 إلى 210 جنيه، والكبد والقوانص 125  جنيه، أما أجنحة الفراخ النهاردة فبـ 65 جنيه، والفراخ الأمهات البيضا ب68 جنيه للكيلو.

وبالنسبة لسعر البيض في السوق، فاستقر بشكل كبير بعد ما كان شهد ارتفاع الشهر اللي فات بحوالي 10 جنيه للطبق الواحد، وسجل سعر طبق البيض الأبيض في المزرعة 165 والأسواق  بين 170 و175 جنيه.

أما طبق البيض الأحمر، فسجل 166 جنيه عشان يوصل للمستهلك بنحو 175 جنيه، والبيض البلدي وصل 135 جنيه للطبق، عشان يوصل للمستهلك بسعر ما بين 150 و155 جنيهًا.

وخليك عارف إن أسعار الدواجن والبيض في مصر بتتأثر بعوامل كتيرة، منها زيادة المعروض منها في الأسواق، وده بيؤدي إلى زيادة المنافسة بين المنتجين وانخفاض الأسعار أو العكس.

وفي نهاية الفيديو، ماتنساش تقولنا في التعليقات سعر الفراخ عندك وصل لكام؟