مليارات بن سلمان.. وصدمة الدهب العالمي.. ومفاجأة إيني الإيطالية عن حقل ظهر.. وعودة تخفيف الأحمال
متابعينا الكرام أهلا وسهلا وبكم وتحليل جديد لأهم التقارير اللي قدمتها وحدة أبحاث بانكير على مدار اليوم النهاردة الاربعاء 11 سبتمبر 2024..
البداية كانت مع تقرير خاص ومهم عن الاستثمارات السعودية الجديدة في مصر.
وقال التقرير إن دول الخليج العربي كان ليها السبق في الاستثمار في مصر وخاصة وقت الأزمات ودا اللي أداها ميزة كبيرة في السوق المصري وشفنا إزاي صفقة رأس الحكمة الإماراتية غيرت بوصلة الاقتصاد المصري والاستثمارات وفتحت الطريق للخروج من أزمة نقص الدولار اللي حصلت وارهقت الدولة والمواطنين بسبب ارتفاع الأسعار والخدمات.
وشرح التقرير إنه بعد الصفقة الإماراتية بدأت الاستثمارات والتدفقات الأجنبية والعربية تهل من كل حتة سواء من الاتحاد الأوروبي أو صندوق النقد الدولي أو الصين ودول الخليج طبعا زي الإمارات اللي مكتفتش بصفقة رأس الحكمة لكن عملت صفقات تانية ضخمة في قطاع الطاقة النظيفة .
ولفت التقرير إن السعودية أكبر مستثمر عربي في مصر باستثمارات تزيد على 55 مليار دولار قائمة بالفعل وفيه دلوقتي 6225 شركة صناعية سعودية تعمل بمصر باستثمارات تبلغ 30 مليار دولار، ودا غير 518 شركة مصرية تعمل بالسوق السعودية، و285 علامة تجارية مصرية منتشرة بالمملكة ودا حسب أرقام وبيانات 2023.
وشرح بانكير إنه في الفترة الأخيرة قررت السعودية تدخل بتقلها في السوق المصري وقبل كده عملت خطوة مهمة جدا وهي تحويل الودائع السعودية في البنك المركزي المصري واللي بتوصل 10 مليار دولار الي استثمارات في السوق المصري ومتوقع تضخ السعودية استثمارات ضخمة مابين ال15و20 مليار دولار في الفترة الجاية من خلال عقد صفقات استثمارية ضخمة بالفعل والصفقات دي حسب المعلومات بتشمل الاستحواذ على بعض الشركات المصرية بخلاف تنفيذ مشروعات استثمارية كبرى.
التقرير التالي اللي قدمته منصات بانكير كان بخصوص التطورات الأخيرة في سوق الدهب العالمي
وشرح التقرير إن الدهب من اهم انواع الاستثمار لأنه معدن ليحتفظ بقيمته واللي بتزيد مع الزمن ومن فترة سوق الدهب سواء المحلي أو العالم بيعيش في حالة اضطراب كبيرة وارتفاعات قياسية بسبب التوترات السياسية والاقتصادية والعسكرية في العالم كله من ناحية واتجاه بنك الاحتياط الفيدرالي الأمريكي لخفض أسعار الفايدة بخلاف عمليات الشراء الكبيرة من البنوك المركزية العالمية على شراء المعدن الأصفر باعتباره ملاذ آمن
ولفت التقرير إنه في الساعات الأخيرة ارتفعت أسعار الدهب في السوق العالمية واقتربت من أعلى مستوياتها التاريخية بعد المناظرة بين مرشحي الرئاسة الأمريكية كامالا هاريس ودونالد ترامب واللي خلقت حالة من عدم اليقين ودا تتسبب في تراجع الدولار الأمريكي وفي نفس الوقت قفز الطلب على الدهب.
وشرح التقرير إن سعر أونصة الدهب سجل النهاردة أعلى مستوى عند 2529 دولار للأونصة وبكده اقترب سعر الدهب من المستوى التاريخي اللي تم تسجيله في أغسطس اللي فات عند 2531 دولار للأونصة.
ولفت بانكير إن أغلب التوقعات بتقول إن اسعار الدهب هتستمر في الارتفاع وهتوصل على نهاية 2024 إلى 2600 دولار لاونصة ودا طبعا أنسب وقت للاستثمار في الدهب.
وحدة أبحاص بانكير قدمت كمان تقرير مهم جدا عن الجديد في ملف الغاز
وشرح التقرير إن وزير البترول والثروة المعدنية المصري كان في زيارة مهمة جدا لإيطاليا وهي شريك مهم لمصر في حوض المتوسط وكمان إيطاليا فيها شركة ايني العملاقة في قطاع البترول والغاز واللي اكتشفت حقل ظهر بالبحر المتوسط.
ولفت بانكير إنه الوضع اتغير تماما بعد زيارة الوزير المصري واعلنت شركة "إيني" الإيطالية رفع إنتاج الغاز الطبيعي في مصر بحوالي 200 مليون قدم مكعب يوميا ف يناير الجاي ودا من خلال حفر 3 آبار جديدة بحقل ظهر بالمياه العميقة في البحر المتوسط وزي ما احنا عارفين إن مساحة حقل ظهر ضخمة جدا في المتوسط واللي اتحفر فيها هو بير واحد بس واللي اعتمدت عليه مصر السنين اللي فاتت قبل ما إنتاجه يقل لظروف طبيعية.
وسلط التقرير الضوء على زيارة الووزير لإيطاليا واتفاقه مع قادة شركة ايني خلال زيارته لإيطاليا على التعجيل في تنفيذ أعمال التنمية بحقل ظهر، وسرعة إنجاز بحفر 3 آبار جديدة بداية من الأسبوع الجاي، وربطهم على الإنتاج ودا مقابل التزام الحكومة بسداد المستحقات الشهرية بانتظام من حصة الشريك وبخلاف دفع المديونيات المتأخرة وفقاً للجدولة المتفق عليها.
التقرير الأخير معانا في تحليل النهاردة حولين موضوع مهم جدا للمصريين وهو عودة تخفيف الأحمال وقطع الكهرباء.
وشرح بانكير إن مدة وقف تخفيف الأحمال اللي أعلنت عنها الحكومة هتنتهي في ويم 15 سبتمبر الحالي يعني بعد 4 أيام أو يوم الأحد الللي جاي ولسه مش عارفين بقي الحكومة هترجع لقطع الكهربا من تاني ولا هيكون فيه قرار جديد.
وشرح التقرير إن الدكتور محمود عصمت وزير الكهرباء والطاقة المتجددة، عمل اجتماع مع رؤساء شركات توزيع الكهرباء على مستوى الجمهورية لمتابعة خطة العمل فى كل شركة والإجراءات اللى بتعملها الشركات لمواجهة الفقد الفنى والفقد التجارى وظاهرة سرقة التيار الكهربائي بالتعاون والتنسيق مع شرطة الكهرباء ولجان المتابعة والمرور بالشركة القابضة والوزارة، ونتائج الأعمال في الشهرين اللي فاتو لتحسين جودة التغذية ومواجهة التعدى على الكهرباء والكمية اللي تم استردادها وأبرز الحالات اللى تم ضبطها والإجراءات اللى تمت فى مواجهة سارقى الكهرباء .
ولفت التقرير إنه الوزير فيه دلوقتي متابعة يومية من القيادة السياسية للاجراءات اللي بيتم اتخاذها للحد من ظاهرة سرقة التيار الكهربائي، واكد أن نسب الفقد الناتج عن سرقات التيار الكهربائى بتكبد الدولة خسائر مالية كبيرة وتقريبا كده الحجكومة بتحاول تحد من سرقة الكهربا عشان مترجعش لتخفيف الأحمال من تاني
