هدية 2024 من البنك الدولي وأوربا.. مصر تنتظر غنيمة كبرى
يا ترى ايه الدعم اللى هيقدمه الاتحاد الاوربي والبنك الدولى لمصر؟ وليه الدعم ده مش هيوصل الا قبل نهاية 2024 ؟ وايه المشروعات اللى هيتم تنفيذها بالتعاون بين الحكومة ومؤسسات التمويل المعنية؟
من فترة وصل مصر وفد رفيع المستوى من الاتحاد الأوربي بيضم رئيسة المفوضية الأوروبية أورسولا فون دير لاين وعدد من المسؤولين الكبار منهم رؤساء وزراء إيطاليا واليونان وبلجيكا.. وبعد نهاية الزيارة دي أعلن الاتحاد رفع علاقته مع مصر إلى وضع "الشراكة الاستراتيجية" ودي خطوة مهمة أدت إلى الاتفاق على تمويل واستثمارات بمليارات اليوروهات لمصر.
وأعلن الاتحاد الاوربي تقديم حزمة مساعدات لمصر بقيمة إجمالية تقارب 7.4 مليار يورو ما يوازي (8.1 مليار دولار
و ضخ الأموال دي من الاتحاد الأوربي عبارة عن مزيج من المنح والقروض لمساعدة مصر اللي يبننظر ليها من الدول الغربية على ان استقرارها ركيزة اساسية لاستقرار الشرق الأوسط.. وبيهدف الاتحاد الأوروبي إلى ضخ استثمارات بقيمة 5 مليارات يورو من القطاع الخاص في مصر في صناعات زي الهيدروجين الأخضر والزراعة وإدارة المياه.
طب ايه الجديد ؟ وايه حكاية الهدية اللى هتوصل مصر وهيشارك فى الاتحاد الاوربي والبنك الدولي؟
من ساعات أعلنت وزيرة التخطيط والتنمية الاقتصادية والتعاون الدولي ، الدكتورة رانيا المشاط، إن مصر هتحصل على تمويلات بـ1.7 مليار دولار من الاتحاد الأوروبي والبنك الدولي قبل نهاية 2024.. وده بعد ما وافق مجلس إدارة مجموعة البنك الدولي فى يونيو اللى فات على تقديم تمويل بقيمة 700 مليون دولار للحكومة المصرية في إطار برنامج تمويل سياسات التنمية ، لتعزيز استقرار الاقتصاد الكلي، وتحقيق مسار نمو يتسق مع التحول الأخضر، ودعم التنافسية وتحسين بيئة الأعمال بشكل يعمل على تمكين القطاع الخاص.
وبرنامج تمويل سياسات التنمية ده بيعتبر جزء من حزمة تمويلات بقيمة 6 مليار دولار لمدة 3 سنين بتعتزم مجموعة البنك الدولي تقديمها للحكومة بعد ما تم الإعلان عنها في مارس 2024 للمساعدة في تحفيز نمو القطاع الخاص وخلق فرص العمل وتعزيز الاستثمار في رأس المال البشري ودعم القدرة على الصمود في وجه التغيرات المناخية.
ومن حوالى 3 شهور كده رئيسة المفوضية الأوروبية، أورسولا فون أعلنت خلال مؤتمر استثماري عن توقيع أكتر من 20 اتفاق أو مذكرة تفاهم مع مصر عقب حزمة تمويل من الاتحاد الأوروبي بقيمة 7.4 مليار يورو والاتفاق في مارس على رفع العلاقات مع القاهرة الى مستوى الشراكة الاستراتيجية.
طب ليه الاتحاد الاوربي قرر دعم مصر بالشكل الكبير ده ؟
من بعد العدوان الاسرائيلي على غزة ونظرة العالم كله لمصر اختلفت والكل عرف وادرك قيمة ومكانة مصر ودورها المحوري في حفظ الاستقرار في الشرق الأوسط.. وكل قادة أوربا اللى زاروا مصر وقابلوا الرئيس السيسي عرفوا إن خيوط اللعب في المنطقة ومفاتيحها مع مصر..وعشان كده اتغيرت وجهة نظر مؤسسات التمويل تجاه مصر وبدأنا نسمع تن أهمية دعم مصر ويساعدها للخروج من الأزمة الاقتصادية اللى بتمر بيها وكمان تقديم تمويل إضافي زي ما حصل من صندوق النقد اللي رفع تمويل لمصر من ٣ إلى ٨ مليار دولار بالإضافة إلى تحويلات اضافية من البنك الدولي ومؤسسات تانية بقيمة تصل إلى ١٢ مليار دولار وطبعا كل دي سيولة دولارية ساهمت في حل أزمة نقص العملة الأجنبية وخلت أسعار الدولار تهبط إلى حوالي حدود 48 جنيه واختفت تماما السوق السودا للعملة
