بطريقة بسيطة.. إزاي تدفع مصاريف المدارس بالتقسيط؟

يا ترى هل في طريقة معينة ومضمونة تساعد أولياء الأمور في دفع مصاريف المدارس، بدون قروض أو فوايد، وهل في بنوك في مصر بتوفر الخدمات دي، وإزاي، هنقولك كل التفاصيل فتابعنا للآخر. 
 

كلها أيام والسنة الدراسية الجديدة تبدأ، ومن هنا بيبدأ الأهالي أو أولياء الأمور يدوروا على أفضل وأسهل طريقة عشان يدفعوا مصاريف المدارس على أقساط وبدون فوائد.

ومن هنا، أعلن بنك مصر أنّه هيوفر لعملائه خدمة تقسيط مصاريف المدارس والجامعات على مدار 3 شهور من غير فوايد أو مصاريف إدارية، وده بيتم من خلال الدفع باستخدام بطاقات بنك مصر الائتمانية، والعرض ساري بداية من 15 أغسطس الماضي لحد 15 أكتوبر الجاي.

والعرض ده بيشمل حاملي بطاقات بنك مصر الائتمانية فيزا وماستركارد عدا العربي وقسطها والشركات والإسلامي.

ومن بنك مصر لبنك القاهرة، اللي هو كمان أتاح تقسيط مصاريف المدرسة والجامعات من غير فوائد لنهاية شهر سبتمبر.

وده بيحصل عن ظريف بطاقات البنك الائتمانية، ما عدا بطاقتي التقسيط والشركات، وبيكون تقسيط مصاريف المدارس والجامعات على 18 شهرًا بـ0% فوائد بمصاريف إدارية، والعرض حتى 30 سبتمبر 2024، وبيتم الدفع ببطاقات بنك القاهرة الائتمانية عدا بطاقات الشركات والتقسيط.

أما البنك الكويتي الوطني، فوفر لعملائه دفع المصاريف مع دخول المدارس والجامعات من خلال نظام التقسيط لحد 100 ألف جنيه مصري على 12 شهر من فوايد.

وده بيكون من خلال البطاقات الائتمانية للبنك، وطبعا العرض ساري لحد 30  من شهر سبتمبر الحالي.

كمان تطبيق "فوري" للدفع عبر الإنترنت، بيوفر طريقة دفع بتناسب العميل سواء كاش أو بالتقسيط أو من خلال المحفظة الإلكترونية من أي مكان، وسهّل كمان للعملا إمكانية دفع المصاريف المدرسية لوزارة التعليم على 3 أقساط، بحيث تبدأ مع بداية سبتمبر الجاري كقسط أولي لمصاريف المدارس.

وبكده، حضرتك لو ولي أمر مش هتشيل هم وهتقدر تدفع مصاريف المدراس من غير ما تفكر كتير.

أما عن ميعاد المدارس، فوزارة التربية والتعليم والتعليم الفني، بعتت خطاب ل للمديريات التعليمية في كل المحافظات، عشان تأكد على تواجد المعلمين في مدارسهم في أول أيام الدراسة.

وأعلن محمد عبد اللطيف وزير التربية والتعليم والتعليم الفنى، مواعيد بدء العام الدراسى الجديد بالمدارس الرسمية والخاصة والدولية، وقال إن العام الدراسى الجديد هيبدأ بالمدارس الرسمية والخاصة للغات والخاصة عربى والقوميات 21 سبتمبر الحالي، وهينتهي الخميس الموافق 5 يونيو 2025، بإجمالى 35 أسبوعًا، وبيتم توزيع المناهج على الفصلين الدراسيين.

وكمان هتبدأ الدراسة أو العام الدراسى الجديد بالمدارس الدولية يوم 8 سبتمبر 2024.