مفاجأة في استمرار هبوط الدولار.. تحركات رئاسية تحسم الملفات الكبري.. صدمة عودة تخفيف الأحمال – وتفاصيل صفقة التجاري الدولي وبنك مصر

متابعينا الكرام في كل مكان أهلا وسهلا  بكم ولايف جديد لاهم التقارير اللي قدمتها وحدة أبحاث بانكير على مدار الساعة النهاردة الاثنين 9 سبتمبر 2024

منصاات بانكير قدمت عدد من التقارير المهمة النهاردة ومن بينها تقرير عن استمرار هبوط سعر الدولار بالبنوك للأسبوع التالت على التوالي..

وشرح التقرير إن الدولار نزل 20 قرش مرة واحدة في خلال اسبوع بالظبط وسجل الاتنين اللي فات 48.53 جنيه مقابل  48.33 جنيه النهاردة.

وقال التقرير إن نزول الدولار لفترة طويلة مش معناه عودة سياسة التعويم المدار وعودة تدخل البنك المركزي في تحديد سعر الدولار  ودا لأن  المركزي من المستحيل يتدخل تاني في سعر الصرف إلا لو حصلت كارثة خارج السيطرة.
ولفت بانكير إن سعر الدولار دلوقتي بيعكس حالة العرض والطلب ومن غير اي تدخل.
وقال التقرير إنه بعيد عن اتفاقية صندوق النقد الدولى واللي اشترط تحرير سعر الصرف البنك المركزي مش  هيرجع لسياسة حماية الجنيه وإدارة سوق الصرف بالأمر المباشر لأن مصر بدأت تجني ثمار تعويم الجنيه وتصحح التشوه المالي ورجعت الاستثمارات الضخمة من تاني وحصلت انطلاقة اقتصادية كبيرة.

وفسر تقرير بانكير اسباب نزول الدولار في الايام الاخيرة وقال إن دا بسبب استمرار التدفقات الدولارية  من الخارج والارتفاع الكبير في موارد الدولة الطبيعية من العملة الصعبة وكمان عشان ترشيد الاستيراد وزيادة التصدير والتصنيع وحاجات تانية كتير .

منصات بانكير قدمت كمان تقرير مهم عن مفاجآت الرئيس السيسي في الملفات الصعبة .

وقال التقرير إنه في الفترة اللى فاتت كانت فيه تحركات مهمة جدا للرئيس السيسي فى عدد من الملفات الصعبة في محاولة للحصول الى حل جذري لكتيرمن المشاكل اللى بتمر بيها مصر فى آخر 3 سنين وتحديدا من بعد الأزمة الروسية الاوكرانية وتداعياتها على اسعار السلع الأساسية والأسواق.

ولفت التقرير إن الرئيس السيسي مهتم جدا وبيشرف بنفسه على كل التحركات اللى بتحصل تحديدا فى الملف الاقتصادي اللى بيعتمد فيه على عدد من الوزراء والمسئولين على راسهم طبعا المصرفي الكبير حسن عبدالله محافظ البنك المركزي بالاضافة الى وزراء المجموعة الاقتصادية باشراف كامل من رئيس الوزراء الدكتور مصطفى مدبولي

وشرح بانكير إن فيه اكتر من تحرك مهم حصل الفترة اللى فاتت فى اكتر من ملف كان اهمهم طبعا الزيارة التاريخية للرئيس السيسي لتركيا ودي أول زيارة يقوم بيها السيسي  لتركيا بعد توليه حكم مصر.. واللي كانت مهمة بشكل اكبر على المستوى الاقتصادي ..وعلى هامش الزيارة تم توقيع أكتر 20 اتفاقية تعاون فى مجالات استثمارية  وخلال ايام هتضخ تركيا استثمارات ضخمة بمليارات الدولارات فى مصر وتحديدا فى قطاع مهم زي قطاع المنسوجات وصناعة الملابس .

ولفت التقرير إنه فيه كمان زيارة وتحرك مهم لرئيس الحكومة الدكتورمصطفى مدبولي  في فعاليات منتدى التعاون الصيني- الأفريقي وإن  رئيس الحكومة استغل زيارته للصين وعقد اجتماعات مكثفة مع مجتمع المال والاعمال فى الصين لجذب استثمارات أجنبية مباشرة بمليارات الدولارات وتم الاتفاق على مشروعات كتيرة سواء فى المنطقة الاقتصادية لقناة السويساو حتى فى مناطق تانية ..

وحدة أبحاث بانكير قدمت تقرير مهم عن عودة تخفيف الاحمال  وهي العبارة اللي بترعب المواطنين مع استمرار موجة الحر.

وقال التقرير إن مجلس الوزراء كان أعلن وقف العمل بخطة تخفيف الأحمال في الفترة من 21 يوليو اللي فات ولغاية 15 من سبتمبر الحالي، يعني بعد 6 أيام من النهاردة.

ولفت التقرير إنه لغاية اللحظة دي مجلس الوزراء ماصدرش اي قرار رسمي سواء بعودة تخفيف الاحمال وقطع الكهرباء لمدة ساعتين زي ما كنا شغالين قبل قرار وقف تخفيف الأحمال أو استمرار وقف خطة تخفيف الأحمال وتوفير المواد البترولية اللي محطات توليد الكهرباء عايزاها علشان تفضل شغالة ومتقفش عن التشغيل .

وقال التقرير إن مصادر بوزارة الكهرباء والطاقة المتجددة، قالت لبانكير أن مركز التحكم القومي للكهرباء ما اصدرش اي قرارات رسمية سواء بالعودة لتطبيق خطة تخفيف الاحمال.

وأضاف التقرير إن المصادر أكدت إن الاقرب للعمل في الخطة الجديدة هو استمرار وقف العمل بخطة تخفيف الأحمال خصوصا في ظل الجهود اللي بتقوم بيها الحكومة لتوفير المواد البترولية اللي بتحتاجها محطات توليد الكهرباء سواء غاز طبييعي او مازوت

التقرير الاخير معانا في تحليل النهاردة بخصوص صفقة كبيرة تمت في قطاع البنوك المصرية .
وسلط التقرير الضوء على صفقة تمت النهاردة بين بنك مصر والبنك التجاري الدولي سي اي بي مصر وبين شركة سوديك لتمويل مشروع ضخم بقيمة 4.14 مليار جنيه.

وقال التقرير إن بنك مصر دخل الصفقة بصفته المقرض والمرتب الرئيسي الأولي ومسوق التمويل ووكيل التمويل وبنك الحساب أما البنك التجاري الدولي فشارك في العملية بصفته المقرض والمرتب الرئيسي الأولي ومسوق التمويل ووكيل الضمان،

وحسب التقرير صفقة الـ 4 مليار جنيه مخصصة لتمويل جزئي للتكلفة الاستثمارية لمشروع عمراني ضخم بتنفذه شركة سوديك بمدينة الشيخ زايد الجديدة.

المصرفي الكبير محمد الإتربي علق على الصفقة وقال إنها ثمرة التعاون بين بنك مصر والبنك التجاري الدولي، واللي أسفر عن إتمام التمويل بنجاح.

أما المصرفي المخضرم عمرو الجنايني فأكد انفتاح البنك على تمويل المشروعات القومية الضخمة في كل المجالات الاقتصادية وأشاد بالتعاون مع سوديك واللي قال عنها إنها واحدة من الشركات الرائدة في قطاع التنمية العقارية..