الدولار ودخول المدارس!!.. ليه الدهب مش هيوصل لمستويات تاريخية تاني؟
يا ترى ايه اللى بيحصل فى سوق الدهب فى الأيام الأخيرة ؟ وايه الأسباب اللى مش هتخلى الدهب يوصل تاني لمستويات تاريخية زي ما حصل فى اخر سنتين؟ وايه علاقة ده بسعر الدولار فى البنوك وشركات الصرافة؟ وايه كمان علاقة بدء العام الدراسي ودخول المدارس؟
اى حد بيتابع سوق الصاغة فى مصر هيلاحظ ان الفترة الأخيرة فيها استقرار فى سعر الدهب وعكس كل التوقعات اللى كانت بتقول ان الدهب هيوصل الى 4 الاف جنيه الأسعار لسه فى المتوسطات المعقولة .. فيا ترى ايه أسباب اللى بيحصل ده؟
وفقا لمنصة آي صاغة المتخصصة فى عالم الدهب وتقييماته فالمؤشرات الحالية بتأكد أن الدهب مش هيرجع إلى تسجيل المستويات التاريخية اللي شهدها خلال السنة اللى فاتت في السوق المصرية.
طب يا ترى ايه الأسباب ؟
فيه 4 أسباب أساسية وقوية حددتهم المنصة هتمنع الدهب من تسجيل مستويات الارتفاع القياسية أولهم هو تراجع الأونصة بالبورصة العالمية خصوصا وان الفيدرالى الامريكي لحد اللحظة اللى بنتكلم فيها ما أوقفش سياسة التشديد النقدي وده مخلى الاقبال مستمر على الدولار والاستفادة بالمعدل العالى للفايدة
وتانى سبب يمنع الدهب من الصعود هو تراجع سعر صرف الدولار بالسوق المحلية واستقراره عند مستويات تتراوح بين 48 و49 جنيه من ساعة تخفيض الجنيه مقابل الدولار في مارس اللى فات لما تم تحرير سعر الصرف بالكامل وتم القضاءء على السوق السودا للدولار ووقف المضاربة على العملة
أما تالت سبب فى توقعات عدم ارتفاع سعر الدهب فهو تراجع الطلب على المعدن النفيس مع هدوء سوق الصرف وازالة مخاوف الناس من تآكل مدخراتهم .. واخر سبب من الأسباب الأربعة هو انتعاش البيع العكسي للدهب من المواطنين إما للبحث عن السيولة مع موسم الدراسة أو للاستفادة من الأسعار الحالية وممكن كمان لمخاوف من تعرض المعدن النفيس للهبوط بشكل مفاجئ.
طب ايه هى المستويات التاريخية اللى وصلها الدهب؟
وفقا لاحصائيات منشورة في وسائل الاعلام قفزت جميع الأعيرة والجنيه الذهب بنسبة 92.4% خلال السنة اللى فاتت بس و صعد سعر الجرام عيار 18 من مستوى 1414 جنيه في بداية 2023، إلى نحو 2721 جنيه في نهاية ديسمبر 2023.. وقفز سعر الجرام عيار 21 وهو الأكثر تداولاً في السوق المصرية من مستوى 1650 جنيه في بداية 2023 إلى نحو 3175 جنيه في نهاية السنة..و صعد سعر الجرام عيار 24 من مستوى 1886 جنيه في بداية العام إلى نحو 3629 جنيه في نهاية 2023. وأخيراً، سجل الجنيه الذهب ارتفاعا من مستوى 13200 جنيه في بداية 2023، إلى نحو 25400 جنيه في نهاية السنة.
وعلى مستوى البورصة والسوق العالمي ارتفع سعر أونصة الدهب بنسبة 14.3% على مدار2023 وزاد سعر الأونصة من مستوى 1810 دولار في بداية 2023 إلى نحو 2069 دولارا في نهاية السنة.
