الجنية يواصل الصمود.. تطور مهم في سوق الصرف
يا ترى ايه اللي بيحصل فى سوق صرف العملات الأجنبية ؟ وازاى الجنية قدر يواصل الصمود قدام الدولار فى التعاملات الأخيرة؟ وهل سعر العملة الأمريكية هيرتفع الايام الجاية ولا هينخفض؟
فى التعاملات الأخيرة واصل الجنية الصمود امام الدولار وحاليا بيتم تداول الدولار عند مستويات تتراوح بين 47 إلى أقل من 49 جنيه وسط اتقرار سعر صرف العملة المصرية مقابل سلة العملات العالمية والعربية من بعد القرارات التاريخية اللى صدرت فى شهر مارس اللى فات وكان أهمها تحرير سعر صرف الجنيه وربطه بقواعد العرض والطلب.
ومع استمرار الحكومة في تعزيز وزيادة السيولة الدولارية وتنويع مصادر النقد الأجنبي كشف البنك المركزي عن ارتفاع إجمالي الاحتياطي من النقد الأجنبي وتسجيل مستويات تاريخية وزاد الاحتياطي خلال شهر أغسطس اللى فات بمقدار 109 مليون دولار مقارنة بمستوى شهر يوليو.
ووفقا لبيانات رسمية ارتفعت الاحتياطيات الدولية لمصر إلى 46.597 مليار دولار بنهاية شهر أغسطس مقابل 46.488 مليار دولار بنهاية يوليو وقبلها ارتفع احتياطي مصر من النقد الأجنبي خلال شهر يوليو بمقدار 105 ملايين دولار مقارنة بمستوى شهر يونيو .
طب ايه سبب الاستقرار اللى حصل فى سعر الدولار الفترة اللى فاتت ؟
فيه نمو ملحوظ فى التدفقات الدولارية على مصر .. يعنى عندك مثلا تحويلات المصريين العاملين بالخارج ارتفعت خلال شهر يونيو 2024 للشهر الرابع على التوالي بمعدل 65.9% لتسجل نحو 2.6 مليار دولار مقابل 1.5 مليار دولار خلال شهر يونيو 2023، وبكده ارتفعت التحويلات بأكتر من الضعف عن اللى حققته قبل الإجراءات الإصلاحية اللي حصلت فى مارس وكانت انخفضت الى في فبراير 2024 بنحو 1.3 مليار دولار.
وفي وقت سابق توقع صندوق النقد تسجيل التحويلات حوالي 23.1 مليار دولار خلال العام المالي الجاري بنسبة زيادة 5.5% عن السنة اللى فاتت فى وقت بتستهدف فيه الحكومة تحقيق 53 مليار دولار من التحويلات بحلول عام 2030.
كمان ارتفع الاستثمار الأجنبي المباشر في مصر خلال أول 9 شهور من العام المالي اللى فات إلى 23.7 مليار دولار ليغطي بكده لأول مرة عجز الحساب الجاري البالغ 17.1مليار دولار.
وفي إطار مكافحة السوق السودا وضبط تجار العملة شنت الأجهزة الأمنية حملات مكثفة لجرائم الاتجار غير المشروع بالنقد الأجنبي والمضاربة بأسعار العملات عن طريق إخفائها عن التداول والاتجار بيها خارج نطاق السوق المصرفية وما تمثله من تداعيات سلبية على الاقتصاد القومي .
